सोलापूर : शहरातील राजकारणात पुन्हा एकदा डिजिटल पोस्टरच्या माध्यमातून आरोप-प्रत्यारोपांची मालिका सुरू झाली आहे. काँग्रेसने काही दिवसांपूर्वी लावलेल्या डिजिटलवर टीका करत आता भारतीय जनता युवा मोर्चा, सोलापूर शहरच्या वतीने प्रत्युत्तरात्मक डिजिटल लावण्यात आले आहेत. त्यामुळे शहरात भाजप आणि काँग्रेसमध्ये ‘डिजिटल वॉर’ चांगलाच रंगला असल्याची चर्चा सुरू झाली आहे.
माण-खटाव येथील सभापती निवडीच्या पार्श्वभूमीवर काँग्रेसने यापूर्वी भाजपचे पालकमंत्री जयकुमार गोरे यांच्यावर निशाणा साधत टीकात्मक आशयाचे डिजिटल लावले होते. त्या डिजिटलला उत्तर देत भाजप युवा मोर्चाने शहरातील सार्वजनिक ठिकाणी दोन वेगवेगळी डिजिटल लावून आपली भूमिका मांडली आहे.
पहिल्या डिजिटलमध्ये सातारा जिल्हा परिषदेत भाजपचा झेंडा फडकावून अध्यक्ष निवडून आणल्याबद्दल अभिनंदनाचा उल्लेख करण्यात आला आहे. त्यासोबतच “जय हो… अभी तो नापी है मुट्ठी भर जमीन हमने, अभी पूरा आसमान बाकी है…!” असा संदेश देत भाजप कार्यकर्त्यांचा आत्मविश्वास व्यक्त करण्यात आला आहे. या डिजिटलवर “शुभेच्छुक भाजपा युवा मोर्चा, सोलापूर शहर” असा उल्लेख करण्यात आला आहे.
दुसऱ्या डिजिटलमध्ये मात्र काँग्रेस शहराध्यक्षांवर मिश्कील आणि विडंबनात्मक टीका करण्यात आली आहे. या डिजिटलमध्ये काँग्रेसच्या पराभवांचा संदर्भ देत, “केंद्रीय गृहमंत्री, मुख्यमंत्री, विद्यमान खासदार तसेच शहर मध्य विधानसभा मतदारसंघात दीर्घकाळ आमदार असलेल्या काँग्रेस पक्षाचा दारुण पराभव करत, डिपॉझिट जप्त होण्याची वेळ आणून आणि नगरसेवकांची संख्या १५ वरून २ पर्यंत घसरवल्याबद्दल तसेच अवघ्या २५१ मतांनी निसटता विजय मिळवून ‘सर्वात अपयशी काँग्रेस शहराध्यक्ष’ बहुमान मिळवल्याबद्दल अभिनंदन,” असा टोला लगावण्यात आला आहे.
या डिजिटलमुळे शहरात राजकीय वातावरण पुन्हा तापले असून नागरिकांमध्ये याची मोठ्या प्रमाणात चर्चा सुरू आहे. विशेष म्हणजे सोशल मीडियावरही या डिजिटलचे फोटो आणि मजकूर व्हायरल होत आहेत.
दरम्यान, भाजप आणि काँग्रेस यांच्यात सुरू असलेल्या या डिजिटल युद्धाला आता काँग्रेसकडून काय प्रत्युत्तर दिले जाणार, याकडे शहरातील राजकीय वर्तुळासह नागरिकांचे लक्ष लागले आहे. सोलापुरातील राजकारणात डिजिटल पोस्टरच्या माध्यमातून सुरू झालेली ही शब्दांची लढाई पुढे आणखी रंगण्याची शक्यता व्यक्त केली जात आहे.
