आर्थिक गैरव्यवहार आणि देशद्रोह्यांशी संबंधित असल्याच्या आरोपाप्रकरणी जामिनावर असलेले राष्ट्रवादी काँग्रेसचे नेते नबाव मलिक यांच्या महायुती सरकारमधील सहभागावरुन उपमुख्यमंत्री देवेंद्र फडणवीस यांनी विरोध केला होता. त्यामुळे अजित पवार गटाची कोंडी झाल्याने दादा गट बॅकफूटवर गेला आहे.
आर्थिक गैरव्यवहार आणि देशद्रोह्यांशी संबंधित असल्याच्या आरोपाप्रकरणी जामिनावर सुटका झालेले राष्ट्रवादी काँग्रेसच्या अजित पवार गटाचे समर्थक आमदार नवाब मलिक यांच्याबाबत पक्षाला शुक्रवारी दिवसभरात ठोस भूमिका मांडता आलेली नाही. मलिक यांना महायुतीत सहभागी करून घेण्यास गुरुवारी उपमुख्यमंत्री देवेंद्र फडणवीस यांनी कडाडून विरोध केला होता. त्यामुळे ऐन विधिमंडळ अधिवेशनामध्ये अजित पवार गटाची कोंडी झाली असून हा गट काहीसा बॅकफूटवर गेल्याचे पाहायला मिळाले.
नवाब मलिक यांनी जवळपास २२ महिन्यांनंतर विधानसभेमध्ये पाऊल ठेवताना सत्ताधारी बाके निवडली. त्यामुळे विरोधी पक्षांनी देवेंद्र फडणवीस यांना घेरण्याचा प्रयत्न केला. या पार्श्वभूमीवर फडणवीस यांनी गुरुवारी अजित पवार यांना पत्र लिहिले. ‘सत्ता येते आणि जाते. पण सत्तेपेक्षा देश महत्त्वाचा आहे. मलिक यांच्यावरील आरोप सिद्ध न झाल्यास आपण त्यांचे जरूर स्वागत करावे. मात्र, अशा प्रकारचे आरोप असताना मलिक यांना महायुतीचा भाग करणे योग्य होणार नाही’, अशा शब्दांत फडणवीस यांनी अजित पवार गटाचे कान टोचले.
फडणवीस यांच्या या पत्रानंतर नवाब मलिक यांच्यासंदर्भात नेमकी काय भूमिका घ्यावी, याबाबत अजित पवार गटात शुक्रवारी दिवसभर संभ्रम होता. त्यामुळे नवाब मलिकप्रश्नी भाजपने घेतलेल्या भूमिकेला राष्ट्रवादीकडून स्पष्ट उत्तर देण्यात आले नाही. यासंदर्भात अजित पवार यांना प्रसारमाध्यमांनी प्रश्न विचारले असता, ‘देवेंद्र फडणवीस यांनी पाठवलेले पत्र मिळाले आणि मी ते वाचले आहे. आम्ही म्हणजे राष्ट्रवादी काँग्रेसने २ जुलैला महायुतीसोबत सत्तेत जाण्याचा निर्णय घेतला आणि आम्ही सरकारमध्ये सहभागी झालो. बऱ्याच राजकीय घडामोडी घडल्यानंतर मलिक गुरुवारी पहिल्यांदा सभागृहात आले. यासंदर्भात नवाब मलिक यांनी स्वत:ची भूमिका स्पष्ट केलेली नाही. त्यांनी आपली भूमिका स्पष्ट केल्यानंतर आम्ही पक्षाची भूमिका मांडू. त्यामुळे त्यांचे मत आम्हाला स्पष्टपणे कळू द्या’, असे पवार यांनी सांगितले. अजित पवार यांच्या या सौम्य उत्तरामुळे त्यांचा गट बॅकफूटवर गेल्याचे पाहायला मिळाला.
पत्रामुळे राष्ट्रवादीची नाराजी
फडणवीस यांनी नवाब मलिक यांच्या बाबतीत समाजमाध्यमावर प्रसारित केलेल्या पत्राची अजित पवार गटाच्या आमदारांना कल्पना नव्हती. त्यामुळे पवार गटात नाराजी असल्याचे पाहायला मिळते. ‘नवाब मलिक यांच्याबाबत अजित पवार किंवा अन्य नेत्यांशी बोलून वाद टाळता आला असता. शिवाय ते सभागृहात आल्यानंतर त्यांना बसण्यासाठी कुठे जागा द्यायची, याबाबत चर्चा करून निर्णय घ्यायला हवा होता’, असे मत अजित पवार गटाच्या एका ज्येष्ठ मंत्र्याने व्यक्त केले.
