सोलापूर : ‘भारतमाता की जय’, ‘वंदे मातरम’, ‘विद्यार्थी परिषद जिंदाबाद’ च्या गजरात अखिल भारतीय विद्यार्थी परिषदेचे पूर्व कार्यकर्ता संमेलन उत्साहात झाले. अभाविपच्या स्थापनेत सिंहाचा वाटा असलेले प्रा. यशवंतराव केळकर यांच्या जन्मशताब्दीचे औचित्य साधून गुरुवारी श्री शिवछत्रपती रंगभवन सभागृहात हे संमेलन झाले.
प्रारंभी दीपप्रज्वलन करून कार्यक्रमाचे उद्घाटन झाले. याप्रसंगी व्यासपीठावर अभाविपचे पूर्व राष्ट्रीय सहसंघटनमंत्री आणि जेष्ठ कार्यकर्ते सदाशिवराव देवधर, अभाविपचे पूर्व पूर्णवेळ कार्यकर्ते श्यामसुंदर जाजू, सहकार भारतीचे राष्ट्रीय पूर्व कार्यकर्ता संमेलनाचे प्रमुख संघटनमंत्री संजय पाचपोर, अभाविपचे राष्ट्रीय कार्यकारी परिषदेचे विशेष निमंत्रित सदस्य प्रा. डॉ. प्रशांत साठे, पूर्व कार्यकर्ता संमेलन प्रमुख प्राचार्य गजानन धरणे, अभाविपचे पश्चिम महाराष्ट्र प्रदेशाध्यक्ष प्रा. डॉ. शांतिनाथ बागेवाडी, महानगर अध्यक्ष प्रा. डॉ. प्रशांत चाबुकस्वार, महानगरमंत्री अनघा जाधव उपस्थित होते. यावेळी प्रा. यशवंतराव केळकर यांच्या जन्मशताब्दीनिमित्त विद्यार्थी निधी प्रस्तुत यशवंतराव केळकर यांच्या जीवनचरित्रावर आधारित अभिवाचनाचा कार्यक्रम मिलिंद भणगे आणि सहकाऱ्यांनी सादर केला.
अभाविपचे पूर्व राष्ट्रीय सहसंघटनमंत्री सदाशिवराव देवधर म्हणाले, अखिल भारतीय विद्यार्थी परिषद ही संघटना शैक्षणिक आणि सामाजिक कामाचे आदर्श उदाहरण आहे. समाज जीवनात वावरताना आपण समाजाचे देणे लागतो हा विचार अभाविपच्या वर्तमान आणि पूर्व कार्यकर्त्यांनी कायम सोबत ठेवावा.
सहकार भारतीचे राष्ट्रीय संघटनमंत्री संजय पाचपोर म्हणाले, विविध क्षेत्रांमध्ये उत्तम व्यक्तिमत्व घडवण्याचे काम अभाविपने केले आहे. अभाविपच्या पूर्व कार्यकर्त्यांनी देशभरात प्रचंड मोठे सेवा प्रकल्प कार्यरत केले आहेत. समाजाच्या ऋणातून उतराई होण्याचा प्रयत्न करण्याचे संस्कार अभाविपच्या कार्यकर्त्यांवर आहेत. मदनदासजी, सदाशिवराव देवधर, प्रा. यशवंतराव केळकर अशी महान कार्य करणारी व्यक्तिमत्वे सोलापूरने अभाविपच्या माध्यमातून भारतमातेच्या सेवेसाठी दिली आहेत, असेही श्री. पाचपोर याप्रसंगी म्हणाले.
अभाविपचे पूर्व पूर्णवेळ कार्यकर्ते श्यामसुंदर जाजू म्हणाले, प्रा. यशवंतराव केळकर हे उत्तम मनुष्य निर्माणाचे कार्य करत होते. नैतिकता शब्दातून सांगण्यापेक्षा ती कृतीत आणण्यावर त्यांचा भर होता. भाषणातील आदर्श प्रत्यक्ष जगणारे ते मार्गदर्शक होते.
अभाविपचे राष्ट्रीय कार्यकारी परिषदेचे विशेष निमंत्रित सदस्य प्रा. डॉ. प्रशांत साठे म्हणाले, प्रत्येक कामाला कार्यकर्ता आणि प्रत्येक कार्यकर्त्याला काम अशी भावना ठेवून काम करणारे अभाविप हे ७६ वर्षांचे युवा संघटन आहे. देशभरात १ हजार ३६ पूर्ण वेळ कार्यकर्ते आणि आयटीआय ते आयआयटीपर्यंत ७६ लाख ९७ हजार सदस्य असणारी ही प्रचंड मोठी विद्यार्थी संघटना आहे, असेही प्रा. डॉ. साठे याप्रसंगी म्हणाले.
प्राचार्य गजानन धरणे यांनी प्रास्ताविक केले. चेतन शर्मा यांनी परिचय करून दिला. प्रा. सोनाली वैद्य यांनी सूत्रसंचालन तर प्रा. डॉ. प्रशांत चाबुकस्वार यांनी आभार प्रदर्शन केले. उर्वी पटेल आणि भाग्यश्री दिवसे यांनी म्हटलेल्या ‘वंदे मातरम’ ने कार्यक्रमाचा समारोप झाला.
