सोलापूर : महापालिका स्थायी समिती सभेत क्लोरीन टनर, औषधे, ड्रेनेजलाइन व रस्त्यांच्या कामांसह विविध नआठ विषयांना मंजुरी देण्यात आली तर एका विषयाची माहिती घेण्यात आली. रूपा भवानी जलशुद्धीकरण केंद्रातील तांत्रिक बिघाड दुरुस्त करण्यासाठी खासगी मक्तेदाराची मदत का घ्यावी लागली, असा सवाल उपस्थित करीत नगरसेवक राजू पाटील यांनी अधिकाऱ्यांना धारेवर धरले. जलवाहिनी दुरुस्तीसाठी करण्यात येणाऱ्या वॉशआऊटचे पाणी वाया न घालवता त्याची साठवण करण्याबाबत नियोजन करण्याची सूचना सभापती चाकोते यांनी केली.
सोलापूर महानगरपालिकेच्या स्थायी समितीची सभा सभापती रंजिता चाकोते यांच्या अध्यक्षतेखाली पार पडली. या सभेच्या पटलावर एकूण नऊ विषय ठेवण्यात आले होते. त्यापैकी आठ विषयांना मान्यता देण्यात आली, तर एका विषयाची माहिती घेण्यात आली. महापालिकेच्या सार्वजनिक आरोग्य अभियंता विभागांतर्गत सोरेगाव, भवानी पेठ आणि पाकणी जलशुद्धीकरण केंद्रांमध्ये पाणी शुद्धीकरण प्रक्रियेसाठी सन २०२६-२७ या आर्थिक वर्षाकरिता किंवा संपूर्ण पुरवठा होईपर्यंत ६०० क्लोरीन टनर खरेदी करण्यास मंजुरी देण्यात आली. यासाठी एक कोटी ६० हजार ८०० रुपये खर्च अपेक्षित आहे.
महापालिकेच्या एकता नगर गार्डनमधील कामे, कर्णिक नगर, भैय्या वस्ती परिसरात सभामंडप बांधणे, महालक्ष्मी मंदिर परिसरातील सभामंडपाचे सुशोभीकरण तसेच महापालिकेच्या खुल्या जागांमध्ये विविध विकासकामे करण्यास मान्यता देण्यात आली. मक्तेदार नितीन मारुती ननवारे यांची वर्ग ‘क’मधून वर्ग ‘ब-१’मध्ये नोंदणी करण्यासही मंजुरी देण्यात आली.
महापालिकेच्या दवाखाने, प्रसूतिगृहे आणि नागरी आरोग्य केंद्रांसाठी सन २०२६-२७ आणि २०२७-२८ या दोन आर्थिक वर्षांकरिता औषधे व वैद्यकीय साहित्य खरेदी करण्याचे दर मंजूर करण्यात आले. तसेच आवश्यकतेनुसार पुरवठा आदेश देण्यास मान्यता देण्यात आली. यासाठी अर्थसंकल्पातील संबंधित तरतुदीतून दोन कोटी रुपयांचा निधी उपलब्ध आहे. महाराष्ट्र सुवर्ण जयंती नगरोत्थान अभियानांतर्गत पाच ठिकाणी ड्रेनेजलाइन टाकणे, लोकशाहीर अण्णाभाऊ साठे नागरी वस्ती सुधारणा योजनेंतर्गत तीन ठिकाणी ड्रेनेजलाइन टाकणे, माधवनगर येथील साई मंदिर आणि पद्म मारुती मंदिरासमोर सभामंडप बांधणे तसेच पाच ठिकाणी रस्त्यांची कामे करण्यास मंजुरी देण्यात आली. प्रभाग क्रमांक ११ मधील रियाज बागवान यांच्या घरापासून अब्बास फुलारी यांच्या घरापर्यंत पिण्याच्या पाण्याची पाइपलाइन टाकण्यासाठी दिलेल्या वर्कऑर्डरची माहिती सभेत घेण्यात आली.
खासगी मक्तेदाराला बोलावण्याची वेळ का आली?*
रूपा भवानी जलशुद्धीकरण केंद्रातील तांत्रिक बिघाड दुरुस्त करण्यासाठी खासगी मक्तेदाराची मदत घ्यावी लागल्याचा मुद्दा सभेत उपस्थित झाला. नगरसेवक राजू पाटील यांनी यावरून अधिकाऱ्यांना जाब विचारला. महापालिकेतील अधिकाऱ्यांना तांत्रिक दोष शोधता आला नाही आणि बाहेरून खासगी मक्तेदाराला बोलावल्यानंतर बिघाडाचे कारण समजले तर संबंधित अधिकारी नेमके काय करतात, असा सवाल त्यांनी केला. ही समस्या महावितरणच्या अखत्यारीतील असल्याचे अधिकाऱ्यांकडून सांगण्यात आले. मात्र, महापालिका अधिकाऱ्यांनी वेळीच पाठपुरावा करून कार्यवाही करणे अपेक्षित होते. पाणीपुरवठा विभागासाठी तांत्रिक तज्ज्ञांची नियुक्ती करण्याची गरज असल्याची मागणी सदस्यांनी केली.
नव्या जलवाहिनी योजनेसाठीही
तयारी करणे आवश्यक : चाकोते
सोलापूर शहरासाठी १ हजार ४८३ कोटी रुपयांची नवीन जलवाहिनी योजना राबविण्यात येणार आहे. या योजनेनंतरही अशा प्रकारचे तांत्रिक दोष निर्माण झाल्यास त्यावर मात करण्यासाठी आतापासूनच नियोजन आणि तयारी करणे आवश्यक असल्याचे सभापती रंजिता चाकोते यांनी स्पष्ट केले.
पाणी वाया गेले नव्हे तर वॉशआऊट प्रक्रिया : चौबे
अवंती नगरजवळील अभिषेक नगर येथे जलवाहिनी दुरुस्तीसाठी वॉशआऊट घेण्यात आला होता. त्यामुळे पाणी वाया गेले नसून तांत्रिक दुरुस्तीसाठी ही प्रक्रिया आवश्यक असल्याची माहिती सार्वजनिक आरोग्य अभियंता व्यंकटेश चौबे यांनी दिली.
वॉशआऊटचे पाणी साठवण्याची गरज
जलवाहिनी गळती अथवा दुरुस्तीच्या कामासाठी वॉशआऊट घेताना मोठ्या प्रमाणात पाणी वाहून जात असल्याने नागरिकांमधून नाराजी व्यक्त होत आहे. दुष्काळी परिस्थिती लक्षात घेता वॉशआऊटपूर्वी नागरिकांना पूर्वसूचना देणे, तसेच बाहेर पडणारे पाणी साठवून अन्य कामांसाठी वापरता येईल का, याचे नियोजन करणे गरजेचे आहे. अधिकाऱ्यांनी दिलेले स्पष्टीकरण समाधानकारक नसल्याचे सभापती चाकोते यांनी सांगितले.
Views: 11