धाराशिव : उस्मानाबाद-लातूर-बीड स्थानिक प्राधिकारी मतदारसंघाच्या विधान परिषद निवडणुकीत भाजपचे उमेदवार बसवराज माधवराव पाटील यांनी दणदणीत विजय मिळवत महायुतीचे वर्चस्व पुन्हा एकदा अधोरेखित केले आहे. अंतिम निकालानुसार माजी मंत्री बसवराज पाटील यांना 844 मते मिळाली, तर काँग्रेसचे उमेदवार महेश माणिकराव देशमुख यांना 125 मते मिळाली. त्यामुळे पाटील यांनी तब्बल 719 मतांच्या विक्रमी फरकाने विजय संपादन केला.
धाराशिव येथील भाई उद्धवराव पाटील शासकीय औद्योगिक प्रशिक्षण संस्था (आयटीआय), तुळजापूर रोड येथे मतमोजणी प्रक्रिया पार पडली. जिल्हाधिकारी तथा निवडणूक निर्णय अधिकारी किर्ती किरण पुजार यांच्या मार्गदर्शनाखाली मतमोजणी शांततापूर्ण व पारदर्शक वातावरणात पूर्ण झाली.
निवडणुकीत एकूण 983 मतपत्रिका प्राप्त झाल्या. त्यापैकी 14 मते अवैध ठरली, तर 969 मते वैध ठरली. वैध मतांपैकी बसवराज पाटील यांनी 844 मते मिळवत एकहाती वर्चस्व सिद्ध केले.या निवडणुकीकडे केवळ एका जागेच्या विजय-पराभवाच्या दृष्टीने नव्हे, तर मराठवाड्यातील राजकीय शक्तीपरीक्षेच्या रूपात पाहिले जात होते.
स्थानिक स्वराज्य संस्थांतील लोकप्रतिनिधींनी दिलेला कौल आगामी राजकीय घडामोडींसाठी महत्त्वाचा मानला जात असल्याने या निवडणुकीकडे राज्याचे लक्ष लागले होते. महायुतीने निवडणुकीपूर्वीच आपले संख्याबळ भक्कम असल्याचा दावा केला होता. निकालाने हा दावा प्रत्यक्षात सिद्ध झाल्याचे दिसून आले.
मतदानापूर्वी दोन्ही आघाड्यांकडून मतदारांना एकत्र ठेवण्यासाठी विविध रणनीती राबविण्यात आल्या होत्या. अनेक दिवस चाललेल्या बैठका, संपर्क मोहिमा आणि राजकीय हालचालींमुळे ही निवडणूक विशेष चर्चेत राहिली होती. मात्र निकालात बसवराज पाटील यांना मिळालेल्या प्रचंड मताधिक्याने विरोधकांना मोठा धक्का बसल्याची चर्चा राजकीय वर्तुळात सुरू आहे.
उस्मानाबाद, लातूर आणि बीड जिल्ह्यांतील स्थानिक स्वराज्य संस्थांचे सदस्य या निवडणुकीतील मतदार होते. नगरपरिषद, नगरपालिका, जिल्हा परिषद, पंचायत समिती तसेच इतर स्थानिक संस्थांतील लोकप्रतिनिधींनी मतदानाचा हक्क बजावला.
निकाल जाहीर होताच धाराशिव, लातूर आणि बीड जिल्ह्यांमध्ये महायुतीच्या कार्यकर्त्यांनी जल्लोष केला. फटाक्यांची आतषबाजी, मिठाई वाटप आणि घोषणाबाजी करत विजयाचा आनंद साजरा करण्यात आला. विविध पदाधिकारी व कार्यकर्त्यांनी बसवराज पाटील यांचे अभिनंदन केले.
या विजयाकडे केवळ एका उमेदवाराचा विजय म्हणून न पाहता महायुतीच्या संघटनात्मक ताकदीचा, स्थानिक पातळीवरील प्रभावाचा आणि राजकीय बळाचा पुरावा म्हणून पाहिले जात आहे. आगामी स्थानिक स्वराज्य संस्था, जिल्हा परिषद आणि इतर निवडणुकांच्या पार्श्वभूमीवर या निकालाचे राजकीय परिणाम दूरगामी ठरण्याची शक्यता व्यक्त केली जात आहे.
मराठवाड्याच्या राजकारणात महत्त्वपूर्ण मानल्या जाणाऱ्या या निवडणुकीत बसवराज पाटील यांनी नोंदविलेला विक्रमी विजय हा महायुतीसाठी मोठा राजकीय संदेश मानला जात असून, या निकालाने प्रदेशातील राजकीय समीकरणांवर नव्याने शिक्कामोर्तब केल्याचे बोलले जात आहे.
