बार्शी – येथील मायबोली सांस्कृतिक मंडळाच्यावतीने प्रा. अजितकुमार कोष्टी यांच्या “हसवणूक” या बहारदार कार्यक्रमाचे आयोजन मोरया फंक्शन हॉल इथे नुकतेच करण्यात आले होते.
मुख्य कार्यक्रम सुरु करण्यापूर्वी मायबोलीच्या संस्थापक सदस्या स्व. उषाताई दशरथ यांच्या दु:खद निधनाने त्यांच्या कुटुंबियांवर कोसळलेल्या दु:खद प्रसंगावर मायबोलीतर्फे शोकसंदेशपर हळूवार फुंकर घातली गेली . डॉ प्रशांत मोहिरे यांनी हा शोकसंदेश वाचून दाखवला. त्यानंतर जितेंद्र माढेकर यांनी स्व. उषाताई दशरथ यांच्या शोकसभेतील वृत्तांत व त्यांच्या आठवणी नमूद केल्या. त्यानंतर सर्व सभासदांनी उभे राहून स्व. उषाताईंना श्रध्दांजली अर्पण केली .
त्यानंतर मुख्य कार्यक्रमास प्रारंभ झाला. मोरया फंक्शन हॉलमध्ये झालेल्या या कार्यक्रमाला मायबोलीच्या रसिक सभासदांची उस्फूर्त दाद मिळाली. आपल्या ओघवत्या विनोदी शैलीत प्रा. अजितकुमार कोष्टी यांनी बार्शीकर रसिकांना खळखळून हसवले. अधूनमधून प्रेक्षकांना थोडे प्रेमळ चिमटे काढत त्यांनी त्यांचे लोकप्रिय पात्र “आमचं गण्या” शेवटपर्यंत खुलवत नेले . गण्याचे किस्से ऐकून बार्शीकर अगदी लोटपोट झाले .
कार्यक्रमाची सुरुवात मायबोलीचे संस्थापक अध्यक्ष स्व. विजयकुमार माढेकर आणि संतश्रेष्ठ ज्ञानेश्वर माऊली यांच्या प्रतिमांचे पूजन करुन आणि दीप प्रज्वलन करुन झाली. सचिव डॉ. प्रशांत मोहिरे यांनी प्रास्ताविक केले. खजिनदार व्यंकटेश कुलकर्णी यांनी पाहुण्यांचा परिचय करुन दिला. याप्रसंगी उपाध्यक्ष जवाहर माढेकर यांनी पाहुण्यांना सन्मानित केले. तसेच अनिल बंडेवार यांनी मायबोलीला अंशत: प्रायोजित केल्याबद्दल त्यांचाही सत्कार सुनिल पाटील यांच्या हंस्ते करण्यात आला. आभार प्रदर्शन राजेंद्र श्रीश्रीमाळ यांनी केले. कार्यक्रमाचे सूत्रसंचालन पल्लवी माढेकर यांनी केले. यावेळी व्यासपीठावर मायबोलीचे संचालक अरुण शहा, जितेंद्र माढेकर, सुनील पाटील आदी मान्यवर उपस्थित होते. कार्यक्रमाची सांगता चैत्री एकादशीच्या फराळाने झाली. कार्यक्रमाच्या यशस्वीतेसाठी मुकुंदराज कुलकर्णी, व्यंकटेश कुलकर्णी, निलेश माढेकर, केटरर्स स्वामी, आग्रे, उमेश अक्कलकोटे, सोलापूरचे गुरु वठारे यांनी परिश्रम घेतले.
