सोलापूर – राज्यातील क्रीडा क्षेत्राच्या विकासाकरिता मिशन लक्ष्यवेध हा महत्वाकांक्षी उपक्रम हाती घेण्यात आलेला असुन, या योजनेंतर्गत लातूर विभागास ॲथलेटिक्स व कुस्ती या दोन खेळांचे निवासी विभागीय क्रीडा निपुणता केंद्र सुरु करण्यास तर पुणे विभागात ॲथलेटिक्स, आर्चरी, बॅडमिंटन, हॉकी, रायफल शूटींग, रोईग, कुस्ती व टेबल टेनिस या खेळाच्या प्रत्येकी 20 खेळाडूंची निवड करण्यास मान्यता मिळालेली आहे.
पुणे विभागाकरिता पात्र खेळाडूंनी आपले अर्ज विभागीय उपसंचालक पुणे विभाग पुणे, यांचे कार्यालय विभागीय क्रीडा संकुल, सर्व्हे नं. 191, महाराष्ट्र हौसिंग बोर्ड, मोझे विद्यालयासमोर, येरवडा पुणे 411006 येथे प्रत्यक्ष अथवा deputypune@gmail.com या ई-मेल वर 17 मार्च पर्यंत करावेत, असे आवाहन क्रीडा व युवक सेवा, पुणे विभागाचे उपसंचालक युवराज नाईक यांनी केले आहे.
लातूर विभागाकरिता खालील निकषानुसार पात्र खेळाडुनी आपले अर्ज विभागीय उपसंचालक, क्रीडा व युवक सेवा, लातूर विभाग,जिल्हा क्रीडा संकुल परिसर,औसा रोड लातूर येथे प्रत्यक्ष अथवा dyd.syslatur@rediffmail.com या ई मेलवर 20 मार्चपर्यंत करावेत, असे आवाहन जिल्हा क्रीडा अधिकारी श्रीकांत हरनाळे यांनी केले आहे.
निवड झालेल्या खेळाडुना निवासी क्रीडा प्रशिक्षण, पायाभुत सुविधा व क्रीडा साहित्य, खेळाडुच्या सराव व मुल्यांकनाकरिता क्रीडा स्पर्धाचे आयोजन,स्पोर्टस सायन्स सेंटर, करियर मार्गदर्शन, देशी-विदेशी संस्थाच्या सहकार्याने क्षमता विकास कार्यक्रम ई. सुविधा उपलब्ध करुन देण्याच्या उद्देशाने मिशन लक्ष्यवेध ही निवासी विभागीय क्रीडा निपुणता योजना कार्यान्वित करण्यात आलेली आहे. तसेच यामध्ये निवड झालेल्या खेळांडूंना निवास, भोजन, पुरक आहार खर्च, क्रीडा व प्रशिक्षण साहित्य, निवडलेल्या खेळाडूंचे देशांतर्गत/परदेशी प्रशिक्षण व देशांतर्गत/विदेशातील स्पर्धा सहभाग खर्च, खेळाडूंच्या वैद्यकीय चाचण्या, किरकोळ वैद्यकीय खर्च, विभागीय उपसंचालक क्रीडा व यवुक सेवा यांच्यामार्फत करण्यात येईल.
पात्रता व अटी याप्रमाणे
1 वयोमर्यादा – 31 डिसेंबर 2026 रोजी 25 वर्षाआतील मुले/मुली
2 आवश्यक कागदपत्रे – जन्मदाखला, शाळा सोडल्याचे प्रमाणपत्र, अधिवास प्रमाणपत्र,आधार कार्ड, मागील 2 वर्षातील क्रीडा विषयक कामगिरीचे प्रमाणपत्र,पासपोर्ट साईज 3 फोटोग्राफ, शाळा महाविद्यालय बोनाफाईड प्रमाणपत्र पालकांचे संमती पत्र
3 अधिवास – महाराष्ट्र राज्यातील खेळाडू असणे अधिवास प्रमाणपत्र आवश्यक
4 क्रीडा कामगिरी – राज्यस्तरावरील पदक प्राप्त खेळाडू किंवा राष्ट्रीय स्तरावील सहभागी खेळाडू (SGFI,AFI,Khelo India National only ) गत 2 वर्षाच्या क्रीडा कामगिरीचे मुल्यमापन करण्यात येऊन क्रीडा कौशल्य व तंदुरुस्ती (Fitness) चाचण्यांमध्ये पात्र होणे आवश्यक
5 वैद्यकीय तपासणी – शासन मान्यताप्राप्त डॉक्टरांकडून दिलेले वैध वैद्यकीय फिटनेस प्रमाणपत्र अनिवार्य
