मंगळवेढा –
अन्न व औषध प्रशासनाचे आयुक्त तुकाराम मुंढे यांनी भेसळ युक्त दूध व अन्नपदार्थ कडे लक्ष केंद्रित केले आहे. त्यांनी अधिकाऱ्यांना कारवाई करण्याचे आदेश दिले आहेत. यामुळे राज्यात अनेक ठिकाणी कारवाई करण्यात आल्या आहेत. याची धास्ती स्वीट मार्ट चालकांनी घेतली असून मलई, पेढा व पनीर गायब झाले असल्याचे दिसून येत आहे.
राज्यात भेसळयुक्त दूध व भेसळयुक्त अन्नपदार्थ विक्री केली जात आहे. यामुळे लहान मुले व नागरिकांच्या आरोग्यास धोका निर्माण झाला आहे.भेसळयुक्त अन्नपदार्थावर लक्ष केंद्रित करण्यासाठी शासनाने अधिकाऱ्यांची नियुक्ती केली आहे.
मात्र अधिकारी लक्ष्मी दर्शन घेऊन याकडे दुर्लक्ष करत असल्याचे दिसून येत आहे. काही दिवसापूर्वी शासनाने अन्न व औषध प्रशासनाचे आयुक्त तुकाराम मुंढे यांची नियुक्ती केली. मुंढे यांनी लगेच कामाला सुरुवात केली असून त्यांनी अधिकाऱ्यांची बैठकी घेऊन भेसळयुक्त दूध व अन्नपदार्थ तयार करणाऱ्यावर कारवाई करावी असे आदेश दिले आहेत. त्यामुळे राज्यात अनेक ठिकाणी भेसळयुक्त दूध व अन्न पदार्थ तयार करण्यावरून कारवाई करण्यात आली.
स्वीट मार्ट मध्ये भेसळयुक्त मलई, पेढा तसेच पनीर विक्री केली जाते. मात्र तुकाराम मुंढे यांनी आयुक्त पदाचा कारभार घेतल्यावर स्वीट मार्ट चालकांचे धाबे दणाणले असून असून त्यांनी आपल्या दुकानातून मलई, पेढा व पनीर गायब केले असल्याचे दिसून येत आहे. मुंढे यांच्या कारभाराचा धसका अनेक व्यापाऱ्यांनी घेतला असल्याचे दिसून येत आहे.
