सोलापूर : मान्सूनपूर्व नाले सफाई, खोलीकरण-रुंदीकरण आणि पूरनियंत्रण उपाययोजनांमध्ये झालेल्या दिरंगाईप्रकरणी सोलापूर महानगरपालिकेने कठोर कारवाई करत प्रभारी नगर अभियंता सारिका गंगाराम आकुलवार यांची एक वार्षिक वेतनवाढ स्थगित केली आहे. महापालिका आयुक्त डॉ. सचिन ओम्बासे यांनी कडक भूमिका घेऊन ही कारवाई केली आहे. त्यांनी याबाबत आदेश जारी केले आहेत.
गतवर्षीच्या पावसाळ्यात शहरातील पनाश अपार्टमेंट व मंत्री चंडक परिसरात जवळपास दोन महिने पावसाचे पाणी साचल्याने नागरिकांना मोठा त्रास सहन करावा लागला होता. या पार्श्वभूमीवर आपत्कालीन व्यवस्थापन प्रमुख म्हणून नगर अभियंता कार्यालयाकडे जबाबदारी सोपविण्यात आली होती. तसेच संबंधित भागातील नाले व पाणी निचरा कामांसाठी सन २०२५-२६ आर्थिक वर्षात निधी उपलब्ध करून देण्यात आला होता. मात्र, कामे न झाल्याने निधी व्यपगत झाल्याचा ठपका आदेशात ठेवण्यात आला आहे.
दरम्यान, शहरातील पूरस्थिती टाळण्यासाठी पर्जन्यजल-पूर नियंत्रण व आपत्ती व्यवस्थापन आराखडा, नाले सर्वेक्षण, बेस मॅप तयार करणे तसेच नाल्यांचे खोलीकरण-रुंदीकरण, गाळ काढणे आणि आवश्यक कामे पूर्ण करण्याबाबत प्रशासनाने वेळोवेळी आदेश दिले होते. मात्र, संबंधित आदेशांची प्रभावी अंमलबजावणी झालेली नसल्याचे नमूद करण्यात आले आहे.
सोलापूर शहरात गतवर्षी झालेल्या अतिवृष्टीमुळे नागरिकांच्या घरात, रस्त्यावर
पाणी साचले होते. अशा ठिकाणी नाला खोलीकरण व रुंदीकरण करण्याचे कामे करून घेणे. वसुधरा कॉलेज, शरदचंद्र प्रशाला, संगमेश्वर कॉलेज या ठिकाणी नोटीस देऊन नाला खोलीकरण व रुंदीकरण करणे, इतर कामे करणेबाबत आदेश देण्यात आले होते.
सोलापूर शहरातील पावसाळयापुर्वी सर्व नाल्यांचे खोलीकरण रूंदीकरण करणे, नाल्यातील गाळ काढणे, आवश्यक त्या ठिकाणी करावयाचया कामाचे गणनपत्र तयार करून अंदाजपत्रकिय तरतुदीनुसार मक्तेदारामार्फत आवश्यक त्या ठिकाणी पोकलेन ने व शक्य तेथे मनपा डंपरच्या मदतीनेकाम करण्याबाबत इतिवृत्तांत आपणास आदेश देण्यात आलेले होते.दि. २६ मे रोजी महापौर, सभागृह नेते व सदस्यांनी विभागीय कार्यालय क्र.५ अंतर्गत शिवदारे कॉलेज ते द्वारकाधीश मंदिरलगतच्या नाल्याच्या कामाची पाहणी केली असता, आदेश देऊनही काम सुरू नसल्याचे आढळून आले. या प्रकरणी संबंधित अहवाल वरिष्ठांकडे सादर करणे अपेक्षित असतानाही आवश्यक कार्यवाही न झाल्याचा उल्लेख आदेशात करण्यात आला आहे. मान्सूनपूर्व कामांतील विलंबामुळे शहरात पाणी तुंबणे, घरांमध्ये पाणी शिरणे व नागरिकांना त्रास होण्याची शक्यता निर्माण झाली आहे. शहरातील नाले सफाई व संबंधित कामे अपूर्ण राहणे ही बाब गंभीर असून कार्यालयीन शिस्तीस बाधा पोहोचविणारी असल्याचे नमूद करण्यात आले आहे. आदेशाची पुर्तता झालेली नाही. त्यामुळे मान्सून पुर्व कामकाजात अडचण निर्माण झालेली आहे. यामुळे पावसाचे पाणी घरात शिरून अथवा साचून शहरातील नागरिकांना यांचा नाहक त्रास सहन करण्याची शक्यता नाकारता येत नाही. यास सर्वस्वी नगरअभियंता सारिका आकुलवार या जबाबदार आहेत.
नाल्यांसंदर्भात अनुचित घटना घडल्यास
नगर अभियंता अकुलवार जबाबदार
याप्रकरणी महाराष्ट्र नागरी सेवा (वर्तणूक) नियम १९७९ मधील नियम ३ (१) (एक ते तीन) चा भंग झाल्याचे नमूद करत, महाराष्ट्र महानगरपालिका अधिनियम कलम ५६ (२) (ब) नुसार सारिका आकुलवार यांची एक वार्षिक वेतनवाढ पुढील वेतनवाढीवर परिणाम होणार नाही अशा पद्धतीने हंगामी स्वरूपात स्थगित करण्यात आली आहे.
तसेच भविष्यात नाल्यांसंदर्भात कोणतीही अनुचित घटना घडल्यास त्यास संबंधित नगर अभियंता जबाबदार राहतील, असा इशाराही आयुक्तांच्या आदेशात देण्यात आला आहे.
——-
