मंगळवेढा – मंगळवेढा महावितरणकडून उचेठाण फिडरवरील ग्राहकांना वारंवार ‘इमर्जन्सी लोडशेडिंग’चा संदेश पाठवून सिंगल फेज वीजपुरवठा अनिश्चित काळासाठी बंद ठेवला जात असल्याने नागरिकांमध्ये तीव्र नाराजी आहे. वरिष्ठ कार्यालयाकडून पुढील आदेश येईपर्यंत पुरवठा बंद राहील आणि पुरवठा सुरू होण्याची वेळ सांगता येणार नसल्याचे संदेशात नमूद करण्यात येत आहे.
महावितरणकडून पाठविण्यात येणाऱ्या संदेशानुसार, वरिष्ठ कार्यालयाकडून Emergency Load Shedding (ELS) लागू झाल्याने सिंगल फेज सप्लाय बंद करण्यात आला आहे. वरिष्ठ कार्यालयाकडून वीजपुरवठा सुरू करण्याचे आदेश प्राप्त होताच पुरवठा पूर्ववत करण्यात येईल, असेही ग्राहकांना कळविण्यात आले आहे.
मात्र, वीजपुरवठा बंद राहण्याचा निश्चित कालावधी दिला जात नसल्याने घरगुती ग्राहक, लहान व्यावसायिक, विद्यार्थी, पाणीपुरवठ्यावर अवलंबून असलेले नागरिक आणि ग्रामीण भागातील कुटुंबांची गैरसोय होत आहे. विशेषतः सायंकाळच्या वेळेत सिंगल फेज पुरवठा खंडित झाल्यास पिण्याच्या पाण्याच्या मोटारी, घरगुती उपकरणे, मोबाईल चार्जिंग तसेच विद्यार्थ्यांच्या अभ्यासावर परिणाम होत असल्याच्या तक्रारी नागरिकांकडून होत आहेत.
राज्यात अचानक विजेची मागणी वाढल्यास वरिष्ठ कार्यालयाच्या आदेशानुसार कृषी आणि गावठाण फिडरचा पुरवठा तात्पुरता बंद ठेवावा लागू शकतो, असे वृत्त इतर भागातील इमर्जन्सी लोडशेडिंगच्या पार्श्वभूमीवर समोर आले आहे. मात्र मंगळवेढा परिसरात उचेठाण फिडरबाबत वारंवार असे संदेश येत असल्याने, महावितरणने वीजखंडितीचा कालावधी, कारणे आणि पर्यायी नियोजन याबाबत स्पष्ट माहिती द्यावी, अशी मागणी ग्राहकांनी केली आहे.
नागरिकांनी वीजपुरवठ्याबाबतची तक्रार महावितरणच्या टोल-फ्री क्रमांक 1800-233-3435, 1800-102-3435 अथवा 1912 वर नोंदवून तक्रार क्रमांक घ्यावा, असे ग्राहकहिताच्या दृष्टीने आवाहन करण्यात येत आहे.
