सोलापूर : वालचंद इन्स्टिट्यूट ऑफ टेक्नॉलॉजी आणि सँडविक (Sandvik) यांच्यात झालेला सामंजस्य करार हा केवळ शैक्षणिक उपक्रम न राहता विद्यार्थ्यांच्या भविष्यास आकार देणारा परिवर्तनाचा नवा अध्याय ठरत आहे.
उद्योगविश्वाशी थेट नाळ जोडत विद्यार्थ्यांना प्रत्यक्ष कामाचा अनुभव, अत्याधुनिक तंत्रज्ञानाचा परिचय, आंतरराष्ट्रीय दर्जाच्या प्रकल्पांमध्ये सहभाग, तसेच प्रतिष्ठित कंपन्यांमध्ये करिअर घडविण्याची संधी उपलब्ध करून देणारा हा उपक्रम डब्ल्यू.आय.टी.च्या दूरदृष्टीचा ठोस प्रत्यय देणारा आहे.
या करारामुळे विद्यार्थी केवळ पदवीधर न राहता आत्मविश्वासपूर्ण, कौशल्यसंपन्न आणि जागतिक स्तरावर स्पर्धा करण्यास सक्षम अभियंते म्हणून घडणार आहेत.
डब्ल्यू.आय.टी.ने अभ्यासक्रमात मास्टरकॅम (Mastercam) या जागतिक दर्जाच्या सॉफ्टवेअरचा समावेश करून विद्यार्थ्यांसाठी ज्ञान आणि कौशल्य यांचा प्रभावी संगम घडवून आणला आहे. ‘डिझाईन ते मॅन्युफॅक्चरिंग’ या संपूर्ण प्रक्रियेचा प्रत्यक्ष अनुभव घेताना विद्यार्थ्यांना उत्पादन क्षेत्रातील सूक्ष्म बारकावे समजून घेता येत आहेत. ‘मास्टरकॅम युनिव्हर्सिटी सर्टिफिकेशन’मुळे विद्यार्थ्यांना आंतरराष्ट्रीय स्तरावर मान्यता प्राप्त प्रमाणपत्र मिळवण्याची सुवर्णसंधी उपलब्ध झाली असून, त्यांच्या रोजगारक्षमतेत लक्षणीय वाढ होत आहे.
याशिवाय ‘ट्रेन-द-ट्रेनर’ उपक्रमाद्वारे प्राध्यापक आणि विद्यार्थ्यांना 2D/3D मॉडेलिंग, मल्टी-ॲक्सिस मशिनिंग, हाय-स्पीड मशिनिंग आणि सिम्युलेशन यांसारख्या अत्याधुनिक तंत्रज्ञानाचे प्रशिक्षण देण्यात आले आहे. या प्रशिक्षणामुळे विद्यार्थ्यांचा आत्मविश्वास उंचावून ते बदलत्या तंत्रज्ञानाशी सुसंगत राहण्यास सक्षम होत आहेत.
संस्थेमध्ये स्थापन करण्यात आलेले ‘सेंटर ऑफ एक्सलन्स फॉर अॅडव्हान्स्ड मॅन्युफॅक्चरिंग’ हे आधुनिक तंत्रज्ञानाचे केंद्रबिंदू ठरत असून, डिजिटल मॅन्युफॅक्चरिंग, प्रिसिजन इंजिनिअरिंग, सीएनसी प्रोग्रामिंग आणि इंडस्ट्री ४.० यांसारख्या प्रगत संकल्पनांवर आधारित प्रशिक्षण विद्यार्थ्यांना दिले जात आहे. त्यामुळे विद्यार्थ्यांना उद्योगांच्या अपेक्षांनुसार स्वतःला घडविण्याची आणि करिअरचा स्पष्ट मार्ग निश्चित करण्याची संधी मिळत आहे.
या उपक्रमामुळे लाईव्ह प्रोजेक्ट्स, इंटर्नशिप आणि तज्ज्ञ मार्गदर्शनाच्या माध्यमातून विद्यार्थ्यांची विश्लेषणक्षमता, नवोन्मेषी विचारशक्ती आणि समस्या सोडवण्याची क्षमता अधिक सक्षम होत आहे. परिणामी, ते ‘इंडस्ट्री-रेडी’ बनून रोजगाराच्या संधी अधिक प्रभावीपणे साध्य करू शकतात. या उपक्रमासाठी वालचंद शिक्षण समूहाचे मानद सचिव डॉ. रणजित गांधी, विश्वस्त वैभव गांधी, भूषण शहा, पराग शहा, प्राचार्य डॉ. विजय आठवले आणि विभागप्रमुख डॉ. भाग्येश देशमुख यांचे मोलाचे सहकार्य लाभले.
एकूणच, डब्ल्यू.आय.टी. चा हा उपक्रम सोलापूरसारख्या शहरातील विद्यार्थ्यांसाठी जागतिक दर्जाच्या संधींचे दालन उघडणारा ठरत असून, “विद्यार्थी हिताय” या संकल्पनेला न्याय देणारा आहे. उद्योग आणि शिक्षण यांचा प्रभावी संगम साधत भविष्यातील कुशल, सक्षम आणि नवोन्मेषी अभियंते घडविण्याच्या दिशेने डब्ल्यू.आय.टी.ची ही वाटचाल निश्चितच प्रेरणादायी ठरणार आहे.
