जालना – दैनिक ‘पार्श्वभूमी’च्या 16 नोव्हेंबर 2026 रोजीच्या अंकात प्रकाशित झालेल्या वृत्तावरून निर्माण झालेला वाद आता पोलीस प्रशासनापर्यंत पोहोचला आहे. या वृत्तात आपले नाव व छायाचित्र प्रसिद्ध करून आपला कोणत्याही तक्रारीशी संबंध नसताना पत्रकार दीपक शेळके यांच्यासोबत जोडण्यात आल्याचा आक्षेप घेत पत्रकार भरत मानकर यांनी जालना जिल्ह्याचे पोलीस अधीक्षक यांच्याकडे लेखी तक्रार दाखल केली आहे. संबंधित वृत्ताची निष्पक्ष चौकशी करून दैनिकाचे संपादक, प्रकाशक व जबाबदार व्यक्तींविरुद्ध लागू कायद्यांनुसार कारवाई करावी, अशी मागणी त्यांनी केली आहे.
दैनिक ‘पार्श्वभूमी’च्या 16 नोव्हेंबरच्या अंकात ‘गोरंट्याल यांच्याकडून संपविण्याची धमकी व पत्रकार शेळके, मानकर यांना हाताशी धरून तथ्यहीन तक्रारी’ या मथळ्याखाली वृत्त प्रकाशित करण्यात आले होते. या वृत्तामध्ये आपले नाव व छायाचित्र प्रसिद्ध करून एका कथित प्रकरणाशी जाणीवपूर्वक जोडण्यात आल्याचा आरोप मानकर यांनी पोलीस अधीक्षकांना दिलेल्या तक्रारीत केला आहे.
‘पार्श्वभूमी’विरोधात कोणतीही तक्रार दाखल केलेली नाही!
या तक्रारीतील सर्वात महत्त्वाचा मुद्दा म्हणजे, आपण दैनिक ‘पार्श्वभूमी’ वृत्तपत्राच्या विरोधात कोणत्याही शासकीय अथवा प्रशासकीय कार्यालयाकडे कोणतीही तक्रार दाखल केलेली नसल्याचे भरत मानकर यांनी स्पष्ट केले आहे. असे असतानाही आपले नाव पत्रकार दीपक शेळके यांच्यासोबत जोडून दोघांना हाताशी धरून तथ्यहीन तक्रारी केल्या जात असल्याची मांडणी संबंधित वृत्तात करण्यात आल्याचा त्यांचा आक्षेप आहे.
आपण कोणत्याही व्यक्तीच्या सांगण्यावरून किंवा कोणाच्या हाताशी लागून तक्रारी केलेल्या नाहीत. त्यामुळे संबंधित वृत्तातील उल्लेख आपल्याबाबत पूर्णतः चुकीचा आणि दिशाभूल करणारा असल्याचे मानकर यांनी म्हटले आहे. प्रत्यक्षात कोणत्याही तक्रारीशी संबंध नसताना आपले नाव अशा प्रकारे प्रसिद्ध केल्यामुळे सामाजिक व पत्रकारितेच्या क्षेत्रातील प्रतिमेला धक्का पोहोचल्याची तक्रार त्यांनी केली आहे.
बाजू न जाणून घेता नाव आणि छायाचित्र प्रसिद्ध केल्याचा आक्षेप
संबंधित वृत्त प्रकाशित करण्यापूर्वी आपली बाजू जाणून घेण्यात आली नाही, तसेच आपल्याविषयी करण्यात आलेल्या उल्लेखांची वस्तुस्थिती तपासण्यात आली नसल्याचे मानकर यांनी तक्रारीत नमूद केले आहे. पत्रकारितेच्या माध्यमातून वस्तुस्थिती मांडण्याचे स्वातंत्र्य असले तरी कोणत्याही व्यक्तीची प्रतिमा मलिन होईल अशा पद्धतीने अप्रमाणित माहिती प्रसिद्ध करणे योग्य नसल्याचे त्यांनी म्हटले आहे.
संबंधित वृत्तामुळे वैयक्तिक आणि व्यावसायिक प्रतिष्ठेला धक्का पोहोचला असून समाजामध्ये आपल्याबाबत गैरसमज निर्माण होण्याची शक्यता असल्याचेही त्यांनी निदर्शनास आणून दिले आहे. त्यामुळे आपले नाव आणि छायाचित्र प्रसिद्ध करण्यामागील नेमका उद्देश काय होता, त्यासाठी कोणते आधार व पुरावे वापरण्यात आले, याची तपासणी होणे आवश्यक असल्याचे त्यांनी म्हटले आहे.
