टेंभुर्णी – गेल्या ३५ वर्षांपासून पाण्याच्या प्रतीक्षेत असलेल्या आणि दुष्काळाच्या भीषण संकटामुळे चक्क विक्रीला काढण्याची वेळ आलेल्या तुळशी गावाच्या मदतीसाठी माजी केंद्रीय कृषिमंत्री शरद पवार सरसावले आहेत. गावातील दुष्काळी परिस्थितीची प्रत्यक्ष पाहणी करण्यासाठी त्यांनी तुळशी गावाला भेट देत ग्रामस्थांशी संवाद साधला आणि त्यांच्या समस्या जाणून घेतल्या. पिण्याचे पाणी, शेतीचे पाणी, जनावरांचा चारा आणि अडचणीत आलेला दुग्धव्यवसाय यांची माहिती घेत त्यांनी गावासाठी सुमारे ५० लाख रुपयांच्या निधीचा धनादेश देत आर्थिक मदतीचा हात पुढे केला. तसेच तुळशी गावाच्या दुष्काळी परिस्थितीची माहिती पंतप्रधान नरेंद्र मोदी यांच्यापर्यंत पोहोचविण्यासाठी खासदार सुप्रिया सुळे आणि खासदार धैर्यशील मोहिते-पाटील प्रत्यक्ष भेट घेऊन पाठपुरावा करतील, अशी ग्वाहीही त्यांनी ग्रामस्थांना दिली.
सोलापूर जिल्ह्यातील दुष्काळी परिस्थितीच्या पार्श्वभूमीवर शरद पवार यांनी तुळशी गावाला भेट दिली. यावेळी गावातील पाणीटंचाईची भीषणता आणि ग्रामस्थांना भेडसावणाऱ्या समस्यांची त्यांनी प्रत्यक्ष माहिती घेतली. गेल्या अनेक वर्षांपासून पाण्यापासून वंचित असलेल्या या गावात सध्या पिण्याच्या पाण्यासह जनावरांच्या चाऱ्याचा प्रश्न गंभीर बनला आहे. शेतीसाठी पाणी नसल्याने शेतकरी आर्थिक संकटात सापडले असून पशुधन जगविण्याचे मोठे आव्हान ग्रामस्थांसमोर उभे राहिले आहे.
तुळशी गावाचा प्रमुख व्यवसाय असलेल्या दुग्ध व्यवसायालाही दुष्काळाचा मोठा फटका बसला आहे. गावात सुमारे १० हजार लहान-मोठी जनावरे असून पूर्वी दररोज जवळपास ४० हजार लिटर दूध संकलन होत होते. मात्र, जनावरांना पुरेसा चारा आणि पाणी मिळत नसल्याने दूध उत्पादनात घट झाली आहे. जनावरांचे संगोपन करणेही कठीण बनल्याने पशुपालक शेतकरी दुहेरी संकटात सापडले आहेत. या परिस्थितीची माहिती घेत शरद पवार यांनी दुग्ध व्यवसायाच्या भवितव्याबाबत चिंता व्यक्त केली.
यावेळी ग्रामस्थांनी सीना-माढा उपसा सिंचन योजनेचे पाणी तुळशी गावाला तातडीने उपलब्ध करून देण्याची मागणी शरद पवार यांच्याकडे केली. गेल्या ३५ वर्षांपासून गावाला पाण्यापासून वंचित ठेवल्याची भावना व्यक्त करत ग्रामस्थांनी आपली व्यथा मांडली. सध्याच्या दुष्काळी परिस्थितीत गावात तातडीने चारा डेपो सुरू करावा, जनावरांसाठी पुरेशा प्रमाणात चारा उपलब्ध करून द्यावा, तसेच पिण्याच्या पाण्याची कायमस्वरूपी व्यवस्था करावी, अशी मागणी करण्यात आली.
**गाव विक्रीला काढण्याची वेळ का आली, ग्रामस्थांनी मांडली व्यथा!**
गेल्या ३५ वर्षांपासून पाण्यापासून वंचित राहिल्याने तुळशी गावातील नागरिकांमध्ये तीव्र नाराजी आहे. शेतीला पाणी नाही, पिण्याच्या पाण्याचा प्रश्न गंभीर आहे, जनावरांना चारा-पाणी मिळत नाही, अशा परिस्थितीत जगणे अवघड झाले आहे. सरकार आणि प्रशासनाचे लक्ष वेधण्यासाठी आम्हाला चक्क गावच विक्रीला काढण्याचा निर्णय घ्यावा लागला, अशी व्यथा ग्रामस्थांनी शरद पवार यांच्यासमोर मांडली. या गावाला पाणी मिळवून देण्यासाठी आपण विशेष लक्ष घालावे आणि आम्हाला न्याय मिळवून द्यावा, अशी आर्त विनवणी ग्रामस्थांनी केली.
