सोलापूर – सोलापूर जिल्हा परिषदेच्या शैक्षणिक क्षेत्रासाठी अभिमानास्पद ठरणारी कामगिरी सांगोला तालुक्यातील जिल्हा परिषद प्राथमिक शाळा शेळकेवाडी (शिवणे) हिने केली आहे. भारत सरकारच्या शिक्षण मंत्रालयाच्या ‘स्वच्छ व हरित विद्यालय मूल्यांकन ‘ स्पर्धेत शाळेने ९०.८० गुणांसह फाईव्ह स्टार रेटिंग मिळवत देशातील १९१ उत्कृष्ट शाळांमध्ये ६३वा क्रमांक पटकावला आहे.
विशेष म्हणजे, राष्ट्रीय स्तरावर गौरवासाठी निवड झालेली महाराष्ट्रातील ही एकमेव जिल्हा परिषद शाळा ठरली असून, या यशामुळे सोलापूर जिल्हा परिषदेच्या शिक्षण व्यवस्थेचा लौकिक देशभर पोहोचला आहे.
या मूल्यांकनात स्वच्छता, सुरक्षित पिण्याचे पाणी, स्वच्छतागृहे, हात धुण्याच्या सुविधा, कचरा व्यवस्थापन, ऊर्जा व जलसंवर्धन, पर्यावरण संरक्षण, हरित परिसर, विद्यार्थ्यांचा सहभाग आणि शाश्वत विकास अशा विविध निकषांवर देशभरातील हजारो शाळांची बहुपदरी छाननी करण्यात आली. जिल्हा, राज्य आणि राष्ट्रीय स्तरावरील कठोर प्रक्रियेनंतर केवळ १९१ शाळांची राष्ट्रीय गौरवासाठी निवड झाली. त्यामध्ये शेळकेवाडी शाळेने देशात ६३वे
स्थान मिळवत ग्रामीण शिक्षणाची ताकद अधोरेखित केली.
या यशाची आणखी एक महत्त्वाची बाब म्हणजे, महाराष्ट्रातून राष्ट्रीय स्तरावर स्थान मिळवणारी शेळकेवाडी ही एकमेव जिल्हा परिषद शाळा ठरली आहे. ग्रामीण भागातील शाळाही गुणवत्तापूर्ण शिक्षण, स्वच्छता आणि पर्यावरणपूरक उपक्रमांच्या बळावर राष्ट्रीय स्तरावर उत्कृष्ट कामगिरी करू शकतात, याचा आदर्श या शाळेने निर्माण केला आहे.
या उल्लेखनीय यशाबद्दल जिल्हा परिषदेचे मुख्य कार्यकारी अधिकारी कुशल जैन यांनी शाळेचे अभिनंदन करत, हा सन्मान ग्रामीण शिक्षणातील गुणवत्ता आणि स्वच्छतेच्या सातत्यपूर्ण प्रयत्नांचा गौरव असल्याचे सांगितले.जिल्ह्यातील इतर शाळांनीही शेळकेवाडीचा आदर्श घेऊन अशा उपक्रमांना प्राधान्य द्यावे, असे आवाहन त्यांनी केले.
कोट
प्राथमिक शिक्षणाधिकारी कादर शेख, गटशिक्षणाधिकारी सुयोग नवले, मुख्याध्यापक भागवत भाटेकर, शिक्षक, विद्यार्थी, पालक आणि ग्रामस्थांचे अभिनंदन करत, हे यश सामूहिक प्रयत्नांचे फलित असल्याचे नमूद केले. जिल्हा परिषद शाळांची गुणवत्ता राष्ट्रीय स्तरावर सिद्ध करणारी ही कामगिरी असल्याचे त्यांनी सांगितले.
कोट
जिल्हा परिषद शिक्षण व आरोग्य सभापती चेतनसिंह केदार यांनीही शाळेचे अभिनंदन करत, सोलापूर जिल्हा परिषदेच्या शिरपेचात मानाचा तुरा खोवणारी ही ऐतिहासिक कामगिरी असल्याचे गौरवोद्गार काढले.
चौकट
केंद्रीय शैक्षणिक तंत्रज्ञान संस्था यांनी अधिकृत पत्राद्वारे शाळेची राष्ट्रीय गौरवासाठी निवड झाल्याची माहिती दिली असून, लवकरच होणाऱ्या राष्ट्रीय गौरव समारंभात शाळेचा सन्मान केला जाणार आहे.
चौकट
या यशामागील ठळक वैशिष्ट्ये
देशात ६३वा क्रमांक
९०.८० गुणांसह फाईव्ह स्टार रेटिंग
राष्ट्रीय स्तरावर निवड झालेली महाराष्ट्रातील एकमेव जिल्हा परिषद शाळा
देशातील १९१ उत्कृष्ट शाळांमध्ये स्थान
स्वच्छता, हरित परिसर आणि शाश्वत विकास उपक्रमांची राष्ट्रीय पातळीवर दखल
ग्रामीण शाळांसाठी प्रेरणादायी आणि अनुकरणीय कामगिरी
