सोलापूर – पुण्यश्लोक अहिल्यादेवी होळकर सोलापूर विद्यापीठाच्या 2026-27 या शैक्षणिक वर्षासाठी 492 कोटी 35 लाख 62 हजार रुपयांच्या अंदाजपत्रकास अधिसभेने दुरुस्तीसह एकमताने मंजुरी दिली. 430 कोटी 74 लाख 98 हजार रुपये इतकी अपेक्षित जमा गृहीत धरून सादर करण्यात आलेल्या या अर्थसंकल्पात 61 कोटी 60 लाख 64 हजार रुपयांची तूट दर्शविण्यात आली आहे. विद्यार्थी विकास, संशोधन आणि नवोपक्रमांना यंदा विशेष प्राधान्य देण्यात आले आहे.
बुधवारी, विद्यापीठाच्या मुख्य सभागृहात कुलगुरू प्रा. डॉ. प्रकाश महानवर यांच्या अध्यक्षतेखाली अधिसभेची बैठक पार पडली. यावेळी प्र-कुलगुरू प्रा. डॉ. लक्ष्मीकांत दामा यांच्यासह अधिसभेचे सदस्य उपस्थित होते. प्रभारी कुलसचिव डॉ. अतुल लकडे यांनी सदस्य सचिव म्हणून काम पाहिले. वित्त व लेखा अधिकारी सीए डॉ. महादेव खराडे यांनी हे अंदाजपत्रक सादर केले.
अंदाजपत्रकाची मांडणी देखभाल-दुरुस्ती, वेतन, ऋण व अनामत, विकास योजना भाग-१ (शासन अनुदान) आणि विकास योजना भाग-२ (विद्यापीठ निधी) अशा पाच टप्प्यांत करण्यात आली. सादरीकरणानंतर सदस्यांनी सविस्तर चर्चा करून काही दुरुस्त्या सुचवल्या. त्यानंतर अंदाजपत्रकास एकमताने मंजुरी देण्यात आली.
बैठकीच्या प्रारंभी मागील इतिवृत्तांत कायम करण्यात आला. प्रश्नोत्तराचा तास पार पडल्यानंतर विविध ठरावांवर चर्चा करून निर्णय घेण्यात आले. विद्यार्थी विकास व संशोधनाभिमुख नाविन्यपूर्ण योजना यंदाच्या अर्थसंकल्पात केंद्रस्थानी असल्याचे चित्र अधिसभेतील चर्चेतून स्पष्ट झाले. यावेळी व्यवस्थापन परिषदेचे सदस्य राजाभाऊ सरवदे, प्रा. सचिन गायकवाड, डॉ. प्रशांत पवार, डॉ. समाधान पवार, डॉ. प्रभाकर कोळेकर, सिनेट सदस्य डॉ. बी. पी. रोंगे, डॉ. वीरभद्र दंडे, डॉ. भगवान आदटराव, प्राचार्य डॉ. शंकर नवले, रोहिणी तडवळकर, यतिराज होनमाने, गणेश डोंगरे, अजितकुमार संगवे, चन्नवीर बंकुर, डॉ. जैनोद्दीन मुल्ला, ॲड. उषा पवार, ॲड. मल्लिनाथ शहाबादे, ॲड. नीता मंकणी, ॲड. सुनंदा भगत, माधव देशपांडे, डॉ. सीमा गायकवाड, सिद्धेश्वर स्वामी, डॉ. राजेंद्र सूर्यवंशी, डॉ. मंगेश वेदपाठक, सुदर्शन यादव, अनिल घनवट, सौ. गवळी आदीनी प्रश्नोत्तरे व प्रस्तावाच्या चर्चेत भाग घेतला.
——–
*ठळक तरतुदी*
* डाटा सेंटरसाठी 6 कोटी
* अहिल्यादेवी स्मारक लेझर शो साठी 2 कोटी
*शिक्षकांच्या संशोधनाला चालना देण्यासाठी ‘सीड मनी’ उपक्रमासाठी 35 लाख रुपये.
*मुलींच्या उच्च शिक्षणातील प्रमाण वाढवण्यासाठी ‘मुली शिकवा, समाज घडवा’ उपक्रमासाठी 5 लाख रुपये.
*‘कमवा व शिका’ योजनेसाठी 20 लाख रुपये.
*आंतरविद्यापीठ क्रीडा स्पर्धांमध्ये सहभाग 1.25 कोटी
* खेळाडूंसाठी वैद्यकीय खर्च परतावा 2 लाख
*शिक्षक व कर्मचाऱ्यांसाठी वैद्यकीय प्रतिपूर्ती योजनेसाठी 20 लाख रुपये.
*विद्यार्थी संशोधन शिष्यवृत्ती आणि 40 गरजू विद्यार्थ्यांना मोफत पुस्तके देण्यासाठी भरीव तरतूद.
*इनोव्हेशन, इन्क्युबेशन अँड लिंकेजेससाठी विद्यापीठ हिस्सा म्हणून 50 लाख रुपये.
*स्पर्धा परीक्षा अभ्यास कक्ष, विद्यार्थी क्षमता संवर्धन कार्यक्रम, नवीन लेखक-प्रकाशक प्रोत्साहन योजना आणि ‘माझे विद्यापीठ’ उपक्रमासाठी विशेष निधी.
——–
प्रोफे जे. बी. जोशी यांना डीएससी व गिरीश प्रभुणे यांना डिलीट पदवी देणार
पद्मभूषण प्रोफेसर जे. बी. जोशी यांना डॉक्टर ऑफ सायन्स (डी.एससी) व पद्मश्री गिरीश यशवंत प्रभुणे यांना डॉक्टर ऑफ लिटरेचर( डि.लीट.) ही मानद पदवी देण्याचाही ठराव आधिसभेने सर्वांनुमते मंजूर केला. नवीन शासन निर्णयानुसार ही नावे शिफारस करण्याचा अधिकार कुलगुरूंना असल्यामुळे त्यांनी ही दोन नावे राज्यपाल तथा कुलपती यांच्या मंजुरीसाठी पाठवली होती. त्यांनी मंजुरी दिली असल्यामुळे हा ठराव व्यवस्थापन परिषदेनंतर आधिसभेनेही मंजूर केला आहे. त्यामुळे येत्या दीक्षांत समारंभामध्ये त्यांना या पदवी प्रदान करण्यात येणार आहेत.
——–
अण्णाभाऊ साठे, नितीन गडकरी व शरदचंद्र पवार यांचे प्रस्ताव प्रलंबितच
यापूर्वी साहित्यरत्न अण्णाभाऊ साठे यांना मरणोत्तर, केंद्रीय मंत्री नितीन गडकरी आणि माजी केंद्रीय मंत्री शरदचंद्र पवार यांना डिलीट पदवी देण्याबाबतचा ठराव अधिसभा व व्यवस्थापन परिषदेने केला होता. या ठरावाचे काय झाले असा प्रश्न अधिसभेने उपस्थित केला होता. हे सर्व प्रस्ताव राज्यपाल कार्यालयास पाठविले होते. परंतु त्यांच्याकडून मंजुरीने आली नसल्याचे कुलगुरू प्राध्यापक महानवर यांनी सभेत सांगितले. यांचे प्रस्ताव परत पुढील वर्षी पाठविण्याचे आश्वासन त्यांनी अधिसभेस दिले. त्यानंतरच कुलगुरूंनी शिफारस केलेल्या दोन नावांना सर्वांनुमते मंजूरी देण्यात आली.
