सोलापूर : सोलापुरातील भाजपचे आमदार देवेंद्र कोठे आणि काँग्रेसचे शहराध्यक्ष चेतन नरोटे यांच्यात गेल्या दोन दिवसांपासून सुरू असलेल्या वादावर भाजपचे ज्येष्ठ आमदार सुभाष देशमुख यांनी प्रतिक्रिया दिली आहे. या वादाची दोन्ही पक्षांच्या वरिष्ठ नेत्यांनी दखल घेऊन संबंधितांना आपले बोलणे, वागणे आणि कृती कशी असावी, याबाबत समज द्यावी, अशी भूमिका आमदार देशमुख यांनी व्यक्त केली.
सोलापूर महापालिकेत एका कार्यक्रमानिमित्त आल्यानंतर त्यांनी पत्रकारांच्या प्रश्नाच्या उत्तरात त्यांनी ही भूमिका मांडली.कोठे आणि नरोटे यांच्यातील वादामुळे सोलापूरच्या राजकीय वर्तुळात चांगलीच चर्चा रंगली आहे. दोन्ही नेत्यांकडून एकमेकांवर आरोप-प्रत्यारोप होत असून, या वादाचे पडसाद राजकीय स्तरावर उमटत आहेत. या पार्श्वभूमीवर आमदार सुभाष देशमुख यांनी संयमाची भूमिका घेत वरिष्ठ नेत्यांनी हस्तक्षेप करण्याची अपेक्षा व्यक्त केली.“वाईटातून चांगलं कसं होईल, याचा आपण विचार केला पाहिजे. एखादी घटना किंवा वाद अनावधानाने घडलेला असू शकतो. मात्र, पक्षाचे वरिष्ठ या प्रकरणाची नक्कीच दखल घेतील आणि संबंधितांना समज देतील,” असे आमदार देशमुख यांनी सांगितले.
राजकारणात मतभेद असले तरी सार्वजनिक जीवनात बोलताना आणि वागताना संयम राखणे आवश्यक असल्याचेही त्यांनी सूचित केले. आपले बोलणे, वागणे आणि कृती कशी असावी, याबाबत दोन्ही पक्षांच्या वरिष्ठ नेत्यांनी संबंधितांना योग्य सूचना द्याव्यात, अशी अपेक्षा त्यांनी व्यक्त केली.या प्रकरणावर दोन्ही पक्षांचे वरिष्ठ नेते लक्ष घालून योग्य तोडगा काढतील, अशी आशाही आमदार सुभाष देशमुख यांनी व्यक्त केली. “दोन्ही पक्षांचे वरिष्ठ त्यांना योग्य कानमंत्र देतील आणि पाहिजे तसा तोडगा काढतील,” असे त्यांनी स्पष्ट केले.
