बार्शी – बार्शी कृषी उत्पन्न बाजार समितीच्या निवडणुकीत विरोधकांची धोबीपछाड करणारे कृपया समितीचे माजी सभापती ऍड. रणवीर राऊत यांची भाजपच्या युवा मोर्चाच्या जिल्हाध्यक्षपदी (पश्चिम विभाग) निवड करण्यात आली. भाजपचे पश्चिम विभागाचे जिल्हाध्यक्ष चेतनसिंह केदार- सावंत यांनी शुक्रवारी बार्शीत येवून लक्ष्मी सोपान बाजार समितीच्या आवारात ही निवड जाहीर केली.
यावेळी भाजप बार्शी शहराध्यक्ष महावीर कदम, तालुकाध्यक्ष मदन दराडे, दादासाहेब गायकवाड, सोनू पवार, रोहित पाटील, संदीप मिरगणे, अमोल डिसले, माजी नगरसेवक संदेश काकडे आदी उपस्थित होते.
बार्शी शहर आणि तालुक्यातील युवक नेहमीच मुख्यमंत्री देवेंद्र फडणवीस, पालकमंत्री जयकुमार गोरे आणि आमदार राजेंद्र राऊत यांच्या पाठीशी खंबीरपणे उभे राहिले आहेत. त्याच पद्धतीने जिल्ह्यातील युवकांना देखील भाजपच्या पाठीशी राहण्यासाठी संघटन करण्यात येईल. जिल्ह्यातील मोठ्या प्रमाणात तरुण भाजपकडे वळवण्याचा प्रयत्न राहील, अशी खात्री यावेळी नूतन जिल्हाध्यक्ष रणवीर राऊत यांनी व्यक्त केली. निवडीनंतर रणवीर राऊत यांचा चेतनसिंह केदार यांनी पुष्पहार घालून सत्कार केला. तसेच माजी आमदार राजेंद्र राऊत यांनी चेतनसिंह केदार-सावंत यांच्या पत्नी सुजाता केदार- सावंत या सांगोला न. प. मध्ये बिनविरोध निवडून आल्याबद्दल त्यांचा सत्कार करण्यात आला.
