सोलापुर – भारत रत्न इंदिरा गांधी अभियांत्रिकी महाविद्यालय , सोलापूरच्या संगणक अभियांत्रिकी विभागातील तृतीय वर्षाचा विद्यार्थी कार्तिक किशोर कोथलकर यांनी आंतरराष्ट्रीय पातळीवर मोठी कामगिरी बजावली आहे. लंडन येथील रिव्हरसाइड अभियांत्रिकी आणि तंत्रज्ञान महाविद्यालय यांच्या वतीने आयोजित करण्यात आलेल्या आंतरराष्ट्रीय हॅकथॉन २०२६ या २४ तासांच्या ऑनलाइन जागतिक स्पर्धेत कार्तिक यांनी अव्वल क्रमांक पटकावत भारताचे, सोलापूरचे आणि महाविद्यालयाचे नाव उज्ज्वल केले.
ही स्पर्धा पूर्णपणे ऑनलाइन पद्धतीने पार पडली असून जगभरातील अनेक नामांकित विद्यापीठांमधील विद्यार्थ्यांनी यात सहभाग नोंदवला होता. कार्तिक यांनी सादर केलेला K-Reducer Pro – An AI-Integrated Image Compression Application हा प्रकल्प नाविन्यपूर्ण संकल्पना, उत्कृष्ट तांत्रिक अंमलबजावणी आणि प्रभावी सादरीकरणामुळे परीक्षकांच्या विशेष लक्षात आला.
या यशामध्ये CSE विभागप्रमुख प्रा. आनंद ग्यानबोटे यांचे मार्गदर्शन आणि तांत्रिक सहाय्य महत्त्वपूर्ण ठरले असल्याचे सांगण्यात येते. तसेच प्राचार्य डॉ. अनिल के. देशमाने हे विद्यार्थ्यांना विविध राष्ट्रीय-आंतरराष्ट्रीय स्पर्धांमध्ये सहभागासाठी सतत प्रोत्साहन देत असल्याने कार्तिक यांना मोठा आधार मिळाला. याशिवाय चेअरमन मा. इंजी.रवींद्र गायकवाड आणि सेक्रेटरी सौ. अनामिका आर. गायकवाड यांनीही कार्तिक यांच्या या उल्लेखनीय कामगिरीचे कौतुक करत भविष्यासाठी शुभेच्छा दिल्या.
या यशामुळे BIGCE आणि सोलापूरचे नाव पुन्हा एकदा जागतिक पातळीवर झळकले आहे.
या त्याच्या यशाबद्दल संस्थेमधील सर्व शिक्षक व शिक्षकेतर कर्मचारी यांनी कार्तिक कोथळकर यांचे खूप खूप अभिनंदन केले
