सोलापूर – श्री शिवाजी शिक्षण प्रसारक मंडळ बार्शी संचलित शंकरराव निंबाळकर अध्यापक विद्यालय बार्शी येथे दि. २७ जानेवारी रोजी कर्मवीर डॉ. मामासाहेब जगदाळे यांच्या १२३ व्या जयंतीनिमित्त ‘कर्मवीर समाज दिन सप्ताहाचे’ उद्घाटन करण्यात आले. या उद्घाटन कार्यक्रमासाठी प्रमुख पाहुणे म्हणून माजी विद्यार्थी,वक्ते श्री. प्रशांत सरुडकर तर अध्यक्ष म्हणून प्राचार्य डॉ. दीपक गुंड उपस्थित होते.
कार्यक्रमाच्या सुरुवातीला कर्मवीर डॉ. मामासाहेब जगदाळे तसेच छत्रपती शिवाजी महाराज यांच्या प्रतिमेचे पूजन प्रमुख पाहुणे व अध्यक्षांच्या हस्ते झाले. प्राचार्य डॉ दीपक गुंड सर यांनी प्रास्ताविक केले व प्रमुख पाहुण्यांची ओळख करुन दिली.
कर्मवीर सप्ताहाचे पहिले पुष्प हे प्रमुख व्याख्याते श्री. प्रशांत सरुडकर सर यांनी आपल्या मनोगतामध्ये ‘स्फूर्तिदायक चरित्रे व युवकांच्या प्रेरणा’ या विषयावर विद्यार्थ्यांना प्रेरणादायी मार्गदर्शन केले.
या अध्यापक विद्यालयातून जीवनात आत्मविश्वास मिळाला, जीवन जगण्याचे कौशल्य शिकलो. कर्मवीर. मामासाहेबानी कष्टातून व स्वाभिमानातून ही संस्था उभी केली आणि आपण या संस्थेत शिकत आहोत हे आपले भाग्य आहे. शंकरराव निंबाळकर या सारखे दानशूर व्यक्तींमुळे अशा संस्था उभ्या राहतात. या मातीतून अनेकांनी आपले आयुष्य घडविले. पुस्तकाची मैत्री सोडू नका. आपल्या मनोगतात त्यांनी छत्रपती शिवाजी महाराज, डॉ बाबासाहेब आंबेडकर, महात्मा गांधी, कर्मवीर भाऊराव पाटील, रविंद्रनाथ टागोर, एडिसन, लुई पाश्चर, प्राचार्य शिवाजीराव भोसले, निर्मलकुमार फडकुले अशा प्रेरणादायी व्यक्तिमत्वाची उदाहरणे त्यांनी विद्यार्थ्यांना दिली. प्रगतीसाठी श्रमप्रतिष्ठा, आत्मविश्वास, समाजभान, अभ्यास या गोष्टी अत्यंत आवश्यक आहेत.अशा व्यक्तिमत्वाची चरित्रे वाचा, असेही सांगितले.
अध्यक्षीय समारोपामध्ये प्राचार्य डॉ.दीपक गुंड यांनी कर्मवीर समाज दिन सप्ताहामध्ये अशाच दर्जेदार व्याख्यानांचे आयोजन करुन विद्यार्थ्यांना मार्गदर्शन केले जाते. तसेच कर्मवीर डॉ. मामासाहेब जगदाळे यांचे कार्य हे सर्व दूर पसरविले जाते, असे सांगितले. कार्यक्रमाचे आभार आणि सूत्रसंचालन सांस्कृतिक विभाग प्रमुख प्रा. गायकवाड जे.पी. यांनी केले. या कार्यक्रमासाठी प्रथम व द्वितीय वर्षातील विद्यार्थी उपस्थित होते.
