सोलापूर : सोलापूर महानगरपालिका सार्वत्रिक निवडणूक 2025 अंतर्गत 15 जानेवारी 2026 रोजी होणाऱ्या मतदानाच्या पार्श्वभूमीवर आज दि. 22 डिसेंबर 2025 रोजी मतदान केंद्रे व मतमोजणी केंद्रांवरील सुविधांसह निवडणूक प्रक्रियेच्या विविध टप्प्यांबाबत दुसरी समन्वय बैठक महापालिकेचे आयुक्त तथा निवडणूक निर्णय अधिकारी डॉ. सचिन ओम्बासे यांच्या अध्यक्षतेखाली घेण्यात आली. निवडणूक यशस्वीपणे पार पाडण्यासाठी प्रशासनास सहकार्य करण्याची तयारी सर्व राजकीय पक्षांनी दर्शविली.
या बैठकीत मतदान केंद्रांवरील मूलभूत सुविधा, मतदारांसाठी सोयी, सुरक्षा व्यवस्था तसेच मतमोजणी केंद्रांवरील नियोजन यावर चर्चा करण्यात आली. यासोबतच नामनिर्देशन अर्ज भरण्याची प्रक्रिया, अर्जांची छाननी, निवडणूक जाहिरातींसाठीचे नियम, तसेच कॉर्नर सभा व प्रचार कार्यक्रम राबविताना घ्यावयाची परवानगी व आचारसंहितेचे पालन याबाबत उपस्थित राजकीय पक्षांच्या प्रतिनिधींना सविस्तर मार्गदर्शन करण्यात आले. ही बैठक सकारात्मक वातावरणात पार पडली. या बैठकीचे सूत्रसंचालन उपायुक्त आशिष लोकरे यांनी केले.
यावेळी आयुक्त डॉ. सचिन ओम्बासे यांनी स्पष्ट केले की, अर्ज भरणे व अर्ज छाननी ही प्रक्रिया पूर्णतः पारदर्शक पद्धतीने पार पडेल. कोणतीही अपूर्ण माहिती किंवा नियमबाह्य बाब आढळल्यास नियमानुसार कारवाई करण्यात येईल. तसेच जाहिराती व कॉर्नर सभा घेण्यासाठी महापालिकेची पूर्वपरवानगी आवश्यक असून, निर्धारित वेळ, ठिकाण व ध्वनीमर्यादांचे काटेकोर पालन करणे बंधनकारक राहील.राजकीय पक्षांचे प्रतिनिधी व निवडणूक निर्णय अधिकारी यांनी परस्पर समन्वय साधून निवडणूक प्रक्रिया शांततामय व सुरळीत पार पाडावी, असे निर्देश आयुक्तांनी दिले. कोणत्याही प्रकारचा नियमभंग होणार याची दक्षता घ्यावी , असेही त्यांनी स्पष्ट केले.
शासकीय किंवा खाजगी शाळांमधील शिक्षकांनी प्रचारात सहभाग घेतला तर सर्वोच्च न्यायालयाच्या मार्गदर्शक तत्त्वानुसार कारवाई करण्यात येणार असल्याचे यावेळी स्पष्ट करण्यात आले. या निवडणुकीसाठी एकूण 1 हजार 118 मतदान केंद्र असणार आहेत. महापालिकेच्या बीएलओ कडून सर्व मतदारांना स्लिपा वाटप करण्यात येणार असल्याचेही उपायुक्त आशिष लोकरे यांनी सांगितले.
यावेळी अतिरिक्त आयुक्त वीणा पवार, अतिरिक्त आयुक्त संदीप कारंजे,उपायुक्त आशिष लोकरे, मुख्य लेखा अधिकारी डॉ. रत्नराज जवळगेकर, उपजिल्हाधिकारी, रो.ह.यो. अंजली मरोड,उपजिल्हाधिकारी, भूसंपादन अभिषेक देशमुख,उपविभागीय अधिकारी सदाशिव पडदुणे, उपविभागीय अधिकारी, भैरप्पा माळी,उपविभागीय अधिकारी, विजया पांगारकर, उपविभागीय अधिकारी सचिन इथापे,उपविभागीय अधिकारी, जयश्री आव्हाड, सहायक आयुक्त गिरीष पंडित यांच्यासह विविध राजकीय प्रतिनिधी उपस्थित होते.
श्री सिद्धेश्वर यात्रा संदर्भात विषय निवडणूक आयोगाकडे मांडला
महापालिका निवडणूक प्रक्रिया दरम्यानच श्री सिद्धेश्वर यात्रा आहे. यामुळे ही निवडणूक आठ दिवस पुढे ढकलावी अशी सूचना एका प्रतिनिधींनी मांडली. याबाबत लेखी मागणीही करण्यात आली असल्याचे सांगण्यात आले. या संदर्भात निवडणूक आयोगासमोर हा मुद्दा मांडण्यात आला आहे. त्यांच्या आदेशानुसार पुढील कार्यवाही करण्यात येईल, असे या बैठकीत उपायुक्त आशिष लोकरे यांनी स्पष्ट केले.
