२२ जानेवारीच्या सोहळ्यासाठी अयोध्या शहर सजले आहे. एकूण सात हजार व्यक्तींना मंदिर न्यासाकडून निमंत्रणे देण्यात आली आहेत. यामध्ये क्रिकेटपटू सचिन तेंडुलकर, विराट कोहली, अभिनेते अमिताभ बच्चन, उद्योगपती मुकेश अंबानी, गौतम अदानी यांचा समावेश आहे. श्रीरामासाठी विविध भागांतून अनेक वस्तू अर्पण केल्या जात आहेत. माता सीतेचे माहेर असलेल्या नेपाळमधील जनकपुरीतून विशेष भेटी पाठवण्यात आल्या आहेत.
अयोध्येमध्ये २२ जानेवारीला होणाऱ्या रामलल्लाच्या प्राणप्रतिष्ठापनेची तयारी अंतिम टप्प्यात आली असून, म्हैसूरचे शिल्पकार अरुण योगीराज यांनी घडवलेली मूर्तीच गाभाऱ्य़ात विराजमान होणार आहे. मंदिर न्यासाचे सरचिटणीस चंपत राय यांनी सोमवारी दिली.
‘नव्याने उभारण्यात आलेल्या श्रीराम मंदिरामध्ये २२ जानेवारी, दुपारी १२ वाजून २० मिनिटांनी रामलल्लाची प्राणप्रतिष्ठा होणार आहे. नवी मूर्ती ही दगडातून घडवण्यात आली असून, त्याचे वजन अंदाजे १५० ते २०० किलोग्रॅम असेल’, असे राय म्हणाले. ‘रामलल्लाच्या घडवण्यात आलेल्या तीन मूर्तींमधून म्हैसूरस्थित योगीराज यांनी तयार केलेल्या मूर्तीची न्यासाकडून निवड करण्यात आली आहे. पाच वर्षे वयाच्या उभ्या असलेल्या रामलल्लांची ही मूर्ती असून, १८ जानेवारीला गर्भगृहातील आसनावर ती विराजमान होईल. मूर्तीच्या प्राणप्रतिष्ठेचा मुहूर्त वाराणसीतील गणेश्वरशास्त्री द्रविड यांनी निश्चित केला असून, काशी आणि अयोध्येतील नागरिकांसाठी ते आदरणीय असे व्यक्तिमत्त्व आहे. प्राणप्रतिष्ठेच्या पवित्र सोहळ्यासाठी धार्मिक विधीच्या प्रक्रियेचे नेतृत्व वाराणसीच्या लक्ष्मीकांत दीक्षित यांच्या नेतृत्वात केले जाईल. द्रविड आणि दीक्षित हे दोघेही पंडित आहेत’, अशी माहिती राय यांनी दिली.
‘२० आणि २१ जानेवारीला मंदिर बंद राहणार असून, २३ जानेवारीपासून ते खुले होईल. प्राणप्रतिष्ठेच्या विधींना आज, मंगळवारपासून सुरुवात होणार असून, २१ जानेवारीपर्यंत ते सुरू राहतील. प्रत्यक्ष प्राणप्रतिष्ठेचा विधी २२ जानेवारीला पार पडेल. रामलल्लाच्या प्राणप्रतिष्ठा होणाऱ्या मूर्तीवर विविध अभिषेक करण्यात येणार आहेत. यात जल, फल, अन्न, औषध, तूप यांचे अभिषेक होणार आहेत. गेली ७० वर्षे पूजन होत असलेली रामलल्लाची मूर्ती नव्या मंदिरातच सुरक्षित ठेवण्यात येणार आहे’, असेही ते म्हणाले.
सात हजार निमंत्रणे
२२ जानेवारीच्या सोहळ्यासाठी अयोध्या शहर सजले आहे. एकूण सात हजार व्यक्तींना मंदिर न्यासाकडून निमंत्रणे देण्यात आली आहेत. यामध्ये क्रिकेटपटू सचिन तेंडुलकर, विराट कोहली, अभिनेते अमिताभ बच्चन, उद्योगपती मुकेश अंबानी, गौतम अदानी यांचा समावेश आहे. श्रीरामासाठी विविध भागांतून अनेक वस्तू अर्पण केल्या जात आहेत. माता सीतेचे माहेर असलेल्या नेपाळमधील जनकपुरीतून विशेष भेटी पाठवण्यात आल्या आहेत. दक्षिण नेपाळमधील वीरगंजही येथूनही मोठ्या संख्येने भेटवस्तू आल्या आहेत. धान्य, कपडे, सुका मेवा, सोने, चांदीही भेट देण्यात आली आहेत. याशिवाय मानसरोवर, अमरनाथ, गंगोत्री, हरिद्वार, प्रयागराज संगम, नर्मदा, गोदावरी, नागशी, गोकर्ण येथून अभिषेकासाठी जल आणण्यात आले आहे.
