सोलापूर : सोलापूर महापालिका सार्वत्रिक निवडणुकीसाठी मंगळवार दि. 11 नोव्हेंबर 2025 रोजी सकाळी 9.30 वाजता हुतात्मा स्मृती मंदीर, सोलापूर येथे महिलांचे आरक्षण सोडतीचा कार्यक्रम होणार आहे. या प्रारूप आरक्षण सोडती नंतर हरकती व सूचना मागविण्यासाठी दि. 17 नोव्हेंबर 2025 ते 24 नोव्हेंबर 2025 पर्यंत अंतिम मुदत आहे
महानगरपालिका सार्वत्रिक निवडणूक 2025 अंतर्गत दि. 13 ऑक्टोबर 2025 रोजी अंतिम प्रभाग रचना प्रसिध्द करण्यात आलेली आहे. आता राज्य निवडणूक आयोगाकडून प्रभाग रचना आरक्षण सोडतीचा कार्यक्रम जाहीर झालेला आहे. यामध्ये दि. 30 ऑक्टोबर 2025 ते 4 नोव्हेंबर 2025 पर्यंत आरक्षित जागांची संख्या निश्चित करुन त्यास राज्य निवडणूक आयोगाची मान्यता मिळण्यासाठी सोलापूर महानगरपालिका आयुक्त डॉ. सचिन ओम्बासे यांच्या कडून प्रस्ताव सादर करण्यात येणार आहे. त्यानंतर दि. 8 नोव्हेंबर रोजी आरक्षण सोडतीची जाहिर सूचना वृत्तपत्रात प्रसिध्द करण्यात येणार असून दि. 11 नोव्हेंबर 2025 रोजी सकाळी 9.30 वाजता हुतात्मा स्मृती मंदीर, सोलापूर येथे महिलांचे आरक्षण सोडतीचा कार्यक्रम घेण्यात येणार आहे.
प्रारूप आरक्षण सोडती नंतर प्रारुप आरक्षणावर हरकती व सूचना मागविण्यासाठी विहित नमुन्यात दि. 17 नोव्हेंबर 2025 ते 24 नोव्हेंबर 2025 पर्यंत अंतिम मुदत आहे. प्राप्त झालेल्या हरकती व सूचनांवर विचार करुन महानगरपालिका आयुक्त हे दि. 25 नोव्हेंबर 2025 ते दि. 1 डिसेंबर 2025 या कालावधीत निर्णय घेणार असून अंतिम आरक्षण विहित नमुन्यात शासन राजपत्रात सादर करण्याचा दि. 2 डिसेंबर 2025 असा आहे.
अनुसूचित जाती, अनुसूचित जमातीकरीता, नागरिकांच्या मागासवर्ग प्रवर्गाकरिता आरक्षित प्रभाग निश्चित कशापध्दतीने करण्यात येणार आहे. याची माहिती सोलापूर महानगरपालिकेच्या https://www.solapurcorporation.gov.in या संकेतस्थळावर प्रसिध्दी करण्यात आलेली आहे, असे महापालिका आयुक्त डॉ. सचिन ओम्बासे यांनी म्हटले आहे.
—-
