सोलापूर – पावसाळ्याचे आगमन अद्याप लांबल्याने आणि भूजल पातळीत झालेल्या घटेमुळे जिल्ह्यातील पाणीटंचाईची परिस्थिती कायम आहे. सध्या १६ गावे व ८२ वाड्यांतील ३० हजार १५५ नागरिकांना १७ टँकरद्वारे पिण्याच्या पाण्याचा पुरवठा करण्यात येत आहे. संभाव्य टंचाईची तीव्रता लक्षात घेऊन प्रशासनाने आणखी १० गावांसाठी १० नवीन टँकर मंजूर करण्याचा प्रस्ताव वरिष्ठ स्तरावर पाठविल्याची माहिती जिल्हा परिषदेचे मुख्य कार्यकारी अधिकारी कुशल जैन यांनी दिली.
जिल्हा प्रशासनाच्या ताज्या अहवालानुसार, माळशिरस तालुका सर्वाधिक टंचाईग्रस्त असून येथे ८ गावे आणि ६३ वाड्यांतील १३ हजार ३१५ नागरिकांसाठी ८ टँकर कार्यरत आहेत. त्यामुळे जिल्ह्यातील सर्वाधिक टँकर व्यवस्था याच तालुक्यात सुरू आहे. याशिवाय अक्कलकोट तालुक्यातील १ गावासाठी १ टँकर, बार्शीतील १ गावासाठी १ टँकर, दक्षिण सोलापूरमधील १ गावासाठी १ टँकर, तर सांगोला तालुक्यातील २ गावे व १९ वाड्यांसाठी २ टँकर कार्यरत आहेत. जिल्हाभरात या टँकरद्वारे दररोज ३५ पाणीफेऱ्या केल्या जात आहेत.
दरम्यान, उन्हाळ्याच्या अखेरीस पिण्याच्या पाण्याची समस्या अधिक गंभीर होऊ नये यासाठी प्रशासनाने अतिरिक्त उपाययोजनांना वेग दिला आहे. प्रस्तावित गावांमध्ये करमाळा तालुक्यातील चोटी व केम, माळशिरसमधील कोयळे व उंबरे दहिगाव, माढ्यातील अंजनगाव व तुळशी, सांगोल्यातील कोळे तसेच मंगळवेढा तालुक्यातील लेंडवे चिंचाळे, खुपसंगी आणि रखे या गावांचा समावेश आहे. या प्रत्येक गावासाठी प्रत्येकी १ टँकर मंजूर करण्याची मागणी करण्यात आली आहे.
कोट
पावसाळा पूर्णपणे सक्रिय होईपर्यंत ग्रामीण भागातील नागरिकांना पिण्याच्या पाण्याचा त्रास होऊ नये, यासाठी प्रशासनाकडून सातत्याने आढावा घेऊन आवश्यक उपाययोजना केल्या जात आहेत.
– कुशल जैन, मुख्य कार्यकारी अधिकारी जिल्हा परिषद सोलापूर
चौकट
टँकरद्वारे पाणीपुरवठ्याची आकडेवारी
लाभार्थी गावे : १६ लाभार्थी वाड्या : ८२ लाभार्थी नागरिक : ३०,१५५ दररोज पाणीफेऱ्या : ३५ प्रस्तावित नवीन टँकर : १० प्रस्तावित गावे : १० सर्वाधिक टंचाईग्रस्त तालुका : माळशिरस
