सोलापूर : सोलापूर शहर हे ऐतिहासिक, औद्योगिक आणि सांस्कृतिक दृष्ट्या महत्त्वाचे शहर असूनही, शहराच्या सर्व मुख्य प्रवेशद्वारांवर “सोलापूर” असे नामफलक नसल्याने बाहेरून येणाऱ्या नागरिकांमध्ये आणि पर्यटकांमध्ये संभ्रमाची परिस्थिती निर्माण होत आहे. महापालिकेच्या स्तरावर योग्य नियोजन करून लवकरच हे फलक उभारले गेले तर स्मार्ट सोलापूरचे सौंदर्य अधिक वाढेल.
सोलापूर शहर हे ऐतिहासिक, औद्योगिक आणि सांस्कृतिक वारशाने समृद्ध आहे. शहराच्या मुख्य प्रवेशद्वारांवर “सोलापूर”चे नामफलक नसल्याने येणाऱ्या प्रवाशांमध्ये संभ्रम निर्माण होतो. पुणे रोड, उस्मानाबाद रोड, विजयपूर रोड, तुळजापूर रोड, अक्कलकोट रोड आणि हायवेवरील इतर प्रवेशबिंदूंवर सोलापूर शहरात प्रवेश होत असल्याचे दर्शवणारे फलक लावणे गरजेचे आहेत. अनेकांना शहराच्या हद्दीत प्रवेश झाल्याची माहिती मिळत नाही. दिशादर्शक छोटे फलक आहेत मात्र सोलापूर महापालिकेच्या माध्यमातून सर्व मुख्य प्रवेशद्वारात मोठे फलक आवश्यक आहेत.
सोलापूर महापालिकेने शहराच्या प्रमुख प्रवेशद्वारांवर आकर्षक आणि दूरवरून दिसतील असे “सोलापूर स्वागत करीत आहे” अशा स्वरूपाचे नामफलक लावावेत. यामुळे शहराची ओळख ठळकपणे दिसेल तसेच पर्यटक, व्यावसायिक व प्रवासी यांना दिशा आणि माहिती मिळेल.
अनेक शहरांमध्ये सीमेवर भव्य स्वागतद्वार व नामफलक बसवलेले आहेत. त्याप्रमाणे सोलापूरसारख्या महत्त्वाच्या शहरात अशी सुविधा असल्यास शहराच्या प्रतिमा अधिक चांगली दिसेल.
महापालिकेने तातडीने या बाबीचा विचार करून प्रत्येक मुख्य प्रवेशद्वारावर सोलापूरचे ओळख दर्शवणारे नामफलक व स्वागतद्वार उभारण्याची गरज वर्तवली जात आहे. महापालिकेच्या स्तरावर योग्य नियोजन करून लवकरच हे फलक उभारले गेले तर सोलापूरचे सौंदर्य अधिक वाढेल. सोलापूर शहरातील मुख्य प्रवेशद्वारांवर “सोलापूर”चे नामफलक लावण्याची गरज आहे.
असे असावे शहराचे मुख्य प्रवेशद्वार
सोलापूर महानगरपालिकेने प्रत्येक मुख्य मार्गावर भव्य सोलापूर शहरात स्वागत फलक उभारावे.शहराच्या सर्व प्रवेशद्वारांवर आकर्षक व दूरवरून दिसतील असे “सोलापूर नगरीत स्वागत !” किंवा “Welcome to Solapur” असे नामफलक उभारावेत. शहराची ऐतिहासिक, औद्योगिक आणि सांस्कृतिक ओळख दर्शवणारी कलाकृती फलकांवर असावी. नामफलक आकर्षक विद्युत दिव्यांनी सजवून पर्यटकांना शहराचे स्वागत करणारा अनुभव द्यावा. यामुळे सोलापूरचे सौंदर्य, प्रतिष्ठा, ओळख आणि अभिमान अधिक वाढणार आहे.
