सोलापूर : आर्थिकदृष्ट्या दुर्बल घटकांतील विद्यार्थ्यांना शैक्षणिक मदत मिळावी, गुणवत्तापूर्ण शिक्षणाला चालना मिळावी आणि मनपा शाळांमधील पटसंख्या वाढावी, या उद्देशाने सोलापूर महानगरपालिकेच्या महिला व बाल कल्याण समिती विभागातर्फे मनपा संचलित माध्यमिक शाळांतील इयत्ता नववी व दहावीच्या ४३१ विद्यार्थ्यांना मोफत पाठ्यपुस्तकांचे वितरण करण्यात आले.
या कार्यक्रमास उपमहापौर ज्ञानेश्वरी देवकर, स्थायी समिती सभापती रंजिता चाकोते, गटनेत्या वहीदाबानो शेख, नगरसेविका श्वेता खरात (खांडेकर), कल्पना कदम, नगरसेवक प्रियदर्शन साठे, नगरसेवक नरसिंग आसादे ,शिक्षण मंडळाचे नियंत्रण अधिकारी तथा मुख्य लेखापाल डॉ. रत्नराज जवळगेकर, उपायुक्त तथा नियंत्रण अधिकारी सोनाली यादव , प्रशासन अधिकारी मल्हारी माने, महिला व बाल कल्याण अधिकारी अजितकुमार खानसोळे यांच्यासह मुख्याध्यापक, शिक्षक, पालक आणि विद्यार्थी मोठ्या संख्येने उपस्थित होते.
कॅम्प येथील महानगरपालिका मराठी मुलींच्या शाळेत बुधवारी आयोजित कार्यक्रमात विद्यार्थ्यांना पाठ्यपुस्तके वितरित करण्यात आली. यावेळी उपमहापौर ज्ञानेश्वरी देवकर यांनी विद्यार्थ्यांना नव्या शैक्षणिक वर्षासाठी शुभेच्छा देत शिक्षणात सातत्य आणि मेहनतीचे महत्त्व सांगितले. स्थायी समिती सभापती रंजिता चाकोते यांनी महिला व बाल कल्याण विभागाच्या उपक्रमाचे कौतुक करत मनपा शाळांमध्ये आवश्यक भौतिक सुविधा उपलब्ध करून देण्यासाठी प्रयत्नशील राहणार असल्याचे सांगितले. नगरसेवक नरसिंग आसादे यांनी शाळांच्या दुरुस्ती व बांधकामासाठी आवश्यक उपाययोजना करण्याची मागणी प्रशासनाकडे केली.
उपायुक्त तथा नियंत्रण अधिकारी सोनाली यादव यांनी प्रास्ताविकात या उपक्रमामागील उद्दिष्टे स्पष्ट करत विद्यार्थ्यांना मार्गदर्शन केले.
सुमारे ३ हजार ९९१ पाठ्यपुस्तकांचे वितरण
मनपा प्रशाला क्रमांक १, २, ३ व ४, उर्दू कॅम्प शाळा, जय भवानी प्रशाला आणि सावित्रीबाई फुले इंग्लिश मिडियम स्कूलमधील विद्यार्थ्यांना पाठ्यपुस्तके देण्यात आली.यंदा नववीच्या २०४ आणि दहावीच्या २२७ अशा एकूण ४३१ विद्यार्थ्यांना सुमारे ३ हजार ९९१ पाठ्यपुस्तकांचे वितरण करण्यात आले. मराठी, हिंदी, इंग्रजी, गणित, विज्ञान, इतिहास, राज्यशास्त्र, भूगोल, अर्थशास्त्र, जलसुरक्षा, संरक्षणशास्त्र, रिटेल, ऑटोमोबाईल आणि उर्दू या विषयांच्या पुस्तकांचा त्यामध्ये समावेश होता.
