सोलापूर – दिवाळी सणासाठी तसेच माहेरी येणाऱ्या लाडक्या बहिणीं व नागरिकांची सोय व्हावी म्हणून सोलापूर एसटी आगाराच्या वतीने सोलापूर पुणे मार्गावर जादा ६० गाड्यांचे नियोजन करण्यात आल्याची माहिती सोलापूर एसटी विभागाचे विभाग नियंत्रक अमोल गोंजारी यांनी दिली.
विद्यार्थ्यांना सध्या शाळेच्या सुट्ट्या लागल्या असून त्यांना मामाच्या गावाला जाण्याची ओढ लागलेली आहे. त्याचबरोबर सासुरवाशीन सुनेलाही माहेराची आतुरता असून या सर्वांच्या सोयीसाठी राज्य परिवहन एसटी महामंडळ सज्ज झाले आहे. एसटी महामंडळाच्यावतीने सोलापूर-पुणे प्रवाशांसाठी जादा ६० गाड्यांचे नियोजन केले आहे. एसटी बरोबरच रेल्वेने ही दिवाळी करता वाढीव फेऱ्यांचे नियोजन केले आहे. दिवाळीसाठी जालना- तिरुचहानुर दरम्यान विशेष गाडी सुरू आहे. या गाड्यांचे १४ फेऱ्या आहेत. ही गाडी सोलापूर विभागातील दहा स्थानकावर थांबणार आहे. एसएमव्हीटी बेंगळुरू बिदर या मार्गावरही विशेष रेल्वे गाडीची व्यवस्था करण्यात आली आहे. सोलापूर विभागातील कलबुर्गी-शहाबाद आणि वाडी स्थानकावर यागाडीला थांबा आहेत.
दरम्यान, दिवाळीनिमित्त सोडण्यात आलेल्या ज्यादा बससेवेला प्रवाशांमधून चांगला प्रतिसाद मिळत आहे. दिवाळीच्या सुट्टीत महिला आपल्या माहेरी जाण्यास बस स्थानकावर एकच गर्दी करत असून, यामुळे प्रवाशांच्या सेवेसाठी बसेस सज्ज असल्याचे दिसून येत आहेत
