जेऊर – कुंभेज,(ता.करमाळा) येथील दिगंबरराव बागल माध्यमिक विद्यालय आणि यशकल्याणी सेवाभावी संस्था, पुणे यांच्या संयुक्त विद्यमाने विद्यार्थ्यांसाठी न्यायालय, पोलीस मुख्यालय व तहसील कार्यालय येथे एक दिवसीय शैक्षणिक सहल व अभ्यास दौरा आयोजित करण्यात आला.
यशकल्याणी संस्थेच्या सहकार्याने विद्यालयाचे मुख्याध्यापक हनुमंत पाटील यांच्या मार्गदर्शनानुसार उपक्रमशील शिक्षक पक्षीमित्र कल्याणराव साळुंके यांनी या अभ्यास दौऱ्याचे आयोजन केले. यादरम्यान विद्यार्थ्यानी करमाळा न्यायालय येथे न्यायदान कक्षात प्रत्यक्ष खटल्याचे कामकाज कसे चालते, पक्षकार , विधीज्ञ आणि न्यायाधीश यांची न्याय प्रक्रियेतील भूमिका इत्यादी बाबत सविस्तर निरीक्षणे नोंदवली.
महसुल विभागाचे प्रमुख ,तालुका मुख्य कार्यकारी दंडाधिकारी तथा तहसीलदार यांच्या अधिकार कक्षा , विविध विभाग, सामान्य नागरिकांप्रती प्रशासनाची बांधिलकी , गुन्हेगार व आरोपींचे कारागृह आदीबाबत माहिती घेतली.
यावेळी विद्यार्थ्यांनी कारागृहाची प्रत्यक्ष पाहणी करत कैद्यांचे जीवन, सुधारगृहाची भूमिका व कायद्याचे महत्त्व समजून घेतले.
कर्तव्यदक्ष तहसीलदार मा. शिल्पा ठोकडे यांनी विद्यार्थाना मार्गदर्शन करतना शालेय वयातील आपले अनुभव सांगितले व लोकसेवेची आवड असणाऱ्या विद्यार्थ्यानी स्पर्धा परीक्षेतून प्रशासकीय अधिकारी व्हावे असे आवाहनही त्यांनी केले.
उपविभागीय पोलिस अधिकारी आयपीएस अधिकारी अंजना कृष्णा व्ही. एस. यांच्या कार्यालयास भेटी दरम्यान विद्यार्थ्यानी त्यांच्याशी मनमोकळा संवाद साधला . अंजना कृष्णा यांनी विद्यार्थ्यांना आपली आवड ओळखून आपले क्षेत्र निवडा असा सल्ला दिला. तसेच कोणत्याही क्षेत्रात यशस्वी व्हा परंतू त्याआधी एक चांगला माणूस व्हा असा सल्ला त्यांनी आवर्जून दिला.
पोलिस मुख्यालयात प्रा.गणेश करे पाटील यांनी विद्यार्थ्यांना संबोधित करत आपले प्रेरणादायी विचार मांडले. प्रशासन आणि सामान्य नागरिक यांच्यामधे सौहार्दपूर्ण संबंध निर्माण करायचे असेल तर प्रशासनाने लोकाभिमुख होण्याची आवश्यकता असल्याचे मत त्यांनी व्यक्त केले व अशा प्रकारच्या नाविन्यपूर्ण विद्यार्थी अभ्यास दौऱ्यास प्रशासनाने केलेले सहकार्य प्रशंसनीय असून यशकल्याणी संस्था अशा उपक्रमांसाठी नेहमी पुढाकार घेऊन सहकार्य करेन असे आश्वासन दिले.
मुख्याध्यापक हनुमंत पाटील यांनी आपल्या मनोगतातून हा उपक्रम विद्यार्थ्यांचे अनुभवविश्व समृद्ध करणारा असून यासाठी विद्यालयाची नेहमी सकारात्मक भूमिका असेन असे सांगितले.
ए.पी.आय. व निर्भया पथक प्रमुख गिरिजा म्हस्के यांनी प्रशासन, कायदा व सुव्यवस्थेच्या विविध पैलूंविषयी मार्गदर्शन केले.
पो.कॉ. मंगेश पवार यांनी पिस्तुल, राइफल,कार्बाइन आदी शस्त्रांबाबत माहिती दिली.
या संपूर्ण अभ्यास दौऱ्यादरम्यान विद्यार्थ्यांनी विचारलेल्या प्रश्नांना अधिकाऱ्यांनी समर्पक उत्तरे देत शासकीय यंत्रणेची कार्यपद्धती स्पष्ट केली.
अभ्यास दौऱ्यात सहभागी झालेल्या सर्व विद्यार्थ्यांना यशकल्याणी संस्थेच्या वतीने प्रा.गणेश करे पाटील यांचे हस्ते सहभाग प्रमाणपत्र देण्यात आले. तसेच प्रवासासाठी वातानुकूलित बस आणि अल्पोपहाराची व्यवस्थाही संस्थेकडून करण्यात आली होती.
या अभ्यास दौऱ्यामुळे विद्यार्थ्यांना पुस्तकी ज्ञानाबरोबरच प्रत्यक्ष अनुभव मिळाल्याने त्यांची प्रशासनविषयक समज अधिक व्यापक झाली.
या अभ्यास दौऱ्याप्रसंगी आयपीएस मा.अंजना कृष्णा व्ही. एस. तहसीलदार मा. शिल्पा ठोकडे, यशकल्याणी संस्थेचे अध्यक्ष प्रा. करे-पाटील, एपीआय गिरिजा म्हस्के, बागल विद्यालयाचे मुख्याध्यापक हनुमंत पाटील, जीवन शिक्षण फाउंडेशनचे संचालक प्रा.जयेश पवार, पक्षीमित्र कल्याणराव साळुंके , निर्भया पथकचे पो कॉ. संभाजी पवार, पो.कॉ. मंगेश पवार,पो कॉ गणेश गुटाळ , पो कॉ. विद्या इंगोले सेवक संतोष घोरपडे, सेवक नंदकुमार कांबळे उपस्थित होते .
