दिवा रेल्वे स्थानकाजवळील दिवा पूर्व-पश्चिम भागाला जोडणाऱ्या रेल्वे मार्गावरील उड्डाणपुलाचे काम वेगाने करण्यात येईल. त्यासाठी आवश्यक भूसंपादन आणि जोड रस्ते यांच्या कामाला गती देण्याचे निर्देश, महापालिका आयुक्त श्री. अभिजीत बांगर यांनी दिले.
दिवा पूर्व आणि पश्चिम येथील उड्डाणपुलाचे काम आणि परिसरातील व्यवस्था यांची पाहणी शुक्रवारी आयुक्त श्री. बांगर यांनी केली. या पाहणी दौऱ्याच्या वेळी आमदार प्रमोद पाटील, माजी उपमहापौर रमाकांत मढवी यांच्यासह नगर अभियंता प्रशांत सोनाग्रा, उप नगर अभियंता रामदास शिंदे, विकास ढोले, कार्यकारी अभियंता धनंजय मोदे, दीपक माने आदी अधिकारी उपस्थित होते.
उड्डाणपुलाचे जोड रस्ते आणि गटार यांचे काम पूर्ण झाल्यावर भिंतीचे काम करता येईल. त्यामुळे येत्या तीन महिन्यात हे काम पूर्ण करावे. पूलाच्या दोन्ही बाजूंच्या भागात जिथे भूसंपादन पूर्ण झाले आहे तेथील रस्त्याची कामे १५ जानेवारीपर्यंत पूर्ण करण्यात यावीत. वेगाने काम करताना गुणवत्ता राखली जाणे आवश्यक आहे. त्यात तडजोड करू नये. तसेच, दिवस येथील वर्दळ लक्षात घेता रात्रीच्या वेळी जास्तीत जास्त काम करण्यावर भर द्यावा, असे आयुक्त श्री. बांगर यांनी स्पष्ट केले. दिवा पश्चिम येथील महापालिका शाळा परिसर, गावदेवी मंदिर या पट्ट्यात उड्डाणपूलाची मार्गिका उतरणार आहे. त्या मार्गिकेच्या संपूर्ण भागाची पाहणी आयुक्त श्री. बांगर यांनी केली. रेल्वेचेही उड्डाणपुलासाठी समांतर काम सुरू आहे. त्यांच्या कामाशी समन्वय साधून पूर्व बाजूचे गर्डर लॉन्चिंग आणि डेक स्लॅब ही कामे ३० जूनपर्यंत पूर्ण होऊ शकतील. त्यानुसार नियोजन करावे असे निर्देश आयुक्त श्री. बांगर यांनी दिले.
भूसंपादनाचा शिल्लक विषय मार्गी लावण्यासाठी स्थानिक नागरिक, शहर विकास विभाग यांच्यासह येत्या १५ दिवसांत बैठक आयोजित करण्यात येईल. त्या बैठकीत तोडगा काढून उड्डाणपुलाचे काम अधिकाधिक जलद कसे पूर्ण करता येईल ते पाहू, असे आयुक्त श्री. बांगर यांनी स्पष्ट केले.
दिवा येथील रेल्वे मार्गावर क्रॉसिंग नं. २९/सी येथील रेल्वे उड्डाणपूलाचा कार्यादेश जून २०१९ रोजी देण्यात आला होता. त्यातील रेल्वेचा स्पॅन ९३.६४ मीटरचा आहे. पश्चिम बाजूची लांबी ३०१ मीटर तर पूर्व बाजूची लांबी ३४४४ मीटर एवढी आहे. रुंदी १४.५० मीटर असून दोन्ही बाजूस पदपथांची व्यवस्था आहे.
रस्त्यासाठी रेल्वेशी चर्चा उड्डाणपूलाच्या पाहणीनंतर, दिवा पूर्व आणि पश्चिम येथील रेल्वेला समांतर असलेल्या कल्याण दिशेकडील कच्च्या रस्त्यांची पाहणी आयुक्त श्री. बांगर यांनी केली. रेल्वेच्या मालमत्तेतील रस्त्याच्या काही भागामुळे येथील काम थांबले असल्याची माहिती स्थानिक नागरिकांनी दिली. त्यानुसार, अधिक माहिती घेऊन रेल्वेशी संबंधित अधिकारी चर्चा करतील, असे आयुक्तांनी सांगितले.
शिळफाटा ते दिवा येथील पाईपलाईनचे काम सुरू होणार दिवा पूर्व येथील काही भागातील रस्त्याचे डांबरीकरण लवकरच केले जाणार आहे. त्याचप्रमाणे, शिळफाटा ते दिवा येथील साडेपाच किमी लांबीच्या ९०० मीटर व्यासाच्या पाईपलाईनचे काम दसऱ्याला सुरू होईल, असेही आयुक्त श्री. बांगर यांनी स्पष्ट केले. मुंब्रा देवी रोड, स्टेशन रोड, दिवा सर्कल या भागाची पाहणीही करण्यात आली. काही भागात रस्त्याच्या मध्ये असलेल्या विजेचे खांब काढण्याबद्दल आयुक्तांनी विद्युत विभागाला निर्देश दिले.
