वसमत / हिंगोली : वसमत नगरपालिका निवडणुकीची आचारसंहिता लागू झाल्यानंतर शहरातील राजकीय घडामोडींना वेग आला आहे. नगराध्यक्षपदासाठीची लढत चुरशीची ठरण्याचे संकेत मिळत असून शहरातील वातावरण तापले आहे. निवडणूक शांततेत पार पाडण्यासाठी पोलिस प्रशासनाची भूमिका यंदा अधिक महत्त्वाची ठरणार आहे.
निवडणूक काळात अनधिकृत प्रचार, दबाव तंत्र, शक्तीप्रदर्शन, आर्थिक प्रलोभने, तसेच सोशल मीडियावरील भ्रमनिर्मिती यावर नियंत्रण ठेवणे ही पोलिसांची प्राथमिक जबाबदारी आहे. शहरातील काही भाग पूर्वी तणावग्रस्त राहिल्याने या परिसरात गस्त वाढवणे, नाकाबंदी, सीसीटीव्हीद्वारे देखरेख आणि तक्रारींवर तत्काळ प्रतिसाद यावर विशेष भर दिल्याचे प्रशासनाच्या सूत्रांकडून कळते.याच पार्श्वभूमीवर अनुभवी आणि सक्षम पोलीस निरीक्षकाची उपस्थिती अत्यावश्यक असल्याचे स्थानिक पातळीवरून वारंवार अधोरेखित केले जात आहे. निवडणुकीसारख्या संवेदनशील काळात परिस्थितीचे अचूक भान ठेवून निर्णयक्षमतेने मार्गदर्शन करणारा अधिकारी असणे शांतता राखण्याची किल्ली ठरते, असे मत व्यक्त केले जात आहे.त्याचबरोबर, महिला पोलीस अधिकाऱ्यांची उपस्थितीही तितकीच महत्त्वाची असल्याचे जाणकारांचे मत आहे.
महिलांशी संबंधित तक्रारी, मतदान केंद्रांवरील संवेदनशील परिस्थिती, तसेच महिला मतदारांसमोरील अडचणी समजून घेऊन त्वरित कारवाई करण्यासाठी महिला अधिकाऱ्यांची भूमिका निर्णायक ठरते. आचारसंहिता काळात महिलांविरोधातील कोणत्याही प्रकारच्या दडपशाही, धमकी किंवा अवांछित वर्तनावर नियंत्रण ठेवण्यासाठी महिला अधिकाऱ्यांची सक्रिय भूमिका गरजेची असल्याचे नागरिकांकडूनही व्यक्त होत आहे.
निवडणुकीदरम्यान पोलिस दलाची तटस्थता, वेळेवर प्रतिसाद, सक्षम नेतृत्व आणि महिला पोलिसांची सहभागिता या चार घटकांवर संपूर्ण प्रक्रिया सुरळीत राहणार की नाही, हे मोठ्या प्रमाणावर अवलंबून आहे.वसमतच्या या चुरशीच्या निवडणुकीत पुढील काही दिवस कायदा-सुव्यवस्थेची शाश्वती राखण्यासाठी पोलिसांची कृती आणि नियोजनाकडे सर्वांचे लक्ष केंद्रीत झाले आहे.
