‘आयपीएल’मध्ये कोट्यवधी रुपयांची बोली लावली जाते, त्यातून ते कोट्यवधींचे मानकरी होतात, प्रायोजकही मालामाल होतात; पण त्यांचा खेळ पाहणारे चाहते केवळ ईर्ष्येपोटी एकमेकांचा जीव घेत आहेत. ‘आयपीएल’चा ज्वर वाढत असून, चाहत्यांमध्ये होत असलेल्या वादाने डोकी फोडण्यापासून ते खुनापर्यंत प्रकरण पोहोचत आहे. कोल्हापुरात ‘मुंबई इंडियन्स’च्या चाहत्याने ‘चेन्नई सुपरकिंग्ज’च्या चाहत्यावर केलेला हल्ला, त्यातून त्याचा गेलेला जीव पाहता ही ईर्ष्या कोणत्या टोकाला जाते हे दिसून येते.
कोल्हापूर जिल्ह्यातील हणमंतवाडी येथे गेल्या आठवड्यात एकाच गल्लीत राहणाऱ्या दोन कुटुंबात वाद झाला. वादाचे कारण होते सध्या सुरू असलेली आयपीएल. सागर झांजगे व बळवंत झांजगे हे दोघे काका-पुतण्या. दोघेही ‘मुंबई इंडियन्स’चे चाहते आहेत. त्यांच्याच गल्लीत राहणाऱ्या गायकवाड यांच्या घरात बसून क्रिकेट पाहायचे. गेल्या आठवड्यात हैद्राबाद संघाने धावांचा डोंगर रचला. त्यामुळे दोघेही नाराज आणि संतप्त होते. त्यातच मुंबईचा रोहित आउट झाला. त्याच वेळी ‘चेन्नई सुपर किंग्ज’चे चाहते असलेले बंडोपंत तिबिले तिथे आले. ‘रोहित झाला बाद, आता काय मुंबई जिंकणार,’ असे म्हणून त्यांनी अन्य दोघांना डिवचले.
रोहित बाद झाल्याने अगोदरच रागात असलेल्या झांजगेंना तिबिलेंचा राग आला. त्यातूनच बळवंत झांजगे यांनी तिबिलेच्या डोक्यावर शेजारी असलेली फळी मारली. त्यानंतर सागरनेही काठी मारल्याने तिबिले तिथेच बेशुद्ध पडले. डोक्याला गंभीर दुखापत झाल्याने दुसऱ्या दिवशी त्यांचा अंत झाला. एकाचा जीव गेला, दोघांना अटक झाली. म्हणजे तीन कुटुंबांना या वादाची झळ पाहोचली.
प्रकरण डोकी फोडण्यापर्यंत
बंडोपंत आणि बळवंत हे दोघेही जवळचे मित्र. रोज एकत्र बसून सामना पाहणारे हे दोघे मात्र वेगवेगळ्या संघाचे चाहते. त्यातून वाद झाला, वाढला आणि प्रकरण डोकी फोडण्यापर्यंत पोहोचले. गेल्या वर्षी कोल्हापूर जिल्ह्यातील कुरुंदवाड येथेही संघाचे फलक लावण्यावरून दोन संघांच्या चाहत्यांमध्ये तुफान मारामारी झाली होती. यावर्षी जीव घेण्यापर्यंत मजल गेली. आयपीएलमध्ये मुंबई आणि चेन्नई या दोन संघातील चाहत्यांमध्ये जोरदार खुन्नस असते. यातूनच ग्रामीण भागात आणि चौकाचौकात खेळाडूंचे फलक झळकवले जात आहेत.
खेळ हा आनंद लुटण्यासाठी असतो. खेळताना जिंकण्याची जिद्द आणि ईर्षा ठीक आहे; पण पाहताना केवळ आनंदच महत्त्वाचा. भावनिकता महत्त्वाची नाही. क्षणिक रागापोटी टोकाला जावून आपल्या हातून कोणतेही अतिरेकी कृत्य होऊ नये याची काळजी घ्यायलाच हवी.
– डॉ. धनंजय पाटील, मानसोपचारतज्ज्ञ
