सोलापूर – गुलमोहर सोसायटी येथे श्री गणेश जयंतीनिमित्त धार्मिक व भक्तिमय वातावरणात विविध कार्यक्रमांचे आयोजन करण्यात आले होते. या निमित्ताने ज्ञानेश्वरी पारायण सप्ताहाचे आयोजन करण्यात आले असून त्याचा समारोप गुरुवारी मोठ्या उत्साहात पार पडला. समारोपाच्या दिवशी दुपारी बारा वाजता पाळणा सोहळा पार पडला. त्यापूर्वी श्री ज्ञानेश्वर महाराजांच्या ग्रंथांची भव्य दिंडी काढण्यात आली. या दिंडीत सोसायटीतील सर्व महिला मोठ्या श्रद्धेने सहभागी झाल्या होत्या. दिंडीदरम्यान सर्व ग्रंथांची सामूहिक आरती करण्यात आली. त्यानंतर विधीवत ग्रंथपूजन करण्यात आले.
श्री गणेश जयंतीच्या निमित्ताने आयोजित करण्यात आलेल्या भव्य महाप्रसादाचा शेकडो भाविकांनी लाभ घेतला, अशी माहिती स्थानिक नागरिकांनी दिली. या संपूर्ण उत्सवामुळे परिसरात भक्तीमय व आनंदाचे वातावरण निर्माण झाले होते.
हा धार्मिक उत्सव यशस्वीपणे पार पाडण्यासाठी गुलमोहर सोसायटीतील स्थानिक नागरिकांनी अथक परिश्रम घेतले असून त्यांच्या सहकार्यामुळे कार्यक्रम अत्यंत शिस्तबद्ध व सुंदररीत्या संपन्न झाला.
