अकोला : मराठा आरक्षणासाठी लढा देणारे मनोज जरांगे-पाटील यांची आज अकोला जिल्ह्यातील पातुर तालुक्यातल्या चरणगावात जाहीर सभा झाली. या जाहीर सभेत जरांगेंनी सरकारवर गंभीर आरोप केले आहेत. तसेच छगन भुजबळ यांच्यावर पुन्हा टीका केली आहे. “हा दोन जातीत दंगल भडकवायला लागलाय. मराठा ओबीसीतच आहे हे माहिती झाल्याने तो दंगल भडकावण्याचे प्रयत्न करतोय. त्याचं स्वप्नं पूर्ण होऊ देऊ नका”, अशी जहरी टीका जरांगे पाटील यांनी केली. त्याचवेळी धनगरांनी भुजबळांना पाठिंबा देऊ नये, असे आवाहनही त्यांनी केलं.
जरांगे पाटील भाषणाच्या सुरुवातीला म्हणाले की, “आज अकोल्यातील एवढ्या छोट्या गावात एवढी गर्दी होतेय ही अभिमानाची गोष्ट आहे. आरक्षण असलेले मराठेही आज ताकदीने या आंदोलनात सोबत येत आहेत, हा सरकारसाठी इशाराच आहे. दरम्यान आरक्षण असलेल्या मराठ्यांनी आरक्षण नसलेल्या भावांसाठी समोर यावं. राजकीय फायद्यासाठी राजकीय नेते आपल्यात उभी फूट पाडायचा प्रयत्न करतील असं होऊ देऊ नका”
छगन भुजबळांवर टीका करत जरांगे म्हणाले की, “तो छगन भुजबळ स्वत:ला ओबीसींचा नेता मानतो. ओबीसींमधील छोट्या जातींवर तो अन्याय करतो. दरम्यान ओबीसी आरक्षणातील छोट्या जातींचे २९ नेते मला भेटलेत. ते भुजबळांना आपला नेता मानत नाहीत. भुजबळ ओबीसींचं एकटंच खातोय. इतकेच नव्हे तर भुजबळांना त्यांच्या सभेसाठी गर्दी जमवण्यासाठी धनगर आणि इतर लागतात. पण त्यांच्या आरक्षणावर बोलत नाही. त्यामुळे धनगरांनी भुजबळांच्या मागे राहू नये”.
भुजबळांच्या मांडीला मांडी लावून बसणं म्हणजे राज्यात दंगे उसळवणं
दरम्यान, अंबडला याने सर्व जातीचे लोक बोलवले. परंतु मुंबईला जाईपर्यंत धनगर आणि ओबीसींचं चार नेते फुटले. याच्या मांडीला मांडी लावून बसणं म्हणजे राज्यात दंगे उसळवणं आणि राजकीय कारकीर्द पणाला लावणं, अशी टीका करताना जरांगे पाटलांनी भुजबळांचा एकेरी उल्लेख केला. ओबीसी प्रवर्गात मराठा समाजाचा समावेश हे सरकारसाठी कर्मप्राप्त आहे, असंही ठामपणे जरांगे
आम्हाला ओबीसी आरक्षणात का येऊ द्यायचं नाही?
आज खानदेशी आणि विदर्भातील मराठ्यांना यात उतरण्याची विनंती आहे, आम्ही तुमचं काय पाप केलंय. तुम्हाला आम्हाला का ओबीसी आरक्षणात येऊ द्यायचं नाही. भुजबळांनी कितीही आडवा आलं तरी आम्ही आमचं आरक्षण घेतल्याशिवाय राहणार नाही. आज सुरू असलेलं भुजबळांचं षडयंत्र मोडून काढणार आहोत, असंही ते म्हणाले.
मराठ्यांच्या एकजुटीचा विजय
आतापर्यंत ३५ लाख कुणबी नोंदी मिळाल्या आहेत. याच आधारावर मराठा समाजाला आरक्षण मिळावं याचा कायदा २४ डिसेंबरला पारीत होणार असल्याचे ते म्हणाले. दिलेल्या शब्दाला जागा आणि लिहून दिलेल्या आश्वासनांत बदल केला तर सुट्टी देणार नाही. आरक्षण असलेल्या मराठ्यांनी आमच्या मदतीला यावं. दरम्यान मराठ्यांच्या नोंदी असतांना त्यांना आरक्षण मिळू दिलं नाही. आता नोंदी मिळू लागल्यात हा मराठ्यांच्या एकजुटीचा हा विजय आहे, असंही त्यांनी नमूद केलं.
सरकारचं माझ्याविरोधात षडयंत्र
सरकारने माझ्याविरोधात अनेक षडयंत्र रचली आहेत. माझी तपासणी करणाऱ्या डॉक्टरने मला एक किडनी नसल्याची चुकीची माहिती दिली आहे. सरकारचे मंत्री रात्री मुंबईत बसून मला फसवायचा डाव रचायचे, असा जरांगे पाटलांनी गंभीर आरोप केला आहे.
