सोलापूर : सोलापूर जिल्ह्याच्या सर्वांगीण विकासासाठी उजनी धरणाचे प्रदूषणमुक्ती अभियान, अत्याधुनिक आयटी पार्क, धार्मिक पर्यटन सर्किट, विमानसेवेचा विस्तार, उड्डाणपूल आणि गुंतवणूकदारांना आकर्षित करण्यासाठी ‘व्हाय सोलापूर?’ या ब्रँडची उभारणी अशा महत्त्वाकांक्षी प्रकल्पांचा रोड मॅप तयार असून हे सर्व प्रकल्प मिशन मोडवर राबविण्यात येणार असल्याची माहिती जिल्हाधिकारी एस. कार्तिकेयन यांनी दिली.
सोलापूर श्रमिक पत्रकार संघाच्या वतीने आयोजित वार्तालाप कार्यक्रमात ते पत्रकारांशी संवाद साधत होते. यावेळी विचारमंचावर जिल्हा माहिती अधिकारी सुनील सोनटक्के, संघाचे अध्यक्ष विक्रम खेलबुडे, राज्य अधिस्वीकृती समितीचे सदस्य प्रमोद बोडके, सरचिटणीस सागर सुरवसे, खजिनदार किरण बनसोडे आदी मान्यवर उपस्थित होते.
उजनी धरणातील वाढते प्रदूषण ही गंभीर समस्या असून पिण्याच्या पाण्याची गुणवत्ता सुधारण्याबरोबरच धरणातील पर्यावरणीय समतोल राखण्यासाठी नियोजनबद्ध उपाययोजना केल्या जातील. कॅट फिश व सकर फिशसारख्या आक्रमक माशांच्या जातींवर नियंत्रण ठेवून देशी माशांच्या संवर्धनालाही प्राधान्य दिले जाणार आहे.सोलापूर जिल्ह्यात धार्मिक पर्यटनाच्या विकासासाठी मोठी क्षमता असून अक्कलकोट, पंढरपूर, बार्शीसह विविध तीर्थक्षेत्रांना जोडणारे ‘रिलिजियस टुरिझम सर्किट’ विकसित करण्याचा आराखडा तयार केला जात आहे. यामुळे पर्यटनासोबत स्थानिक अर्थव्यवस्थेलाही चालना मिळेल, असा विश्वास त्यांनी व्यक्त केला.
आयटी पार्कबाबत बोलताना त्यांनी ‘टर्नकी’ मॉडेलवर भर दिला. होटगी परिसरातील जागा आयटी पार्कसाठी उपलब्ध झाली असून एमआयडीसीमार्फत सर्व पायाभूत सुविधा उभारून कंपन्यांना तयार इमारती उपलब्ध करून देण्याचा प्रयत्न आहे. सोलापूरकडे जमीन, वीज, पाणी आणि प्रशिक्षित मनुष्यबळ ही उद्योगांसाठी आवश्यक चारही बलस्थाने असल्याने आयटी उद्योगांसाठी शहर स्पर्धात्मक ठरू शकते, असे त्यांनी सांगितले.
गुंतवणूक वाढविण्यासाठी केवळ सुविधा पुरेशा नसून सोलापूरचे प्रभावी ब्रँडिंग आवश्यक असल्याचे सांगत त्यांनी ‘व्हाय सोलापूर?’ ही स्वतंत्र गुंतवणूक प्रोत्साहन मोहीम राबविण्यात येणार असल्याचे स्पष्ट केले. यासाठी विशेष इन्व्हेस्टमेंट प्रमोशन कंपनीची मदत घेऊन देशातील विविध औद्योगिक केंद्रांमध्ये सोलापूरची क्षमता मांडली जाणार आहे.
