टेंभुर्णी : वाळू माफियांच्या वकिलावर झालेला जीवघेणा हल्ला, भारत नाना पाटील यांच्यावर भर चौकात ऑइल ओतण्याची घटना आणि आता थेट कर्तव्य बजावत असलेल्या पोलिस कर्मचाऱ्यावरच जिवे ठार मारण्याचा प्रयत्न—या सलग घटनांमुळे टेंभुर्णी पोलीस ठाणे हद्दीत कायदा व सुव्यवस्थेचा गंभीर प्रश्न निर्माण झाला आहे. सोलापूर ग्रामीण पोलीस अधीक्षक अतुल कुलकर्णी यांच्या कार्यकाळात गुन्हेगारांचे मनोबल वाढले असल्याची चर्चा नागरिकांतून सुरू आहे.
डायल 112 वरून मदतीचा कॉल आल्यानंतर घटनास्थळी गेलेल्या टेंभुर्णी पोलीस ठाण्यातील पोलिस कॉन्स्टेबल महेंद्र अशोक शेटे यांच्यावर जिवे ठार मारण्याच्या उद्देशाने हल्ला केल्याची धक्कादायक घटना माढा तालुक्यातील आलेगाव बुद्रुक येथे घडली. या प्रकरणी सरकारी कामात अडथळा, मारहाण व खुनाचा प्रयत्न या गंभीर कलमान्वये तीन आरोपींविरुद्ध गुन्हा दाखल करण्यात आला असून, आरोपींच्या शोधासाठी दोन स्वतंत्र पथके तैनात करण्यात आली आहेत.
टेंभुर्णी पोलिस ठाण्याकडून मिळालेल्या माहितीनुसार, दि. १ जानेवारी २०२६ रोजी दुपारी सुमारे ३ वाजता पोलिस कॉन्स्टेबल शेटे हे डायल 112 ड्युटीवर कार्यरत असताना महादेव तुपसौंदर (रा. अकुंबे, ता. माढा) यांनी दोन इसमांनी मारहाण केल्याची माहिती देत स्वतःच्या जिवाला धोका असल्याचे सांगून पोलिस मदतीची मागणी केली होती. त्यानुसार शेटे तातडीने घटनास्थळी रवाना झाले.
आलेगाव बुद्रुक येथील भिमानगर रोडलगत कॉलर महादेव तुपसौंदर रस्त्यावर मिळून आले असताना, शेटे हे सरकारी गणवेशात त्यांच्याशी बोलत होते. त्याचवेळी ग्रे रंगाची विटारा ब्रिझा भरधाव वेगाने तेथे आली. गाडीतून उतरलेल्या तीन इसमांनी पोलिस गणवेश पाहताच, “तू इथे का आलास?” असे म्हणत वाद घालण्यास सुरुवात केली. शेटे यांनी शासकीय कर्तव्य बजावण्यासाठी आलो असल्याचे सांगताच आरोपी अधिकच आक्रमक झाले.
तिघांनी एकत्रितपणे शेटे यांची गच्ची पकडून धक्काबुक्की करत लाथाबुक्क्यांनी मारहाण केली. मध्यस्थी करण्याचा प्रयत्न करणाऱ्या महादेव तुपसौंदर यांनाही ढकलून देण्यात आले. आरोपींनी शेटे यांना खाली पाडून काठीने त्यांच्या उजव्या हातावर मारहाण केली. यावेळी एकाने दगडाने डोक्यावर वार करण्याचा प्रयत्न केला. वार चुकवतानाच दगड त्यांच्या डोक्याच्या मागील बाजूस लागल्याने शेटे यांना चक्कर येऊन ते खाली बसले.
इतक्यावरच न थांबता आरोपींपैकी एकाने,
“या पोलिसाला जिवंत सोडायचे नाही,”
असे म्हणत पुन्हा दगडाने हल्ला करण्याचा प्रयत्न केला. सरकारी गणवेशातील पोलिसावर होत असलेली मारहाण पाहून रस्त्यावरील नागरिकांनी गाड्या थांबवत तत्काळ हस्तक्षेप केला. नागरिकांच्या मदतीने पोलिस कॉन्स्टेबल शेटे यांची सुटका झाली. गर्दी वाढताच आरोपी आपली गाडी घेऊन घटनास्थळावरून फरार झाले.
जखमी पोलिस कॉन्स्टेबल शेटे यांच्यावर मार्स हॉस्पिटल, टेंभुर्णी येथे उपचार करण्यात आले. उपचारानंतर त्यांनी दिलेल्या फिर्यादीवरून रविंद्र रामचंद्र चंदनकर, रामचंद्र तुकाराम चंदनकर (दोघे रा. आलेगाव बुद्रुक, ता. माढा, जि. सोलापूर) तसेच रामचंद्र तुकाराम चंदनकर यांचा जावई यांच्याविरुद्ध गुन्हा दाखल करण्यात आला आहे. या प्रकरणाचा पुढील तपास पोलीस उपनिरीक्षक प्रशांत मदने करीत असून आरोपींच्या अटकेसाठी दोन पथके सक्रिय आहेत.
पोलीस निरीक्षक नारायण पवार यांची प्रतिक्रिया
“कर्तव्य बजावत असताना पोलिसावर झालेल्या हल्ल्याप्रकरणी आरोपींना कोणत्याही परिस्थितीत सोडले जाणार नाही. त्यांना लवकरात लवकर अटक करून कठोर कारवाई केली जाईल.”
2022 मधील वाळू माफियांचा हल्ला
२०२२ मध्ये गारआकोले गावात टेंभुर्णी पोलीस स्टेशनचे पोलीस देशमुख–माने व त्यांच्या सहकाऱ्यांवर वाळू माफियांनी वाहन घालण्याचा प्रयत्न केला होता. या घटनेत पोलिसांच्या मोटरसायकलचे नुकसान झाले होते.
पोलिस पथकावर दगडफेक
मारहाण प्रकरणाच्या चौकशीसाठी गेलेल्या पोलिस पथकावर जमावाने हल्ला केला होता. पोलीस उपनिरीक्षक अजित मोरे, पोलीस नाईक विनोद साठे यांच्यासह कर्मचाऱ्यांवर दगडफेक व धक्काबुक्की करण्यात आली होती. या प्रकरणी ११ जणांविरुद्ध गुन्हा दाखल करण्यात आला होता.
आलेगाव बुद्रुकची ताजी घटना
कर्तव्य बजावत असताना पोलिस कॉन्स्टेबल महेंद्र शेटे यांच्यावर हल्ला होणे ही अत्यंत गंभीर व चिंताजनक बाब असून यामुळे पोलीस दलाच्या सुरक्षिततेचा प्रश्न ऐरणीवर आला आहे.
राजकीय सवाल
“महाराष्ट्राचे मुख्यमंत्री देवेंद्र फडणवीस यांच्या राज्यात आणि सोलापूर ग्रामीणचे पोलीस अधीक्षक अतुल कुलकर्णी यांच्या जिल्ह्यात नेमके काय चालले आहे?” “अवघ्या एका महिन्यात दोन गंभीर घटना घडत असताना आता तरी कायदा व सुव्यवस्था राखण्यासाठी ठोस पावले उचलली जाणार का?” — असा सवाल उपस्थित केला जात आहे.
