टेंभुर्णी – राज्याच्या अन्न व औषध प्रशासन विभागाची धुरा हाती घेतल्यानंतर आयएएस अधिकारी तुकाराम मुंढे यांनी भेसळखोरांविरोधात कठोर भूमिका घेतल्याचे राज्यभर पाहायला मिळत आहे. विविध शहरांमध्ये सातत्याने धाडी, नमुना तपासणी आणि कारवाईची मोहीम राबविली जात असल्याने ग्राहकांमध्ये विश्वासाचे वातावरण निर्माण झाले आहे. मात्र, माढा तालुका आणि टेंभुर्णी परिसरात अन्नपदार्थांच्या गुणवत्तेबाबत सातत्याने प्रश्न उपस्थित होत असल्याने स्थानिक नागरिकांकडून व्यापक तपासणीची मागणी केली जात आहे.
माढा तालुक्यातील टेंभुर्णी हे महत्त्वाचे व्यापारी केंद्र मानले जाते. राष्ट्रीय महामार्गालगत असल्याने येथे रोज हजारो प्रवासी, ग्राहक आणि नागरिकांची वर्दळ असते. शहरात लहान-मोठी हॉटेल्स, स्वीट होम, दुग्ध व्यवसाय, फास्टफूड केंद्रे तसेच विविध खाद्यपदार्थ विक्री करणारी दुकाने मोठ्या प्रमाणावर आहेत. मात्र, काही ठिकाणी निकृष्ट दर्जाचे साहित्य वापरून अन्नपदार्थ तयार केले जात असल्याच्या तक्रारी अधूनमधून समोर येत असल्याने नागरिकांमध्ये चिंता व्यक्त केली जात आहे.
विशेषतः मिठाई, खवा, तूप, दुग्धजन्य पदार्थ आणि तेलकट खाद्यपदार्थांच्या गुणवत्तेबाबत प्रश्न उपस्थित होत आहेत. अन्नपदार्थांमध्ये वापरल्या जाणाऱ्या कच्च्या मालाची गुणवत्ता, त्याची साठवणूक, स्वच्छता आणि नियमांचे पालन याची नियमित तपासणी होत आहे का, असा प्रश्न अनेक नागरिक उपस्थित करत आहेत. नागरिकांच्या म्हणण्यानुसार, सणासुदीच्या काळात खाद्यपदार्थांची मोठ्या प्रमाणावर विक्री होत असताना तपासणी मोहीम अधिक प्रभावीपणे राबविण्याची गरज आहे.
मेडिकल्स आणि कृषी निविष्ठांबाबतही शंका
तालुक्यातील काही मेडिकल स्टोअर्स तसेच कृषी सेवा केंद्रांमध्ये विक्री होणाऱ्या औषधे, खते, बियाणे आणि कीटकनाशकांच्या गुणवत्तेबाबतही शेतकरी आणि ग्राहकांकडून वेळोवेळी प्रश्न उपस्थित केले जात आहेत. निकृष्ट दर्जाच्या उत्पादनांमुळे आर्थिक नुकसान होत असल्याच्या तक्रारी शेतकरी संघटनांकडून अधूनमधून पुढे येतात. त्यामुळे संबंधित विभागांनी संयुक्त मोहीम राबवून प्रत्यक्ष तपासणी करावी, अशी मागणी होत आहे.
कारवाईपेक्षा तपासणी मोहिमेची अपेक्षा
अन्न व औषध प्रशासनाकडून वेळोवेळी कारवाया केल्या जात असल्या तरी टेंभुर्णी आणि माढा तालुक्यात विशेष तपासणी मोहीम राबविण्याची गरज असल्याचे नागरिकांचे मत आहे. खाद्यपदार्थांचे नमुने घेणे, प्रयोगशाळेत तपासणी करणे, नियमभंग करणाऱ्यांवर दंडात्मक कारवाई करणे आणि ग्राहकांमध्ये जनजागृती करणे या उपाययोजनांवर भर देण्याची अपेक्षा व्यक्त केली जात आहे.
*चौकट,जनतेचा सवाल*
“राज्यात भेसळविरोधी कारवाईचा धडाका सुरू असताना माढा तालुका आणि टेंभुर्णी परिसरात विशेष तपासणी मोहीम कधी राबविण्यात येणार? नागरिकांच्या आरोग्याशी संबंधित या प्रश्नाकडे वरिष्ठ अधिकाऱ्यांचे लक्ष कधी वेधले जाणार? तसेच अन्न, औषधे आणि कृषी निविष्ठांच्या गुणवत्तेची व्यापक तपासणी करून अहवाल सार्वजनिक केला जाणार का?” असा सवाल नागरिकांकडून उपस्थित केला जात आहे.
माढा तालुक्यातील नागरिकांचे आरोग्य आणि ग्राहकांचे हित लक्षात घेऊन संबंधित विभागाने तातडीने सर्वसमावेशक तपासणी मोहीम राबवावी, अशी मागणी आता जोर धरू लागली आहे.
