मंगळवेढा – शहर व ग्रामीण भागात म्हशीच्या दुधात जर्शी गायीचे दूध भेसळ करुन दूध डेअर्यामधून त्याची विक्री करीत ग्राहकांच्या माथी मोठ्या प्रमाणात मारले जात असल्याच्या तक्रारी आहेत. दरम्यान राज्याच्या अन्न भेसळचे आयुक्त तुकाराम मुंढे यांनी गांभीर्यपुर्वक मंगळवेढ्यात लक्ष घालून या भेसळीचा पर्दाफाश करुन भेसळ करणार्या दुध डेअरीवर कारवाई करावी अशी मागणी जोर धरत आहे.
मंगळवेढा शहर व ग्रामीण भागात मोठ्या संख्येने दुध डेअर्या असून या डेअरी मध्ये पशू पालकाकडून येथे दुध घातले जाते. म्हशीच्या दुधाचा दर जास्त असून जर्शी गायीच्या दुधाचा दर कमी असल्यामुळे म्हशीच्या दुधाचा दर गायीच्या दुधाला मिळावा यासाठी चक्क जर्शी गायीचे दुध भेसळ करुन ते ग्राहकांच्या माथी मारले जात असल्याचा प्रकार दिसून येत आहे. जर्शी गायीचे दुध हे पिवळसर रंगाचे तर म्हशीचे दुध पांढरे शुभ्र असते. ग्राहकांनी डेअरी मधून नेलेले दुध तापविल्यानंतर ते पिवळसर रंगाचे भेसळयुक्त असल्याचे गृहिणींना निदर्शनास येत असून त्याची चवही वेगळीच लागत असल्याच्या तक्रारी आहेत. मध्यंतरी बोराळे येथे दुधात भेसळ होत असल्याचा प्रकार वरिष्ठांच्या कानावर गेल्यानंतर तेथील पथकाने सदर डेअरीवर धाड टाकून कारवाई केली होती. त्यानंतर जिल्ह्याच्या अन्नभेसळ पथकाने अद्यापही कोणतीच कारवाई न केल्याने भेसळ करणार्यांची संख्या दिवसेंदिवस वाढत चालल्याचे चित्र आहे. मोठमोठ्या डेअर्यामधूनही भेसळ होत असल्याच्या तक्रारीचा सूर निघत असल्याने अन्न भेसळचे आयुक्त तुकाराम मुंढे यांनी मंगळवेढयात अचानक पथके पाठवून शहरातील व ग्रामीण भागातील डेअरीमधील दुधांची तपासणी करुन संबंधीतावर कारवाई करावी अशी मागणी नागरिक व ग्राहकामधून होत आहे.
फोटो ओळी
दूध डेअरी मधून आणलेले पिवळसर दिसणारे भेसळयुक्त दुध तर दुसर्या छायाचित्रात पांढरे शुभ्र दिसणारे म्हशीचे दुध दिसत आहे
