परळी – आषाढी वारी पंढरपुरकरकडे निघालेल्या पायी दिंड्या गंगाखेड- परळी मार्गावर अधिक संख्येने प्रवास करतात.या मार्गावरील तीन हजार लोकवस्तीच्या निळा या गावात तब्बल एक महिना छोट्या-मोठ्या दिंड्यातील वारकर्यांच्या दुपार व संध्याकाळ महाप्रसादाबरोबरच मुक्कामाची व्यवस्था केली जाते.गावातील प्रत्येक घरातून भाकरी,गव्हाच्या पोळ्या गोळा करुन वारकर्यांना महाप्रसाद दिला जातो.निळा गावकर्यांचा वारकर्यांसाठी असलेला हा गोपाळकाला ४० वर्षांपासून अविरतपणे सुरू आहे.
महाराष्ट्राचे आराध्य दैवत पंढरीच्या पांडुरंगाच्या दर्शनासाठी आषाढी एकादशी निमित्त महाराष्ट्रासह मध्यप्रदेश मधुन पायी दिंड्या नांदेड, परभणी मार्गे परळीहुन पंढरपुरकडे रवाना होत असतात.गंगाखेड ते परळी या मार्गावर या दिंड्या एकवटतात.शेगाव येथील संत गजानन महाराज,संत गुलाबराव महाराज अशा मोठ्या दिंड्यामधील वारकर्यांची सामाजिक कार्यकर्ते व संस्थाकडुन महाप्रसाद आणि मुक्कामाची सोय केली जाते परंतु शेकडोंच्या संख्येने असलेल्या २०० ते एक हजार वारकर्यांचा सहभाग असलेल्या दिंडी साठी फारसे पुढे कोणी येत नाही.या दिंड्यांचे चालक हे काही दिवस अगोदर पालखी मार्गावरील गावात येवुन वारकर्यांसाठी सकाळ,दुपार व रात्रीच्या जेवणाची व्यवस्था करतात.परळीपासुन १५ कि.मी.अंतरावर असलेल्या निळा ता.सोनपेठ येथे आषाढी वारीतील पायी चालणार्या वारकर्यांसाठी तब्बल एक महिनाभर अन्नदानाचा महायज्ञ अविरतपणे सुरू आहे.यामध्ये परभणी, हिंगोली,नांदेड जिल्ह्यासह विदर्भ व मध्य प्रदेशातील दिंड्यांचा समावेश आहे.पंढरपुरकडे निघालेला एकटा वारकरीही निळा या गावातुन उपाशी जात नाही.दहा वारकर्यांच्या दिंडी पासुन दोन हजार वारकरी असलेल्या दिंडी साठी निळा गावकरी एकत्र येत भोजन व मुक्कामाची व्यवस्था करत आहेत.यावर्षीच्या आषाढी पायी सोहळ्यातील निळा गावात दि.१४ जुलै रोजी विदर्भातील पायी दिंडी ही शेवटची मोठी आहे.
गावातून प्रत्येक घर, व्यक्तीचा सहभाग पायी दिंडीतील वारकर्यांच्या व्यवस्थेत निळा गावातील प्रत्येक घर,व्यक्ती सहभागी असतो.वारकर्यांच्या संख्येवर सकाळी न्हाव्याकडुन घरोघरी जाऊन भाकरी,पोळ्या करण्याच्या सुचना केल्यानंतर भजनी मंडळातील सदस्य या भाकरी,पोळ्या एकत्रित करतात.हनुमान मंदिराच्या प्रांगणात वार्षीक सप्ताहातुन उरलेल्या पैशामधुन वरण,भात,भाजी केल्यानंतर हा गोपाळकाला वारकर्यांना दिला जातो.
व्यवस्थेसाठी ३० जणांची टिम गावात येणार्या दिंड्यांची नोंदणी,गावातुन भाकरी जमा करण्यापासुन महाप्रसादानंतर भांडी व परिसराची स्वच्छता यासाठी निळा भजनी मंडळ व गावातील २० ते ३० युवक ज्यांना जसे जमेल तसा सहभाग नोंदवतात.आषाढी वारी करत असलेला एकही वारकरी आपल्या गावातुन उपाशीपोटी जाऊ नये यासाठी निळा गावातील ज्येष्ठांनी ४० वर्षापुर्वी सुरु केलेला अन्नदानाचा हा महायज्ञ एक महिनाभर अविरतपणे सुरु असतो.
