मुंबई, भिवंडीमार्गे नाशिकमध्ये चोरीछुपे एमडीचा पुरवठा होत असून, एकाला गुन्हे शाखा युनिट एकने अटक केली आहे.
पाच महिन्यांपूर्वी नाशिकपाठोपाठ सोलापूर, छत्रपती संभाजीनगर, पुण्यात एमडी (मेफेड्रॉन) तयार करणारे कारखाने उद्ध्वस्त करून ड्रग्ज माफियांना गजाआड केल्यानंतरही नाशिक शहरातील एमडीची तस्करी संपलेली नाही. मुंबई, भिवंडीमार्गे नाशिकमध्ये चोरीछुपे एमडीचा पुरवठा होत असून, एकाला गुन्हे शाखा युनिट एकने अटक केली आहे. यासह दुसऱ्याचा माग काढत असताना शहरात नवे ‘ड्रग्ज पेडलर्स’ सक्रीय होत असल्याचा संशय बळावला आहे.
शहरात नवे ‘ड्रग्ज पेडलर्स’
ड्रग्ज माफिया संशयित ललित पानपाटील, त्याचा भाऊ भूषण व मित्र अभिषेक बलकवडे यांचा नाशिकमधील कारखाना, संशयित सनी पगारे, अर्जुन पिवाल गँगचा सोलापुरातील कारखाना व वडाळ्यातील एमडी तस्कर संशयित छोटी भाभी या टोळ्यांना ऑक्टोबर ते डिसेंबर २०२३ मध्ये पोलिसांनी बेड्या ठोकल्या. वीसपेक्षा जास्त संशयितांना अटक झाल्यावर एमडीचा विळखा तुटल्याची शक्यता होती. परंतु, हे संशयित कारागृहात असताना दुसरे संशयित या एमडी तस्करीत सक्रीय झाल्याचा संशय आहे. त्यानुसार गुन्हे शाखा युनिट एकच्या पथकाने दोन दिवसांपूर्वी म्हसरूळ परिसरात संशयित धम्मराज उर्फ सागर शार्दुल (वय १८, रा. राजवाडा, म्हसरुळ) याला अटक केली. त्याच्याकडून ८७ हजारांचे पाच ग्रॅम एमडी जप्त करण्यात आले. संशयित एमडी कोणाला विक्री करण्यासाठी आला होता, हे अद्याप स्पष्ट झालेले नाही. परंतु, त्याच्या आणखी एका साथीदाराच्या मागावर पोलिस असल्याचे कळते.
परराज्यातील कनेक्शन?
मुंबईतील साकीनाका पोलिसांनी नाशिकमध्ये एमडी कारखाना उद्ध्वस्त केल्यावर धडक कारवाईची चर्चा झाली. संशयितांना अटक झाल्यावर या प्रकरणाचा तपास थंडावला. नाशिकच्या पोलिसांनी तीन टोळ्या गजाआड करून सोलापुरातील कारखाने उद्ध्वस्त केले. यावेळी गुजरात कनेक्शनही उघड झाले होते. दरम्यान, मुंबईतल्या टोळ्या अजूनही सक्रीय असल्याचा पोलिसांना संशय आहे. नाशिकमधील एमडी तस्कर कारागृहात असताना एमडी पुरविणाऱ्या टोळ्या शोधण्याचे आव्हान पोलिसांसमोर आहे. त्यामुळे नशेचा विळखा सुटण्याऐवजी अधिक घट्ट होत असल्याची गंभीर बाब समोर येत आहे. विशेष म्हणजे, दोन दिवसांपूर्वी जप्त केलेले एमडी चांगल्या दर्जाचे असून, त्याचा कारखाना मुंबईत असेल की परराज्यात याबाबतही तपास सुरू आहे.
