सोलापूर – जिल्हा परिषद सोलापूरच्या बांधकाम विभागांतर्गत सुरू असलेल्या विविध विकासकामांना गती देण्याच्या दृष्टीने बांधकाम समितीची मासिक सर्वसाधारण सभा बुधवारी (दि. १२) जिल्हा परिषद उपाध्यक्ष तथा बांधकाम समितीचे अध्यक्ष इंद्रजीत पवार यांच्या अध्यक्षतेखाली पार पडली. या बैठकीत रस्ते, अंगणवाडी बांधकामे, मंजूर कामांच्या निविदा तसेच विभागनिहाय खर्चाचा सविस्तर आढावा घेण्यात आला.
जिल्हा परिषद बांधकाम विभाग क्रमांक १ व २ मार्फत हाती घेण्यात आलेल्या विविध कामांवरील जुलै २०२६ अखेरच्या खर्चाचा आढावा घेण्यात आला. तसेच जिल्ह्यात सुरू असलेल्या विविध रस्त्यांच्या कामांची सद्यस्थिती, प्रगती आणि कामांच्या पूर्ततेबाबत चर्चा करण्यात आली. मंजूर झालेल्या कामांच्या निविदा प्रक्रियेचाही आढावा घेऊन कामांना आवश्यक त्या गतीने पुढे नेण्याबाबत चर्चा झाली.
ग्रामीण भागातील बालविकास सुविधांच्या दृष्टीने महत्त्वाच्या असलेल्या अंगणवाडी बांधकामांचाही तालुकानिहाय आढावा बैठकीत घेण्यात आला. प्रलंबित कामे, सुरू असलेली कामे आणि पूर्णत्वाकडे आलेल्या कामांची माहिती घेऊन विकासकामांच्या अंमलबजावणीत अडथळे असल्यास ते दूर करण्यावर भर देण्यात आला.
बैठकीच्या सुरुवातीला १७ जुलै २०२६ रोजी झालेल्या मागील सभेचे इतिवृत्त वाचून कायम करण्यात आले. मागील सभेतील ठरावांच्या पूर्ततेची नोंद घेण्यात आली. तसेच प्राप्त शासकीय पत्रे, परिपत्रके आणि शासन निर्णयांचे वाचन करून त्यानुसार आवश्यक कार्यवाहीचा आढावा घेण्यात आला. याबैठकीस जिल्हा परिषद सदस्य नेताजी खंडागळे, सचिन जाधव, विकास बुळा, प्रदीप खांडेकर, पूजा ढेरे, अतुल पवार, लक्ष्मीबाई पाटील यांच्यासह संबंधित अधिकारी उपस्थित होते.
चौकट
विकासकामांची गुणवत्ता आणि वेळेत पूर्तता यावर भर
जिल्ह्यातील ग्रामीण भागातील रस्ते व पायाभूत सुविधांची कामे वेळेत पूर्ण करण्यासोबतच मंजूर निधीचा प्रभावी वापर आणि कामांच्या प्रगतीवर सातत्याने देखरेख ठेवण्याच्या दृष्टीने बैठकीतील चर्चा महत्त्वाची ठरली. त्यामुळे आगामी काळात रस्ते आणि अंगणवाडी बांधकामांना अधिक गती मिळण्याची अपेक्षा व्यक्त होत आहे.
कोट
प्रलंबित कामांना गती देण्यावर बांधकाम समितीचा भर
जिल्ह्यातील विकासकामे केवळ मंजूर करून थांबायची नाहीत, तर ती वेळेत आणि गुणवत्तापूर्ण पद्धतीने पूर्ण होणे आवश्यक आहे. रस्ते, अंगणवाडी आणि इतर पायाभूत सुविधांच्या कामांचा नियमित आढावा घेऊन प्रलंबित कामांना गती देण्यावर बांधकाम समितीचा भर आहे. निधीचा प्रभावी वापर, कामांची गुणवत्ता आणि वेळेत पूर्तता याबाबत संबंधित अधिकाऱ्यांनी काटेकोरपणे कार्यवाही करावी.
– इंद्रजीत पवार, उपाध्यक्ष, जिल्हा परिषद सोलापूर
