सोलापूर : महानगरपालिका सार्वत्रिक निवडणूक २०२५–२६ च्या अनुषंगाने नागरिकांमध्ये मतदानाविषयी जागरूकता निर्माण करण्यासाठी सोलापूर महापालिकेमार्फत राबविण्यात येत असलेल्या मतदान जनजागृती उपक्रमांना मोठा प्रतिसाद मिळत आहे. “प्रत्येक मताचे महत्त्व” हा संदेश समाजाच्या प्रत्येक घटकापर्यंत पोहोचविण्यासाठी शाळा व महाविद्यालयीन विद्यार्थ्यांनी महत्त्वपूर्ण योगदान दिले.
महापालिकेच्या शिक्षण विभागामार्फत दि. २९ डिसेंबर २०२५ ते ५ जानेवारी २०२६ या कालावधीत शहरातील खाजगी, अनुदानित, विनाअनुदानित तसेच मनपा शाळा व महाविद्यालयांमध्ये व्यापक स्वरूपात मतदार जनजागृती कार्यक्रमांचे आयोजन करण्यात आले. या काळात निबंध, वक्तृत्व, चित्रकला, पथनाट्य, वादविवाद, घोषवाक्य स्पर्धा तसेच मतदान जनजागृती रॅली अशा विविध सर्जनशील उपक्रमांद्वारे विद्यार्थ्यांनी लोकशाहीतील मतदानाचे महत्त्व प्रभावीपणे अधोरेखित केले.
या उपक्रमात शहरातील एकूण ८९ शाळा व महाविद्यालयांनी सहभाग नोंदविला असून सुमारे १५ हजार विद्यार्थ्यांनी सक्रिय सहभाग घेतला. विद्यार्थ्यांच्या सर्जनशील सादरीकरणातून नागरिकांमध्ये सकारात्मक वातावरण निर्माण झाले असून विशेषतः नवमतदारांमध्ये मतदानाबाबत उत्साह वाढल्याचे चित्र दिसून आले.
लोकशाही प्रक्रियेत युवकांचा सहभाग वाढविण्यासाठी असे उपक्रम अत्यंत उपयुक्त ठरत असून आगामी निवडणुकीत मतदारांचा सहभाग वाढण्यास यामुळे निश्चितच मदत होईल, असा विश्वास सोलापूर महानगरपालिका आयुक्त डॉ.
सचिन ओम्बासे यांनी व्यक्त केला आहे.
