श्रीपूरला एमआयडीसीच्या पालकमंत्र्यांच्या घोषणेने आशा पल्लवीत

श्रीपूर – नुकताच माढ्याचे माजी आ.  बबनदादा शिन्दे यांची हृदय रोपणाची शस्त्रक्रिया यशस्वी होऊन ते मायदेशी परतल्यावर माढा तालुक्याच्या वतीने त्यांचा नागरी सत्कार सोलापूर जिल्ह्याचे पालकमंत्री जयकुमार गोरे यांच्या प्रमुख उपस्थितीत पार पडला . यावेळी सोलापूर जिल्हा दूध संघाचे अध्यक्ष रणजितसिंह शिन्दे यांनी माढा मतदार संघांतील प्रलंबीत  कामे मार्गी लावणेची विनंती मंत्री जयाभाऊ यांचे कडे केली . त्यात  श्रीपूरला प्रस्तावित असलेली एमआयडीसी लवकर व्हावी अशी मागणी केली . यावर पालकमंत्री जयाभाऊ यांनी  श्रीपूरच्या एमआयडी चे काम मार्गी लावू असे आश्वासन दिले .
श्रीपूर येथे महाराष्ट्र राज्य शेती महामंडळाची खंडकर्‍यांना देवून सुमारे चार हजार एकर जागा उपलब्ध आहे तसेच अगदी जवळून भिमा नदी वाहते त्यामुळे एमआयडीसी साठी अत्यवश्यक असणारे पाणी उपलब्ध आहे  याबरोबरच याला लागूनच संगम ते वेळापूर क्रॉक्रीट रस्ता होत आहे . सर्वात महत्वाचे म्हणजे ३ ते ४ किमी वरून सोलापूर ते पुणे  हा राष्ट्रीय महामार्ग जात आहे . एकूणच पाणी व दळणवळणाची साधने उपलब्ध असलेने व खुद्द पालकमंत्र्यानीच
आश्वासन दिल्याने एमआयडी बाबत श्रीपूरकरांच्या आशा पल्लवीत झाल्या आहेत .
याभागात एमआयडीसी व्हावी यासाठी विद्यमान माळशिरसचे आ . उत्तमराव जानकर , माढ्याचे आ. अभिजित पाटील,  माळशिरसचे माजी आ. रामभाऊ सातपुते यांनी पाठपुरावा केला . त्या प्रमाणे सोलापूर औद्योगिक विकास महामंडळाचे प्रादेशिक अधिकारी शिवाजी राठोड यांनी शेती महामंडळाचे जमिनीची प्रत्यक्ष पाहणी केली होती. यावेळी भानुदास सालगुडे, सोमनाथ वाघमोडे, शिवसेना (शिन्दे गट ) चे तानाजी भोळे – पाटील,श्रीपूर नगरपंचायतीचे सदस्य तानाजी भगत, सोमनाथ मुंडकणे व उद्योजक महावीर शहा उपस्थित होते .