सोलापूर – बार असोसिएशनचे माजी अध्यक्ष, विधीक्षेत्रातील एक प्रख्यात व्यक्तिमत्त्व, सर्वांचे गुरुवर्य व मार्गदर्शक ॲड. व्ही. एस. आळंगे यांना बार कौन्सिल ऑफ महाराष्ट्र व गोवा तर्फे दिला जाणारा अत्युच्च, मानाचा व प्रतिष्ठेचा “सिनियर ॲडव्होकेट” हा सर्वोच्च सन्मान प्रदान करण्यात आला आहे. हा मानाचा पुरस्कार भारताचे माजी मुख्य न्यायमूर्ती भूषण गवई यांच्या शुभहस्ते प्रदान होऊन ॲड. आळंगे सरांचा गौरव करण्यात आला. या ऐतिहासिक, अभिमानास्पद व गौरवपूर्ण प्रसंगाचे औचित्य साधून सोलापूर बार असोसिएशनच्या वतीने दि. ४ फेब्रुवारी २०२६ रोजी सोलापूर बार असोसिएशन हॉल, सोलापूर येथे भव्य अभिनंदन व गौरव समारंभाचे आयोजन करण्यात आले होते.
या कार्यक्रमास प्रमुख उपस्थिती म्हणून सोलापूर जिल्ह्याचे सरकारी वकील डॉ. ॲड. प्रदीपसिंग रजपूत हे उपस्थित होते. तसेच सोलापूर बार असोसिएशनचे अध्यक्ष ॲड. बाबासाहेब जाधव, उपाध्यक्ष ॲड. रियाज शेख, सचिव ॲड. बसवराज हिंगमिरे, सहसचिवा ॲड. मीरा प्रसाद, खजिनदार ॲड. अरविंद देडे हे मान्यवर मंचावर उपस्थित होते.
या प्रसंगी अध्यक्ष ॲड. बाबासाहेब जाधव तसेच प्रमुख पाहुणे डॉ. ॲड. प्रदीपसिंग रजपूत यांच्या हस्ते ॲड. व्ही. एस. आळंगे सरांचा शाल, पुष्पगुच्छ देऊन औपचारिक सत्कार करण्यात आला. यानंतर ॲड. आळंगे सरांच्या सर्व जूनियर वकिलांनीही सामूहिकरीत्या आपल्या गुरुवर्यांचा विशेष सत्कार करून कृतज्ञतेची भावना व्यक्त केली.
आपल्या कारकिर्दीत आळंगे सरांकडून मिळालेल्या मार्गदर्शनामुळेच न्यायालयीन क्षेत्रात स्वतःला घडवता आले, असे भावनिक मनोगत अनेक जूनियर वकिलांनी व्यक्त केले.
या गौरव समारंभात ॲड. सरोजिनी तमशेट्टी मॅडम, ॲड. शिवानंद गंजी, ॲड. मैत्रेयी सोलनकर, ॲड. राजेंद्र फताटे, ॲड. हिराचंद अंकलगी, ॲड. विक्रमसिंग काटुळे, ॲड. महादेव जवळगी, ॲड. अशोक जालादी, ॲड. लक्ष्मण मारडकर, उपाध्यक्ष ॲड. रियाज शेख, डॉ. ॲड. प्रदीपसिंग रजपूत तसेच अध्यक्ष ॲड. बाबासाहेब जाधव यांनी आपापल्या मनोगतातून ॲड. आळंगे सरांच्या प्रदीर्घ, निष्ठावंत व आदर्श कायदेविषयक कारकिर्दीचा गौरव केला. त्यांनी न्यायालयीन शिस्त, प्रामाणिकपणा, घटनात्मक मूल्यांप्रती असलेली निष्ठा व सामाजिक भान या गुणांचा विशेष उल्लेख केला.
कार्यक्रमाच्या शेवटी ॲड. व्ही. एस. आळंगे सरांनी स्वतः उपस्थितांना मार्गदर्शनपर मनोगत व्यक्त केले. आपल्या भाषणात त्यांनी विधी व्यवसाय हा केवळ उपजीविकेचे साधन नसून समाजातील दुर्बल घटकांना न्याय देण्याचे प्रभावी माध्यम असल्याचे सांगितले. तरुण वकिलांनी सातत्यपूर्ण अभ्यास, संयम, नैतिकता व न्यायालयाविषयी आदर ठेवावा, तसेच ज्येष्ठांकडून शिकण्याची वृत्ती कायम ठेवावी, असा मोलाचा संदेश त्यांनी दिला. त्यांचे मनोगत उपस्थित वकिलांसाठी अत्यंत प्रेरणादायी ठरले.
या संपूर्ण कार्यक्रमाचे सूत्रसंचालन सोलापूर बार असोसिएशनचे सचिव ॲड. बसवराज हिंगमिरे यांनी केले. या गौरव समारंभास सोलापूर बार असोसिएशनचे असंख्य ज्येष्ठ व कनिष्ठ वकील मोठ्या संख्येने उपस्थित होते. यामध्ये ॲड. व्ही. पी. शिंदे, ॲड. रविंद्र पाटील, ॲड. मनोज पामुल, ॲड. विद्यवंत पांढरे, ॲड. अभय बिराजदार, ॲड. मल्लीनाथ पाटील, ॲड. शुभम माने, ॲड. सागर स्वामी, ॲड. भारत उजळंबे, ॲड. शर्मिला देशमुख, ॲड. नंदिनी किणीकर, ॲड. गणेश माशाळे, ॲड. संतोष म्हमाणे, ॲड. संजय पवार, ॲड. विनयकुमार कटारे, ॲड. निदा सैफन, ॲड. अंजली बाबरे, ॲड. चंद्रसेन गायकवाड आदींचा समावेश होता.
सोलापूर बार असोसिएशनच्या नेतृत्वाखाली संपन्न झालेला हा गौरव समारंभ विधीक्षेत्रातील आदर्श परंपरेचे दर्शन घडवणारा, प्रेरणादायी व ऐतिहासिक ठरला.
