सोलापूर – उमेदवारी भरण्यासाठी मंगळवारी शेवटचा दिवस होता, त्यामुळे इच्छुक उमेदवारांची चांगलीच तारांबळ उडाली. वेळेच्या पूर्वी आणि योग्य कागदपत्रे व एबी फॉर्म दाखल करण्यासाठी मोठ्या प्रमाणात गर्दी नॉर्थकोट मैदान येथे होती. दोन्ही शिवसेने च्यावतीने उमेदवारी भरण्यासाठी इच्छुक उमेदवार उपस्थित होते. परंतु भाजपकडून ज्यांना शेवटपर्यंत कोणताही निरोप न मिळाल्याने व एबी फॉर्म मिळण्याची शासंकता कमी असल्याने त्यांनी देखील एकनाथ शिंदे गटाचा एबी फॉर्म घेऊन अर्ज भरल्याचे दिसून आले. दुसरीकडे उमेदवारी अर्ज भरून गेल्यानंतर उद्धव बाळासाहेब ठाकरे पक्षातील माजी नगरसेवक व पदाधिकाऱ्यांनी राजीनामे दिल्याचे दिसून आले.
भाजपचे माजी नगरसेवक सुरेश पाटील यांनी एकनाथ शिंदे गटाचा एबी फॉर्म घेऊन आपला उमेदवारी अर्ज प्रभाग क्रमांक तीन मधून दाखल केला. उद्धव बाळासाहेब ठाकरे पक्षाच्या मीनलदास यांनी एकनाथ शिंदे गटाचा एबी फॉर्म घेत प्रभाग क्रमांक 21 मधून आपला उमेदवारी अर्ज दाखल केला. नुकतेच प्रवेश केलेले भाजचे माजी सभागृह नेते श्रीनिवास करले आणि उद्धव बाळासाहेब ठाकरे पक्षाच्या पूजा खंदारे यांनी देखील आपला अर्ज एकनाथ शिंदे गटाच्या वतीने दाखल केला.
यावेळी भारतीय जनता पार्टीतील दिग्गजांनी एकनाथ शिंदे गटाच्या एबीफॉर्मवर आपला उमेदवारी अर्ज कुमुद अंकाराम, सुरज पाटील, माजी उपमाहापौर राजेश काळे यांच्या पत्नी, दक्षिणची आमदारकी लढवलेले प्रकाश राठोड यांचा समावेश होता तर एकनाथ शिंदे गटाच्या वतीने प्रभाग सहा मधून अश्विनी भोसले, प्रभाग सात मधून अमोल शिंदे, मनोरमा सपाटे, अनिकेत पिसे, आणि तृतीयपंथी उमेदवार नरसिंह बिल्ला उर्फ नंदिनी यांनी शिवसेना एकनाथ शिंदे गटाकडून उमेदवारी अर्ज दाखल केला.
उमेदवारी अर्ज भरून जाताच राजीनाम्याचा ढीग
उद्धव बाळासाहेब ठाकरे पक्षांमधील इच्छुक उमेदवार मंगळवारी शेवटच्या दिवशी आपली उमेदवारी भरण्यासाठी नॉर्थकोट मैदान येथे आले होते. ती उमेदवारी भरून गेल्यानंतर सोशल मीडियावर आपल्या राजीनाम्याची पोस्ट केली. यामध्ये माजी नगरसेवक गणेश वानकर, युवा शहर प्रमुख विठ्ठल वानकर, जिल्हा समन्वयक दत्तात्रय वानकर, युवा सेना जिल्हाप्रमुख बालाजी चौगुले यांचा समावेश होता.
