वैराग : सोलापूर जिल्ह्यातील वैराग पोलीस ठाण्याच्या हद्दीत अवैध धंद्यांविरुद्ध पोलिसांनी अत्यंत आक्रमक मोहीम उघडली आहे. वैराग पोलीस ठाण्याचा पदभार स्वीकारून अवघा एक आठवडा उलटत नाही तोच, नवनियुक्त प्रभारी अधिकारी पोलीस निरीक्षक अमूल कादबने यांच्या खमक्या मार्गदर्शनाखाली आणि नेतृत्वाखाली गुन्हे प्रकटीकरण पथकाने (DB) दिनांक ०९/०७/२०२६ रोजी एक मोठी आणि धाडसी कारवाई केली. मौजे यमाईतांडा (ता. बार्शी, जि. सोलापूर) येथील वेगवेगळ्या अवैध गावठी दारू तयार करणाऱ्या अड्ड्यांवर एकाच वेळी छापे टाकून पोलिसांनी हजारो रुपयांचे गुळमिश्रीत रसायन, लोखंडी व प्लास्टिकचे बॅरल्स जप्त केले असून, पाच जणांविरुद्ध प्रोव्हिशन कायद्यांतर्गत गुन्हे दाखल केले आहेत. पोलीस निरीक्षकांच्या या पहिल्याच धडाकेबाज कारवाईमुळे नागरिकांमधून त्यांचे विशेष कौतुक होत असून, “अशाच सिंघम स्टाईल कारवायांची पोलीस प्रशासनाकडून अपेक्षा होती,” अशा प्रतिक्रिया जनमानसातून उमटत आहेत.
गुप्त बातमीदाराच्या आधारे रचला सापळा
पोलीस निरीक्षक अमूल कादबने यांच्या आदेशान्वये गुन्हे प्रकटीकरण पथकाचे पोलीस अंमलदार पोहेकॉ/१६४७ आलाट, पोकॉ/७९७ आकाश थिरसिंग पवार आणि पोकॉ/१४८३ राहुल तुकाराम पाटील हे शासकीय वाहनाने गौडगाव बीट हद्दीत पेट्रोलिंग करत होते. पेट्रोलिंग दरम्यान पोलिसांना खात्रीशीर बातमी मिळाली की, मौजे यमाईतांडा येथे काही इसम आपापल्या घराच्या पाठीमागे आडोशाला गावठी दारूसाठी लागणारे गुळमिश्रीत, घाण वासाचे रसायन बनवत आहेत. ही माहिती मिळताच पोलीस निरीक्षकांच्या मार्गदर्शनाखाली पथकाने दोन पंचांना सोबत घेऊन तातडीने यमाईतांडा येथे वेगवेगळ्या ठिकाणी नियोजित छापे टाकले.
पोलिसांनी पकडलेले आरोपी आणि जप्त केलेल्या मालाचा सविस्तर तपशील:
पोलिसांनी वेगवेगळ्या वेळी टाकलेल्या छाप्यांमध्ये खालील आरोपींना मुद्देमालासह रंगेहात पकडले:
अ.क्र. आरोपीचे नाव व पत्ता वेळ जप्त मुद्देमाल एकूण किंमत
१ सुनील बाबु राठोड (वय ३८, धंदा- शेती, रा. यमाईतांडा) सायंकाळी १७.१० वा. १ लोखंडी व १ प्लास्टिक बॅरल (३५० लीटर गुळमिश्रीत रसायन) रु. १७,५००/-
२ संतोष रेवण राठोड (वय ३८, धंदा- शेती, रा. यमाईतांडा) सायंकाळी १८.३० वा. १ लोखंडी व १ प्लास्टिक बॅरल (२५० लीटर गुळमिश्रीत रसायन) रु. १२,५००/-
३ संजय रेवण राठोड (वय ३५, धंदा- शेती, रा. यमाईतांडा) सायंकाळी १८.४० वा. १ लोखंडी व १ प्लास्टिक बॅरल (२५० लीटर गुळमिश्रीत रसायन) रु. १२,५००/-
४ शिवाजी पोमा पवार (वय ५८, धंदा- शेती, रा. यमाईतांडा) सायंकाळी १८.५० वा. १ लोखंडी व १ प्लास्टिक बॅरल (३५० लीटर गुळमिश्रीत रसायन) रु. १७,५००/-
५ विकास शिवाजी पवार (वय ४३, धंदा- शेती, रा. यमाईतांडा) रात्री १८.५५ वा. १ लोखंडी व १ प्लास्टिक बॅरल (२५० लीटर गुळमिश्रीत रसायन) रु. १२,५००/-
रसायनाचा साठा जागीच नष्ट; नमुने घेतले ताब्यात
छापा टाकलेल्या सर्व ठिकाणी पोलिसांना गुळमिश्रीत रसायनाचा आंबट आणि उग्र घाण वास येत असलेला साठा मिळून आला. पोलिसांनी कायदेशीर कारवाई करत प्रोव्हिशन गुन्ह्याच्या पुराव्यासाठी प्रत्येक साठ्यातून १८० मिलीचे नमुने (सॅम्पल) काचेच्या बाटलीत काढून घेतले. त्यावर पोलीस आणि पंचांच्या सह्यांचे कागदी लेबल लावून ते जप्त केले. उर्वरित सर्व रसायन वाहतुकीच्या दृष्टीने वाहून नेणे अत्यंत गैरसोयीचे आणि धोकादायक असल्याने पोलिसांनी पंचांसमक्ष जागीच ओतून नष्ट केले.
सरकारतर्फे गुन्हा दाखल; गुन्हेगारांचे धाबे दणाणले!
याप्रकरणी वैराग पोलीस ठाण्याचे पोलीस अंमलदार पोकॉ/७९७ आकाश पवार आणि पोकॉ/१४८३ राहुल पाटील यांनी सरकारतर्फे अधिकृत फिर्याद दिली आहे. सर्व आरोपींविरुद्ध महाराष्ट्र दारूबंदी कायदा कलम ६५ (फ) प्रमाणे वैराग पोलीस ठाण्यात गुन्हे दाखल करण्यात आले आहेत.
नागरिकांकडून कौतुकाचा वर्षाव: नवीन पोलीस निरीक्षक अमूल कादबने यांनी पदभार स्वीकारताच अवघ्या आठ दिवसांत अवैध धंद्यांचे कंबरडे मोडणारी ही मोठी कारवाई केल्याने बार्शी तालुक्यातील अवैध दारू उत्पादकांचे धाबे दणाणले आहेत. वैराग पोलिसांच्या या धडक कामगिरीचे सर्वसामान्य नागरिकांमधून जोरदार स्वागत होत असून, तालुक्यातून अवैध धंदे समूळ नष्ट करण्यासाठी अशाच कडक कारवायांची मालिका पुढेही सुरू राहील, अशी आशा नागरिकांनी व्यक्त केली आहे. या प्रकरणाचा पुढील तपास वैराग पोलीस करत आहेत.