होटगी रोड विमानतळावर नाईट लँडिंगसाठी काही तांत्रिक अडथळे असले तरी बोरामणी विमानतळ प्रकल्पासाठी प्रयत्न सुरू आहेत. सुमारे ४०० कोटी रुपयांच्या या प्रकल्पातून भविष्यात नाईट लँडिंगसह विमानसेवा सुरू होऊ शकते. तसेच शहरातील वाढती वाहतूक लक्षात घेऊन जुना बोरामणी नाका ते पत्रकार भवन मार्गे बाजार समिती–हैदराबाद रोडपर्यंत उड्डाणपूल उभारण्याचा मार्ग मोकळा झाला असून भूसंपादनाची प्रक्रिया अंतिम टप्प्यात आहे.पंढरपूर कॉरिडॉरसाठी राज्य शासनाने मंजुरी दिली असून भूसंपादनाची प्रक्रिया सुरू होणार आहे. आगामी आषाढी वारीत अंध, ज्येष्ठ नागरिक आणि शारीरिकदृष्ट्या अशक्त भाविकांसाठी स्वतंत्र सुलभ दर्शन व्यवस्था उपलब्ध करून देण्याचे नियोजन असल्याचेही त्यांनी सांगितले.
सोलापूर हा राज्यातील लोकसंख्या आणि मतदारसंख्येच्या दृष्टीने पाचव्या क्रमांकाचा जिल्हा असूनही कृषीव्यतिरिक्त रोजगारनिर्मिती करणारे उद्योग अपेक्षित प्रमाणात वाढले नाहीत. त्यामुळे उद्योग, पर्यटन आणि सेवा क्षेत्राच्या माध्यमातून जिल्ह्याचा जीडीपी आणि मानवी विकास निर्देशांक उंचावण्यासाठी प्रशासन प्रयत्नशील असल्याचे त्यांनी स्पष्ट केले.
आषाढी वारीबाबत बोलताना कार्तिकेयन म्हणाले की, श्री विठ्ठल-रुक्मिणी मातेच्या सेवेसाठी वारीच्या काळात स्वतः दहा दिवस उपवास केला. वारकऱ्यांची सेवा करण्याची संधी ही आयुष्यातील मोठी प्रेरणा असल्याची भावनाही त्यांनी व्यक्त केली.
वारी ही प्रशासनाची अग्निपरीक्षा :
वारकऱ्यांनी व्यवस्थापनाचे केले कौतुक
पंढरपूरची आषाढी वारी ही कुंभमेळ्यानंतर जगातील सर्वात मोठी धार्मिक मानवी गर्दी असलेली यात्रा असून यंदा सुमारे ३२ लाख भाविकांनी सहभाग घेतला. एवढी मोठी गर्दी अल्प कालावधीत हाताळणे ही प्रशासनासाठी मोठी अग्निपरीक्षा असते.
वारीच्या नियोजनात सोलापूर आणि पंढरपूरमधील पत्रकारांनी दिलेले सहकार्य मोलाचे ठरल्याचे त्यांनी नमूद केले. विशेष व्हॉट्सॲप यंत्रणा तयार करण्यात आली होती.
वारीचे यश हे कोणत्याही एका व्यक्तीचे नसून संपूर्ण प्रशासकीय यंत्रणेच्या सामूहिक प्रयत्नांचे फलित असल्याचे त्यांनी सांगितले. जिल्हा परिषद, पोलीस प्रशासन, सार्वजनिक बांधकाम विभाग, वाहतूक शाखा, महसूल विभाग आणि इतर सर्व विभागांनी उत्कृष्ट समन्वयाने काम केले. वारीच्या शेवटच्या टप्प्यात अनेक वारकऱ्यांनी स्वतःहून थांबून यंदाच्या व्यवस्थापनाचे कौतुक केले. वारकऱ्यांकडून मिळालेला हा सकारात्मक प्रतिसादच संपूर्ण प्रशासनासाठी सर्वात मोठा सन्मान असल्याची भावना जिल्हाधिकारी कार्तिकेयन यांनी व्यक्त केली.
