पंढरपूर – येथील मॉडर्न एज्युकेशन सोसायटी संचलित, अरिहंत पब्लिक स्कूल सीबीएसई या प्रशालेचे इयत्ता नववीचे विद्यार्थी आयुष चारुदत्त लाड व विराज विशाल पावले या दोन विद्यार्थ्यांचा ‘स्मार्ट स्कूल ए स्टेप टुवर्डस् फ्युचर लर्निंग’ हा प्रकल्प सीबीएसई प्रादेशिक विज्ञान प्रदर्शन पुणे विभागातून राष्ट्रीय स्तरावर निवडला गेला आहे. या प्रदर्शनात राज्यभरातील १६८ प्रकल्प सहभागी झाले होते, त्यात प्रशालेतील विद्यार्थ्यांनी ‘उदयोन्मुख तंत्रज्ञान STEM या थोममध्ये राज्यस्तरीय अव्वल क्रमांक मिळवला.
प्रकल्पाची निवड सीबीएसई राष्ट्रीय विज्ञान प्रदर्शन दिल्लीसाठी झाली असून, हा प्रदर्शनाचा कार्यक्रम डिसेंबर महिन्यात आयोजित केला जाणार आहे. या स्पर्धेसाठी शाळेतील प्राचार्या
सुप्रिया बहिरट तसेच विज्ञान शिक्षिका सीमा घोडके व योगिता गोरे तसेच इतर शिक्षकांनी त्यांना मार्गदर्शन केले. दोन्ही विद्यार्थ्यांचा संस्थेच्या वतीने सत्कार करण्यात आला.
याशिवाय महाराष्ट्र नवनिर्माण शिक्षक शिक्षकेतर सेना प्रणित उपक्रमशील संस्था पुरस्कार २०२५ हा महत्त्वपूर्ण राज्यस्तरीय पुरस्कार अरिहंत पब्लिक स्कूलला मिळाला आहे. सोलापूर येथील एका कार्यक्रमात संस्थेस प्रदान करण्यात आला आहे. शिक्षण, सामाजिक, कला आणि क्रीडा क्षेत्रात सातत्याने उल्लेखनीय योगदान देणाऱ्या या संस्थेच्या कार्याची दखल घेत अरिहंत पब्लिक स्कूल सन्मान दिला गेला. संस्थेचे अध्यक्ष डॉ. शितल शहा, सचिव उज्वल दोशी उपस्थित होते.