यावेळी आमदार अभिजित पाटील यांनी तुळशी गावाच्या पाणीप्रश्नाबाबत माहिती दिली. आमदार झाल्यानंतर तुळशी गावाचा प्रश्न विधिमंडळात मांडला असून सरकारचे लक्ष वेधण्याचा प्रयत्न केला आहे. गावाच्या शेतीच्या पाण्याच्या प्रश्नासंदर्भात सातत्याने शासनाकडे पाठपुरावा सुरू असल्याचे त्यांनी सांगितले.
या वेळी धैर्यशील मोहिते-पाटील यांनी सांगितले की, माजी केंद्रीय कृषिमंत्री शरद पवार यांनी दुष्काळाच्या परिस्थितीची बारकाईने माहिती घेतली. या प्रश्नाचे गांभीर्य लक्षात घेऊन त्यांनी सरकारकडे पाठपुरावा केला. त्यानंतर आठ दिवसांच्या आत सरकारने दखल घेत संपूर्ण महाराष्ट्रात दुष्काळ जाहीर केला, असे त्यांनी नमूद केले. दुष्काळासंदर्भात सरकारला पाठविलेल्या पत्राचे वाचन यावेळी मनोज शहा यांनी केले.
उजनी धरणातील सुमारे १९ टीएमसी गाळ काढण्याची आवश्यकता असल्याचे सांगत खासदार मोहिते-पाटील यांनी धरणातील गाळ काढल्यास पाणीसाठ्याची क्षमता वाढण्यास मदत होईल, असे मत व्यक्त केले. तसेच उजनी धरणावर प्रस्तावित असलेल्या मंगळवेढा, दक्षिण सोलापूर यांसह भविष्यातील विविध सिंचन योजनांना पाणी उपलब्ध होण्याच्या दृष्टीने गाळ काढण्याचा विषय महत्त्वाचा असल्याचे त्यांनी सांगितले.
तुळशी गावातील दुष्काळी परिस्थितीची पाहणी केल्यानंतर शरद पवार यांनी गावासाठी सुमारे ५० लाख रुपयांच्या निधीचा धनादेश दिला. दुष्काळाच्या संकटात सापडलेल्या ग्रामस्थांना या मदतीमुळे दिलासा मिळण्याची अपेक्षा व्यक्त होत आहे. मात्र, केवळ आर्थिक मदतीने प्रश्न सुटणार नसून गावाला कायमस्वरूपी पाणी उपलब्ध होण्यासाठी शासनस्तरावर ठोस निर्णय होणे आवश्यक असल्याचे ग्रामस्थांनी सांगितले.
यावेळी सरपंच डॉ. शरद मोरे, मनोज शहा आणि प्रमोद वसेकर यांनी शरद पवार यांनी तुळशी गावाच्या प्रश्नात विशेष लक्ष घालून न्याय मिळवून द्यावा, अशी मागणी केली. तसेच कोणत्याही कंपनीच्या सीएसआर निधीतून गावाला मदत मिळवून देण्यासाठी प्रयत्न करावेत, अशी विनंतीही त्यांनी केली.
या प्रसंगी खासदार धैर्यशील मोहिते-पाटील, आमदार अभिजित पाटील, मोहोळचे आमदार राजू खरे, भारत शिंदे, वसंत देशमुख, शिवाजी पाटील, सक्षणा सलगर, पल्लवी पाटील, विनंती कुलकर्णी, मृदुला तळेकर, अश्विनी लोकरे यांच्यासह विविध क्षेत्रांतील मान्यवर आणि ग्रामस्थ उपस्थित होते.
शरद पवार यांच्या तुळशी गाव भेटीमुळे गेल्या ३५ वर्षांपासून प्रलंबित असलेला पाणीप्रश्न पुन्हा चर्चेत आला आहे. गावाचा पाणीप्रश्न, जनावरांच्या चाऱ्याची उपलब्धता आणि दुग्ध व्यवसायाला उभारी देण्यासाठी आता शासनाने तातडीने पावले उचलावीत, अशी अपेक्षा ग्रामस्थांकडून व्यक्त होत आहे. शरद पवार यांनी घेतलेल्या या पुढाकारानंतर तुळशी गावाला कायमस्वरूपी पाणी मिळणार का, याकडे संपूर्ण परिसराचे लक्ष लागले आहे.
चौकट : सोलापूर जिल्ह्यातील विकासकामांच्या आठवणींना शरद पवारांनी दिला उजाळा!
तुळशी गावातील ग्रामस्थांशी संवाद साधताना शरद पवार यांनी सोलापूर जिल्ह्यातील जुन्या आठवणींना उजाळा दिला. माजी उपमुख्यमंत्री विजयसिंह मोहिते-पाटील हे सोलापूर जिल्हा परिषदेचे अध्यक्ष असताना आणि आपण सोलापूर जिल्ह्याचे पालकमंत्री असताना जिल्ह्यात विविध विकासकामे केली होती, असे त्यांनी सांगितले. त्या काळातील विकासकामांच्या आठवणी त्यांनी यावेळी ग्रामस्थांसमोर कथन केल्या.
