सोलापूर – विजय चषक क्रिकेट स्पर्धेत संस्कार गवळीच्या भेदक माऱ्यामुळे मॉडेल क्रिकेट अकॅडमीने गॅरी कर्स्टन क्रिकेट अकॅडमीचा १५२ धावांनी धुव्वा उडवत आपली पकड मजबूत केली.
येथील इंदिरा गांधी पार्क स्टेडियमवर झालेल्या सामन्यात प्रथम फलंदाजी करताना मॉडेल अकॅडमीने ३९.५ षटकांत सर्वबाद २४६ धावांचे आव्हानात्मक लक्ष्य उभे केले होते, ज्यामध्ये ययाती देवकतेने ७४ चेंडूत ६४ धावांचे महत्वपूर्ण योगदान दिले.
प्रत्युत्तरात गॅरी कर्स्टन अकॅडमीचा संघ मॉडेलच्या प्रभावी गोलंदाजीसमोर पूर्णपणे हतबल झाला. त्यांचा डाव अवघ्या १८.४ षटकांत ९४ धावांत आटोपला. गॅरी कर्स्टन संघाकडून मंदार वढवरावने ४२ चेंडूत ४१ धावांची झुंज दिली, मात्र इतर फलंदाजांनी निराशा केली. मॉडेलच्या विजयाचा खरा नायक संस्कार गवळी ठरला. त्याने ४.४ षटकांत एक निर्धाव षटक टाकत केवळ ८ धावांच्या मोबदल्यात ५ बळी मिळवून प्रतिस्पर्ध्यांचे कंबरडे मोडले. या अविश्वसनीय कामगिरीबद्दल संस्कारला ‘सामनावीर’ पुरस्कार देऊन गौरविण्यात आले.
