बार्शी – महाराष्ट्र राज्य विधी सेवा प्राधिकरण, मुंबई यांच्या निर्देशानुसार व जिल्हा विधी सेवा प्राधिकरण सोलापूर यांच्या मार्गदर्शनाखाली बार्शी न्यायालयात आयोजित करण्यात आलेल्या राष्ट्रीय महालोकअदालतीत तब्बल २३७० प्रकरणे तडजोडीने निकाली काढण्यात आली असून ३ कोटी ४९ लाख २४ हजार ५८६ रुपयांची वसुली करण्यात आली.
ही राष्ट्रीय महालोकअदालत तालुका विधी सेवा समिती बार्शी व बार्शी वकील संघ यांच्या संयुक्त विद्यमाने तसेच तालुका विधी सेवा समितीचे अध्यक्ष तथा जिल्हा न्यायाधीश-१ विक्रमादित्य के. मांडे यांच्या अध्यक्षतेखाली पार पडली. या उपक्रमास जिल्हा विधी सेवा प्राधिकरण सोलापूरचे अध्यक्ष एम. एस. शर्मा यांचे मार्गदर्शन व पी. पी. पेटकर यांचे सहकार्य लाभले.
११ हजारांहून अधिक प्रकरणे लोकअदालतीसमोर
या महालोकअदालतीत बार्शी न्यायालयातील ४०४० प्रलंबित दिवाणी व तडजोडपात्र फौजदारी प्रकरणे तसेच ७१२४ दाखलपूर्व प्रकरणे अशी एकूण ११,१६४ प्रकरणे तडजोडीसाठी ठेवण्यात आली होती. त्यापैकी मोठ्या प्रमाणावर प्रकरणे तडजोडीने निकाली काढण्यात आली.
वसुलीची महत्त्वाची आकडेवारी
प्रलंबित प्रकरणांत वसुली – १ कोटी ६४ लाख ९२ हजार ५६४ रुपये. दाखलपूर्व प्रकरणांत वसुली — १ कोटी ८४ लाख ३२ हजार २२ रुपये. एकूण वसुली — ३ कोटी ४९ लाख २४ हजार ५८६ रुपये
पाच न्यायालयीन पॅनलद्वारे सुनावणी
या महालोकअदालतीसाठी बार्शी न्यायालयात पाच पॅनल तयार करण्यात आले होते. त्यामध्ये- १) जिल्हा न्यायाधीश-१ विक्रमादित्य के. मांडे २) दिवाणी न्यायाधीश वरिष्ठ स्तर पी. बी. लोखंडे ३) सह दिवाणी न्यायाधीश कनिष्ठ स्तर पी. व्ही. राऊत ४) सह दिवाणी न्यायाधीश कनिष्ठ स्तर एच. यू. पाटील ५) सह दिवाणी न्यायाधीश कनिष्ठ स्तर आर. पी. बागडे यांचा समावेश होता. तसेच सह दिवाणी न्यायाधीश जी. एस. पाटील यांच्या न्यायालयात गुन्हा कबुलीचे विशेष न्यायालयही चालविण्यात आले.
विशेष उल्लेखनीय प्रकरणे
पॅनल क्रमांक २ मधील दिवाणी न्यायाधीश पी. बी. लोखंडे यांच्या न्यायालयात ६८ लाख ३३ हजार ५७३ रुपयांचा रक्कम वसुलीचा दावा तडजोडीने निकाली काढण्यात आला.
तसेच पॅनल क्रमांक ३ मधील सह दिवाणी न्यायाधीश पी. व्ही. राऊत यांनी वयोवृद्ध पक्षकार राजाराम चापले यांच्या प्रकरणात स्वतः दालनाबाहेर जाऊन तडजोडीची प्रक्रिया पूर्ण केली.
पॅनल क्रमांक ५ मधील सह दिवाणी न्यायाधीश आर. पी. बागडे यांनी किडनी आजाराने त्रस्त असलेल्या पक्षकार संजय नानासाहेब कुरुंद यांच्या प्रकरणातही दालनाबाहेर जाऊन तडजोडीची प्रक्रिया पूर्ण केली.
विविध प्रकारची प्रकरणे निकाली
मोटार अपघात भरपाई प्रकरण– १ प्रकरण– १७ लाख २५ हजार रुपये नुकसानभरपाई मंजूर.
एन.आय. ॲक्ट कलम १३८ अंतर्गत– १८ प्रकरणे– ३ लाख ६८ हजार ३५४ रुपये वसुली
रक्कम वसुलीची प्रकरणे- १२ प्रकरणे– १ कोटी १५ लाख ८ हजार २२७ रुपये वसुली.
तडजोडपात्र फौजदारी प्रकरणे– ५ प्रकरणे.
कबुलीची प्रकरणे– ९४ प्रकरणे– १ लाख ३३ हजार ५०० रुपये दंड वसुल
या महालोकअदालतीच्या यशस्वी आयोजनासाठी बार्शी वकील संघाचे अध्यक्ष रणजित गुंड, पॅनल विधीज्ञ, न्यायालयीन कर्मचारी, पोलीस कर्मचारी, विविध बँका व फायनान्स कंपन्या, पंचायत समिती बार्शी तसेच महावितरणचे प्रतिनिधी यांचे विशेष सहकार्य लाभले.
या महालोकअदालतीत मोठ्या संख्येने पक्षकारांनी सहभाग नोंदवून प्रकरणे तडजोडीने निकाली काढत न्यायालयीन वेळ व खर्चाची बचत केल्याचे समाधान व्यक्त करण्यात आले.
