सोलापूर – युनिफॉर्म उत्पादन उद्योगाची गुणवत्ता, उत्पादन क्षमता आणि जागतिक स्पर्धात्मकता वाढविण्याच्या उद्देशाने दिनांक १३ जून २०२६ ते १७ जून २०२६ या कालावधीत व्हिएतनाममधील हानोई आणि हो-ची-मिन्ह सिटी येथे विशेष गारमेंट मॅन्युफॅक्चरिंग ऑटोमेशन अभ्यास दौऱ्याचे आयोजन करण्यात आले आहे.
जगातील अग्रगण्य शिवणयंत्र उत्पादक कंपनी, जॅक शिलाई मशीन यांनी आयोजित केलेल्या या अभ्यास दौऱ्यात सोलापूरमधील गारमेंट उद्योजकांना जागतिक दर्जाच्या उत्पादन व्यवस्थापन व आधुनिक ऑटोमेशन तंत्रज्ञानाचा प्रत्यक्ष अनुभव घेण्याची संधी उपलब्ध झाली आहे.
जॅक कंपनीचे अधिकृत विक्रेते, कोयना शिलाई मशिन्स चे श्री. गणेश सुत्रावे यांच्या विशेष प्रयत्न व पुढाकारा मुळे या दौऱ्यावर जाण्यासाठी या शिष्टमंडळाला संधी मिळाली आहे. या दौऱ्याचे नियोजन करण्यात त्यांनी केलेल्या अथक प्रयत्नांमुळे शक्य झाले.
या अभ्यास दौऱ्यात सोलापूरमधील गारमेंट उद्योगाशी संबंधित प्रमुख उद्योजकांचे उच्चस्तरीय शिष्टमंडळ सहभागी होणार असून हा दौरा SGMA चे अध्यक्ष श्री. सतीश पवार यांच्या नेतृत्वाखाली संपन्न होणार आहे. या शिष्टमंडळामध्ये SGMA चे उपाध्यक्ष श्री. रमेश डाकलिया, SGMA चे खजिनदार श्री. श्रीकांत अंबुरे, SGMA चे डायरेक्टर श्री. आनंद झाड, CMAI वेस्टर्न रिजनचे डायरेक्टर श्री. अमितकुमार जैन तसेच असोसिएटेड गारमेंट क्लस्टर फाउंडेशनचे डायरेक्टर श्री. अजय रंगरेज यांचा समावेश आहे.
आज व्हिएतनाम हा जगातील आघाडीच्या वस्त्रोद्योग आणि गारमेंट निर्यातदार देशांपैकी एक असून, चीन आणि बांगलादेशनंतर जगातील तिसऱ्या क्रमांकाचा सर्वात मोठा गारमेंट निर्यातदार देश म्हणून ओळखला जातो. अत्याधुनिक ऑटोमेशन, उच्च उत्पादन कार्यक्षमता, जागतिक दर्जाची गुणवत्ता नियंत्रण प्रणाली आणि स्पर्धात्मक उत्पादन खर्च यांच्या बळावर व्हिएतनामने आंतरराष्ट्रीय वस्त्रोद्योगात विशेष स्थान निर्माण केले आहे. जगातील अनेक नामांकित ब्रँड्सचे उत्पादन व्हिएतनाममध्ये होत असून तेथील कारखाने आधुनिक उत्पादन तंत्रज्ञानाचे उत्कृष्ट उदाहरण मानले जातात.
या अभ्यास दौऱ्यादरम्यान प्रतिनिधी मंडळाला अत्याधुनिक ऑटोमेटेड उत्पादन प्रणाली, ऍडव्हान्सड मशीन, डिजिटल उत्पादन व्यवस्थापन, गुणवत्ता नियंत्रण प्रक्रिया, उत्पादन क्षमता वाढविण्याच्या आधुनिक पद्धती आणि मनुष्यबळाचा कार्यक्षम वापर यांचा प्रत्यक्ष अभ्यास करण्याची संधी मिळणार आहे.
या दौऱ्यातून मिळणारे ज्ञान, अनुभव आणि तांत्रिक मार्गदर्शन सोलापूरच्या युनिफॉर्म उद्योगासाठी अत्यंत लाभदायक ठरणार आहे. आधुनिक ऑटोमेशनच्या माध्यमातून उत्पादन क्षमता वाढविणे, गुणवत्तेमध्ये सातत्यपूर्ण सुधारणा घडवून आणणे, उत्पादन खर्च कमी करणे आणि जागतिक बाजारपेठेत स्पर्धात्मक स्थान निर्माण करणे यासाठी हा अभ्यास दौरा महत्त्वपूर्ण ठरणार आहे.
सोलापूरच्या युनिफॉर्म उद्योगाला आधुनिक तंत्रज्ञानाची जोड देत राष्ट्रीय तसेच आंतरराष्ट्रीय स्तरावर अधिक सक्षम, स्पर्धात्मक आणि प्रगत बनविण्याच्या दृष्टीने हा अभ्यास दौरा निश्चितच एक मैलाचा दगड ठरेल, असा विश्वास उद्योग क्षेत्रातील तज्ज्ञांनी व्यक्त केला आहे.
