टाटा समूहातील कंपन्यांच्या एकूण बाजारमूल्याने पाकिस्तानच्या ‘जीडीपी’ला मागे टाकले आहे. याचा अर्थ टाटा समूहाचे एकूण मूल्य आता आर्थिक संकटात सापडलेल्या पाकिस्तानच्या अर्थव्यवस्थेपेक्षा अधिक झाले आहे. मीठापासून सॉफ्टवेअरपर्यंतची निर्मिती करणाऱ्या या समूहाने वर्षभरात चांगला परतावाही दिला आहे.
एका अहवालानुसार, टाटा समूहाचे एकूण बाजारमूल्य (मार्केट कॅप) सुमारे ३६५ अब्ज डॉलर अर्थात ३० लाख कोटी रुपयांहून अधिक झाले आहे. समूहाच्या बाजारमूल्याने पाकिस्तानच्या ‘जीडीपी’ला मागे टाकण्याची कामगिरी केली आहे. आंतरराष्ट्रीय नाणेनिधीच्या (आयएमएफ) मते पाकिस्तानचा ‘जीडीपी’ जवळपास ३४१ अब्ज डॉलर आहे.
समूहात ‘टीसीएस’ अव्वल
टाटा समूहातील नोंदणीकृत कंपन्यांपैकी एक आणि आयटी क्षेत्रातील अग्रणी ‘टीसीएस’चे एकूण बाजारमूल्य सुमारे १५ लाख कोटी रुपये (१७० अब्ज डॉलर) आहे. ‘आयएमएफ’च्या मते, एकट्या ‘टीसीएस’चे बाजारमूल्य पाकिस्तानच्या अर्थव्यवस्थेच्या निम्मे आहे. समूहाच्या अन्य कंपन्यांनीही एकूण बाजारमूल्यात महत्त्वपूर्ण योगदान दिले आहे. ‘टीसीएस’पाठोपाठ ‘टाटा मोटर्स’ आणि ‘ट्रेंट’चे योगदान मोठे आहे.
‘टाटा मोटर्स’ची घोडदौड
‘टाटा मोटर्स’च्या समभागांत वर्षभरातच ११० टक्के तेजी आली असून, ‘ट्रेंट’चे समभाग २०० टक्क्यांनी उसळले आहेत. याशिवाय ‘टाटा टेक्नॉलॉजीज’, ‘टीआरएफ’, ‘बेनेरास हॉटेल्स’, ‘टाटा इन्व्हेस्टमेंट कॉर्पोरेशन’, ‘ऑटोमोबाइल कॉर्पोरेशन ऑफ गोवा’ आणि ‘आर्टलन इंजिनीअरिंग’ या समभागांनीही चांगली कामगिरी केली आहे. ‘टाटा समूहा’तील किमान २५ कंपन्यांची शेअर बाजारात नोंदणी करण्यात आली आहे. ‘टाटा केमिकल्स’च्या समभागांत वर्षभरात पाच टक्क्यांची घसरण झाली आहे. समूहातील ‘टाटा सन्स’, ‘टाटा कॅपिटल’, ‘टाटा अॅडव्हान्स्ड सिस्टीम’ आणि ‘एअर इंडिया’ या कंपन्या शेअर बाजारात नोंदणीकृत नाहीत.
पाकिस्तानची अर्थव्यवस्था संकटात
पाकिस्तानची अर्थव्यवस्था आर्थिक संकटात सापडली असून, देशावर १२५ अब्ज डॉलरचे विदेशी कर्ज आहे. याशिवाय ‘आयएमएफ’ने दिलेल्या तीन अब्ज डॉलरच्या मदतीचा उपक्रम मार्चमध्ये संपुष्टात येणार आहे. त्यामुळे पाकिस्तानची अवस्था आणखी बिकट होणार आहे. देशाची परकी चलनाची गंगाजळी आठ अब्ज डॉलरच्या आसपास आहे. या निधीतून केवळ दोन महिनेच आयात करता येईल. कर्ज आणि ‘जीडीपी’चे प्रमाण ७० टक्क्यांहून अधिक झाले आहे. त्यामुळे क्रेडिट रेटिंग एजन्सींनी चिंता व्यक्त केली आहे.
भारतीय अर्थव्यवस्था ३.७ ट्रिलियन डॉलरवर
भारताची अर्थव्यवस्था ३.७ ट्रिलियन डॉलरवर पोहोचली आहे. पाकिस्तानच्या तुलनेत भारतीय अर्थव्यवस्था जवळपास ११ पट मोठी आहे. आर्थिक वर्ष २०२८पर्यंत भारत जगातील तिसरी सर्वांत मोठी अर्थव्यवस्था होण्याची शक्यता आहे. सध्या भारत पाचव्या क्रमांकाची मोठी अर्थव्यवस्था आहे.
‘टाटा समूहा’चे बाजारमूल्य
३६५ अब्ज डॉलर
पाकिस्तानचा ‘जीडीपी’
३४१ अब्ज डॉलर
