सोलापूर : तुळजापूर रोडवरील कचरा डेपोतील दोन मोठ्या ढिगार्यांना सोमवारी दुपारी भीषण आग लागली. य वाढत्या तापमानामुळे आणि अतिउष्णतेमुळे ही आग लागल्याचा प्राथमिक अंदाज प्रशासनाने व्यक्त केला आहे.
दुपारी ४.२२ वाजता कचरा डेपोला आग लागल्याचा कॉल अग्निशमन दलाला प्राप्त होताच अग्निशमन दलाचे पथक तातडीने घटनास्थळी दाखल झाले. ८ एकरच्या या विस्तीर्ण परिसरात असलेल्या कचऱ्याच्या ढिगाऱ्यांपैकी दोन मोठ्या ढिगाऱ्यांनी पेट घेतल्याने परिसरात धुराचे लोट पसरले होते. अग्निशमन दलाच्या ५ गाड्या घटनास्थळावर आग विझवण्यासाठी सक्रिय कार्यरत आहेत.सायंकाळी ६.४५ पर्यंत एकूण १५ गाड्या पाण्याचा फवारा मारून आगीवर नियंत्रण मिळवण्याचा प्रयत्न करण्यात आला, लवकरच ही आग आटोक्यात आणण्याचा आमचा प्रयत्न आहे, अशी माहिती अग्निशामक दलाचे अधीक्षक राकेश साळुंखे यांनी दिली. अधीक्षक राकेश साळुंखे हे घटनास्थळी तळ ठोकून होते.
कचऱ्याच्या ढिगार्यांमध्ये मिथेन हा वायू असतो. हा मिथेन वायू साधारण ४० ते ४३ अंश सेल्सिअस तापमानामध्ये पेट घेतो. सोलापूर शहरातील तापमान आज ४०.८ अंश सेल्सिअस वर असल्याने आग लागली असण्याची शक्यता वर्तवली जात आहे.
४ वर्षांपूर्वी लागली याच दिवशी आग
तुळजापूर रोडवरील कचरा डेपो मध्ये ४ मे २०२२ रोजीच उष्णतेमुळे आग लागल्याची घटना घडली होती. २५ दिवसांच्या अथक प्रयत्नानंतर ७० टक्के आग विझवण्यात प्रशासनाला त्यावेळी यश आले होते. त्यानंतर दोन वर्षांपूर्वी म्हणजे सन २०२४ च्या मे महिन्यात देखील आगीची घटना घडली होती. आतापर्यंत डेपोला ३१ वेळा आग लागल्याच्या घटना घडल्या आहेत.
अतिउष्णतेमुळे ही आग लागली असावी : अधीक्षक राकेश साळुंखे
अतिउष्णतेमुळे ही आग लागली असण्याची शक्यता आहे. अग्निशमन दलाचे जवान आग आटोक्यात आणण्यासाठी शर्थीचे प्रयत्न करत आहेत. सध्या ५ गाड्यांच्या माध्यमातून काम सुरू असून आग लवकरच आटोक्यात येईल. आग पूर्णपणे शांत झाल्यानंतर परिसरात तातडीने ‘कुलिंग ऑपरेशन’ हाती घेण्यात येणार आहे, जेणेकरून आग पुन्हा उद्भवणार नाही, असे महापालिका अग्निशमन दल अधीक्षक राकेश साळुंखे यांनी स्पष्ट केले.