सात महत्त्वाच्या मागण्यांद्वारे चौकशीची मागणी
पोलीस अधीक्षकांकडे सादर केलेल्या तक्रारीत भरत मानकर यांनी सात प्रमुख मागण्या केल्या आहेत. त्यामध्ये 16 नोव्हेंबर रोजी प्रकाशित झालेल्या वृत्ताची चौकशी करणे, संबंधित वृत्तपत्राविरोधात कोणतीही तक्रार दाखल केलेली नसताना आपले नाव तथ्यहीन तक्रारींशी का जोडण्यात आले, याचा संपादक व प्रकाशकांकडून खुलासा मागविणे, तसेच वृत्त प्रकाशित करण्यापूर्वी आपली बाजू जाणून घेण्यात आली होती किंवा नाही, याची तपासणी करणे यांचा समावेश आहे.
याशिवाय, आपले नाव व छायाचित्र प्रसिद्ध करण्यामागील उद्देश आणि त्यासंबंधी उपलब्ध पुराव्यांची पडताळणी करावी, वृत्तातील उल्लेखांमुळे कायदेशीरदृष्ट्या बदनामी झाली आहे का, याची तपासणी करावी, अशी मागणीही त्यांनी केली आहे. भारतीय न्याय संहिता आणि इतर लागू कायद्यांनुसार गुन्हा निष्पन्न होत असल्यास संबंधित संपादक, प्रकाशक व जबाबदार व्यक्तींविरुद्ध नियमानुसार कायदेशीर कारवाई करावी, अशी भूमिका त्यांनी मांडली आहे.
कदीम जालना पोलिसांनाही प्रत
या तक्रारीची प्रत कदीम जालना पोलीस ठाण्याच्या पोलीस निरीक्षकांना देण्यात आली आहे. तक्रारीसोबत दैनिक ‘पार्श्वभूमी’च्या 16 नोव्हेंबर 2026 रोजीच्या अंकाची प्रतही जोडण्यात आली आहे. संपूर्ण प्रकरणाची गांभीर्याने दखल घेऊन निष्पक्ष चौकशी करावी आणि करण्यात आलेल्या कार्यवाहीची माहिती लेखी स्वरूपात द्यावी, अशी विनंती मानकर यांनी केली आहे.
एकाच वृत्तावरून अनेक स्तरांवर तक्रारी; पोलीस प्रशासनाच्या भूमिकेकडे लक्ष
विशेष म्हणजे, याच वृत्ताच्या अनुषंगाने पत्रकार दीपक शेळके यांनी मुख्यमंत्री देवेंद्र फडणवीस यांच्याकडे निवेदन देऊन स्वतंत्र चौकशीची मागणी केली आहे. तसेच पत्रकार भरत मानकर यांनी दैनिकाच्या संपादक व प्रकाशकांना स्वतंत्र निवेदन देऊन आरोपांचे पुरावे आणि मूळ वृत्ताइतकीच ठळक प्रसिद्धी देण्याची मागणी केली आहे. आता त्यांनी पोलीस अधीक्षकांकडेही स्वतंत्र तक्रार दाखल केल्याने या प्रकरणाला अधिक गंभीर स्वरूप प्राप्त झाले आहे.
एकीकडे पत्रकार शेळके यांनी सन 2016 पासूनच्या तक्रारींची पार्श्वभूमी मांडत संबंधित वृत्ताच्या प्रकाशनावर आक्षेप घेतला आहे, तर दुसरीकडे मानकर यांनी आपला संबंधित तक्रारींशी कोणताही संबंध नसल्याचे स्पष्ट करत आपले नाव विनाकारण गोवण्यात आल्याचा आरोप केला आहे.
दरम्यान, या प्रकरणात पोलीस प्रशासनाकडून चौकशी सुरू करण्यात आली आहे किंवा कोणती कारवाई झाली आहे, याबाबत अद्याप अधिकृत माहिती समोर आलेली नाही. त्यामुळे पोलीस अधीक्षक आणि कदीम जालना पोलीस ठाणे या तक्रारीवर कोणती भूमिका घेतात, तसेच दैनिक ‘पार्श्वभूमी’चे संपादक व प्रकाशक यांच्याकडून काय खुलासा दिला जातो, याकडे पत्रकारिता क्षेत्रासह जालना जिल्ह्याचे लक्ष लागले आहे.

















